Ich V^odelhilt¹ wilend Walthers Maigers von Altstetten² sa^eligen eliche wirtinn vnd ich Jos vnd och ich Walther von Altstetten die Maiger³ ir su^ene ku^endent vnd verjehend offenlich an disem brieff allen den, die in sehend oder ho^erend lesenn, dz wir mit gůter vorbetrachtung nach raut vnser fru^end vnd erben vnd sunderlich ich V^odalhilt du^e Maigerin von Altstetten mit willen gunst vnd hand mins gna^edigen herrn vnd rechten fogtes graff Růdolffs von Montfort⁴ herrn ze Veltkilich⁵ habend ze koffenn geben recht vnd redlich ains schlechten ewigenn koffs dem ersamen herrn brůder Cůnratenn⁶ von Pender⁷ vnd sinen erben, ob er enwer, die vier schilling ja^erlichs pfennings geltz Costenczer mu^encz, die wir hattond vsser allem dem ligendemm gůt, dz Haincz der Ka^eller von Runggell⁸ haut, es sigind acker wisenn holcz veld wunn vnd waid, wie es namenn haut vnd wa es gelegen ist, mit aller zů geho^erd vnd rechten, als wirs vncz her inne geheppt vnd genossenn habind, habind wir im vnd sinenn erben ains schlechten ewigenn^a) ze koffend geben vmb sechs vnd drysg schilling pfenning als gůter Costenczer mu^encz, der wir gar von im gewert sind, dez alles wir vnd vnser erben sin vnd siner erben gůt weren sin so^ellend nach recht vmb disen ewigen koff dez obges(chriben) pfennings geltz, wa si sin jemer notturfftig werdent an gaistlichem oder an weltlichem gericht. Vnd dz diß alles war vnd sta^et belibi, dez ze vrku^end henkend wir all dry vnsru^e insigell an disenn brieff. Ich V^odalhilt du^e Maigerin von Altstetten ha^vn och zů merer sicherait gebetten min obgen(anten) herrn vnd vogt grauff Růdolffen von Montfort herrn ze Veltkilch, dz er ze vrkund diß kouffs sin insigell hengt an disen brieff, dz selb min insigell ich grauff Růdolff von Montfort herr ze Va^eltkilch durch flissig bett miner můmenn frow V^odelhiltinenn der Maigerin von Altstetten vnd och ze vrku^end diß kouffs, der mit miner hand volbracht ward mit allen sachenn, als es wol krafft mocht geha^vn, gehengt ha^vn an disenn brieff, won ich dez tages ir rechter vogt wz. Vnd ward der brieff ze Va^eltkilch geben, do man zalt von Crists geburt drizehenhundert jar, sechczg jar vnd darnach im achtenden jar, an sant Gregorien tag im merczen.

Source Fulltext: Chartularium Sangallense VIII, Nr. 5123, S. 290.