Wir Beatrix von Wolhusen von gottes gnaden eptischin des gotzhus Zúrich¹ sant Benedicten ordens in Kostenzer bystům kúnden allen, die disen brief sechent oder ho^erent || lesen, das fúr v´ns kam die erber fro^vw fro Margarethe Heinrich Berschingers seligen burgers ze Rapreswil² wilent elichú wirtinn mit Bilgrin Russinger von || Rapreswil ir erkornen vnd rechten vogtes hant vnd zechen viertal kernen jerliches geltes Zúricher messes, die si hatt vf der hůb ze Menidorf³ || gelegen vf dem gůt, das der Schlegel buwt, vnd ist erb von v´nserm gotzhus vmb einen semlichen zins, als an v´nsers gotzhus zinsbůchen vnd ro^edeln geschriben stat, mit allem recht, so dar zů geho^ert, an v´nser hant ze v´nsers gotzhus wegen vf gab vnd batt das liehen dem spital vnd den dúrftigen ze Rapreswil⁴. Wir erhorten ir vnd ander erber lúten ernstlichú bêtt vnd namen das vorgeschriben kernen geltz von ir vf mit des obgenanten Bilgri Russingers ir erkornen vnd rechten vogtes hant vnd habens verliehen brůder Johans pfleger des vorgenanten spitals ze Rapreswile zů des selben spitals vnd der dúrftigen wegen ze einem rechten erbe von v´nserm gotzhus vmb den vorgenanten zins. Sich hat o^vch die obgenant fro Margarethe Heinr. Berschingers seligen wilent eliche wirtinne mit dez vorgenanten ir erkornen vnd rechten vogtes hant fúr si vnd ir erben entzigen^a) genzlich alles rechten vordrung vnd ansprach, so sú oder ir erben, ob si enweri, nach den vorgeschribnen zechen viertal kernen jerlicher gúlte gegen dem vorgenanten spital ze Rapreswil nu vnd hie nach iemer an geistlichen oder an weltlichen gerichten dekeine wîs iemer gewinnen oder gehaben mo^echten a^vn alle geuerd. Man sol o^vch sunderlich wússen, das ein jeklicher pfleger des vorgenanten spitals ze Rapreswil allú iar einest fúr v´ns oder v´nsers gotzhus nachkomen, ob wir enweren, komen sol vnd die vorgeschriben zechen viertal kernen gelt von v´nser hant oder von v´nser nachkomen, ob wir enweren, enpfahen ze des obgenanten spitals wegen, vnd súllen o^vch wir oder v´nsers gotzhus nachkomen das vorgeschriben kernen gelt dem selben spital jerlichs liehen a^vn all widered vnd an alle geuerd. Herv´ber ze einem waren vrkúnd so geben wir disen brief v´ns vnd v´nsers gotzhus zinsen vnd rechten vnschedlich besigelt mit v´nserm insigel offenlich. Der geben ist Zúrich in v´nserm hof an dem nechsten mentag nach sant Verenen tag des jars, do man zalt von gottes gebúrt drúzechen hundert vnd sechzig jar vnd dar nach in dem achtoden jar. Da bi warent her Eberhart Múller ritter v´nser schulth(eiss) Zúrich, Eberli Múller v´nser kuchimeister, Claus Wisman v´nser amman, Heinr. von Schlieren⁵, Claus Nêtzendal burger Zúrich vnd ander erber lúten vil.

Source Fulltext: Chartularium Sangallense VIII, Nr. 5145, S. 316.