Ich Johans Seinftleben edel knecht burger ze Bern tůn kunt allen den, die disen brief ansehent oder ho^erent lesen, daz || ich gesunt libes vnd můtes mit gůter vorbetrachtung noch mit vnkeiner geuerd hinder komen verko^vffet han vnd hin gegeben recht || vnd redlich dem bescheiden knecht Cu^entzin in der Gassen burgern ze Búrron¹ gesessen ze Oberwile² minen zechenden, der gelegen ist in der || dorfmarch ze Oberwile, den man nemmet Steinftlebens zechent, vnd lehen ist von dem gotzhus von sant Gallen, vnd han im in verko^vffet vmb hundert phunt phenningen der múntze, die ze Solotern³ geng vnd gebe ist, die ich von im gentzlich in gezalten phenningen emphangen han vnd in minen nutz bewendet, im vnd sinen erben den vorgen(anten) verko^vften zechentden von dem egen(anten) gotzhus von dishin ze habenne ze niessenne ze besetzzenne vnd ze entsetzzenne frilich vnd růwklich mit allem dem rechte nutze vnd ehaftigi, so deheis wegs darzů ho^eret, vnd entwerren mich vnd min erben des obgen(anten) verko^vftes zechenden vnd bewerren sin denn egen(anten) Cu^entzin in der Gassen vnd sin erben liplich mit disem brief vnd loben fúr mich vnd min erben, im vnd sinen erben des egen(anten) verko^vftz zechenden recht wer ze sinde vnd ewig werschaft ze leistenne an allen geistlichen vnd weltlichen gerichten vnd vsrunt gerichtes, wa wen old wie dicke er oder sin erben des bedúrfent, in vnser eigern kost wider menlichen vestlich vnd bi gůten trúwen. Ich verziehen mich ouch fúr mich vnd fúr min erben aller hilfe geistlichs vnd weltlichs gerichtes alles geschriben vnd vngeschriben rechtes lantrechtes stetrechtes des landes vnd der stetten gewonheit des rechtes, daz sprichet, ein gemein verziehen veruache nút, vnd mit namen aller der fúnden vnd vszúchunga, die nu funden sint old noch funden wurden, da mit dirre ko^vf nach malz deheis wegs geirret mo^echte werden old wider ru^efet, vnd setzzen darvmb im vnd sinen erben mich vnd min erben vnuerscheidenlich ze rechten gelten vnd búrgen. Hie bi waren vnd sint gezúge Johans zem Ofen min amman burger ze Bern, Hensli Cu^entzis, Johans Spilweg burger ze Búrron vnd ander genůg. Vnd dz dis alles war si vnd stet belibe, so han ich Johans Seinftleben min ingesigel an disen brief gehenket, darzů han ich erbetten Cůntzman von Mutzwilr⁴ edeln knecht schulth(eissen) ze Búrron, dz er ouch sin ingesigel hat gehenket an disen brief, daz ich Cůntzman von Mutzwilr obgen(anter) schulth(eiss) ze Búrron mich vergich getan han durch bette willen des obgen(anten) Johans Seinftlebens ze gezúgsami. Der geben ist ze Búrron an dem nechsten fritag nach v´nsers herren fronlichamen tag des jars, dů man zalt von gotz gebúrt drúzechenhundert echtúwi vnd sechzig jar.

Source Fulltext: Chartularium Sangallense VIII, Nr. 5132, S. 299.