Allen den, die disen brief ansehent alder ho^erent lesen, kúnden wir Eppo von Eppenstain¹ vnd Růdolf der || Asster von Wile² vnd veriehen offenlich mit disem brief fúr v´ns vnd v´nser erben, das wir den erwirdigen || gaistlichen herren apt Hainrichen vnd dem conuent gemainlich des gotzhus ze Rino^w3 sanet Benedicten || ordens in Costentzer bistům vnd irem gotzhus reht vnd redelich ze kouffen geben haben Walthern den Nu^efrer, der von dem libe v´nser aigen gewesen ist, vmb zwai pfunt pfenning Costentzer múntz, der wir von dem vorgeschriben apt Hainrich gantzlich gewert sint an v´nsern gůten nutz, vnd dar vmb so entzehen wir v´ns mit disem brief fúr v´ns vnd alle v´nser erben gen den egnanten herren von Rino^v iren nahkomen vnd irem gotzhus des vorgenanten Walthers des Nu^efrers aller der recht, so wir an ime hatten, vnd mit namen aller der hilf vnd alles schirmes gaistliches vnd weltliches gerichtes, damit wir ald v´nser erben, ob wir nút werin, die vorgenanten herren von Rinowe ir gotzhus vnd ir nahkomen an dem vorgenanten Walthern lebenten vnd toten iemer mo^ehtint bekúmberren oder bekrenken an sinem libe oder an sinem gůt an alle geua^erde. Wir haben ouch gelopt fúr v´ns vnd v´nser erben den vorgeschriben herren von Rino^w iren nahkomen vnd irem gotzhus, des obgenanten Walthers des Nu^efrers fúr aigen recht wern ze sin an allen stetten, wa sú des notúrftig sint, nah recht. Vnd ze warem vrkúnde diser vorgeschribener dinge so haben wir v´nserú insigel fúr v´ns vnd v´nser erben, die wir da mit ouch hierzů binden, offenlich gehenket an disen brief. Der geben wart an dem samstag nah des hailigen crúces tag ze herbst in dem jar, do man zalt von gottes gebúrte drúzehenhundert vnd sa^ehzig jar, darnah in dem ahtenden jare.

Source Fulltext: Chartularium Sangallense VIII, Nr. 5146, S. 317.