Dem edeln vesten ritter hern Peter von Torberg¹ ho^vptman vnd lantvogt miner gena^ediger hersch(aft) || von O^ester(rich) emb(iet) ich Johans von Langenh(art) vogt ze Rapreswile² minen willigen dienst zů al||len sachen vnd tůn v´ch ze wissenn, daz ich reht vnd redlich ze ko^vffenn geben han vnd || gib mit disem brief den erberen bescheidnen Heintzen vnd Gudentzen Múllern gebrůder die rehtung, die ich hat oder gehan moht von reht oder von gewonh(eit) an der vogty ze Moss³, dú lêhen ist von der obgenanten miner hersch(aft) von O^ester(rich), vmb sibentzig vnd fúnf guldin gůter vnd genger Florener am gold vnd an gwîcht, der ich gantzlich von inen gewert bin, die selben rehtung, so ich an der vorgenanten vogty hat, ich ledklich v^f gegeben han vnd gib mit disem brief in mines lieben o^ehem Joh(a)n von Bo^vnstetten⁴ hant, won o^vch der o^vch lêhen von der selben miner hersch(aft) von O^ester(rich) het, also daz er der selben Heintzen vnd Gudentzen gebrůder v´ber die vorgenanten rehtung getrúwer trager sin sol vntz an v´ch, vnd send v´ch o^vch die selben rehtung bi dem obgenanten Joh(a)n von Bo^vnstetten minem o^ehem vnd ir trager ledklich v^f vnd bitt(en) v´ch ernstl(ich), daz ir die selben rehtung von im v^fnemint vnd si darnach den obgenanten Heintzen vnd Gudentzen Múllern gebrůder lîhint iemer durch mines dienstes willen. Vnd des ze vrkúnd so han ich mîn insigel offenlich gehenkt an disen brief. Der geben ist ze Rapreswile an sant Gallen abend, do man zalt von Cristus gebúrt drútzehenhundert vnd sêchtzig iâr vnd darnach in dem sibenden jâre.

Source Fulltext: Chartularium Sangallense VIII, Nr. 5096, S. 273-274.