Allen^a) den, die disen brief ansehent lesent oder ho^erent lesen, kúnd ich Ripreht der Helt von Rinegge¹ vnd vergich offenlich || mit disem brieue fúr mich fúr alle min erben vnd nâchkomen, daz ich mit wolbedahtem můt vnd gůter vorbetrahtung || den erberen vnd wolbeschaidnen A^eblin in Frido^vw² vnd Johansen Frido^vwer sinem swâger reht vnd redlich verlihen han vnd || lich inen vnd allen iren erben mit disem brieue den hof ze Frido^vw, der von dem hailigen rîch min lehen ist, mit hûs mit hof mit akkern mit wisen mit wasen mit zwi mit holtz mit veld mit wunn mit waiden mit stegen mit wegen mit allen rehten nútzzen vnd gewonhaiten vnd mit allem dem, so von reht ald von gewonhait darzv^o vnd darin geho^ert, ze ainem rehten sta^eten walderblehen vmb ainen sta^eten zins mit so^elicher beschaidenhait vnd in dem rehten, daz sú vnd iro erben, ob sú enwa^erint, den vorgeschribenen hof mit allen rehten vnd mit aller zv^o geho^erde haben vnd niessen sont, vnd sont mir vnd allen minen erben vnd nâchkomen da von aller ja^erlich ie ze sant Gallen tag nún scheffel gůtes vnd vngeuârliches habern Rinegger messes, drizehen schilling phenning gůter vnd gena^emer Constentzzer múnse, ain halb viertail schmaltzzes Rinegger messes vnd aht herbsthu^enr, darnâch ie ze der vasnaht zwai vasnaht hu^enr vnd darnach ie ze dem hailigen abent ze ostran ahtzig aiger ze rehtem ja^erlichem zins ân fúrzug vnd ân allen vnsern schaden geben vnd rihten. Vnd han o^vch darumb von den obgenanten A^eblin in Frido^vw vnd von Johansen Frido^vwer sinem swâger ze rehtem êrschatz genomen vnd enphangen zehen phunt phenning gůter vnd gena^emer Costentzzer múnse, die an minen offenn nutz komen sint vnd bewendet. Vnd darumb so han ich den selben A^eblin in Frido^vw vnd Johansen Frido^vwer sinem swâger gelobt mit miner trúwe vnd loben in mit disem brieue fúr mich fúr alle min erben vnd nâchkomen, dez vorgschribenen erblehens mit aller zv^o geho^erde wer ze sinne vnd sú vnd alle iro erben darumb ze versprechenn ze versta^enne vnd getrúlich ze schirmenn mit dem rehten gen ma^englichem, wenn wâ vnd wie dik sú dez bedurffent vnd nôtdurftig sint. Ez ist o^vch mit namen bedingot vnd berett, daz der obgenant A^ebli in Frido^vw vnd sin erben, ob er enwa^er, dez vorgeschribenen hofes ze Frido^vw zwên tail haben niessen vnd verzinsen sont vnd daz der obgenant Johans Frido^vwer sin swager vnd sin erben, ob er enwa^er, den dritten tail dez selben hofes haben niessen vnd verzinsen sont. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nâch gewonhait vnd nâch reht darzv^o gehortent ald ho^eren soltent vnd nôtdurftig wârent vnd alz ez kraft vnd maht sol vnd mag han. Vnd ze ainem wâren vrkúnde vnd gantzzer sicherhait aller der vorgeschribenen dinge vnd gedinge so han ich Ripreht der Helt da vorgenemt fúr mich fúr alle min erben vnd nâchkomen min insigel gehenkt an disen brief. Der geben ist ze Rinegge an dem na^ehsten fritag nâch v^sga^enter phingstwûchen in dem jâr, do man zalt von gottes gebúrt drúzehenhundert jâr, sehszig jâr vnd darnâch in dem ahtoden jâre.

Source Fulltext: Chartularium Sangallense VIII, Nr. 5131, S. 298.