Wir^a) swo^ester Cristin von Husen a^ebtischin vnd der conuent gemainlich dez closters ze Mageno^vw¹ des ordens von Zitels gelegen in Costentzer bistunb tůn kumt^b) vnd vergehent || offenlich mit vrkúnt diss briefes allen den, die in an sehent lesen alder ho^erent lesen, das wir mit bedachten můt vnd gůter betrachtung vnd willen^c) vnd vmb redlich noturft v´nsers || gotzhuses vnd mit vrlob gunst vnd willen v´nsers gena^edigen herren abte Albrechtes abte des closters ze Wettigen², der och v´nser ober ist in gaistlichen vnd in zittlichen sachen, || verko^vffet hant vnd verko^vffent recht vnd redlich in koffes wiss das gůt, das man da nenmet dez Schútzen gůt vnd gelegen ist ze Ganderswile³, das ietzent búwet der Ho^ew, das wir fúr fri aigen vntz her behebt haint vnd vn an spra^eche, vnd giltet vier mut kernen Wiler⁴ messes, mit aller rehtung vnd ehabti, als es an v´ns komen ist vnd wir es gehebt hant, den erberen lúten vnd wald brůdern brůder Hansen von Jonswile⁵, brůder Hainrich von sant Gallen priester, brůder Weltin vnd brůder Hainrich, die wonhaft vnd gesessen sint in dem tobel, das man nenmet im Sedel⁶, gelegen ze Ganderswile vmb drú vnd trisig phund phenning gůter vnd gena^emer Costentzer múnse, der wir gantzlich vnd gar von in gewert sint vnd in v´nser redlichen schinberen nutz bekert hant. Wir dú vorgenant a^ebtischin vnd conuent lobent o^vch mit vrkúnd dises briefes, des obgenanten gůtes recht wer ze sin fúr fri legit^d) aigen an allen stetten, wa man sin notúrftig als recht ist, vnd enzihent v´ns aller rechtung vnd gewer, so wir vntz her an das vorgescriben gůt gehebt hant alder han mochtant. Man sol wissen, das der zins alder nutz des obgenanten gůtes geho^eren sol vnd geho^eret an das lieht, das da brinnet vor dem wirdigen vronlichomen v´nsers herren Iesu Cristi in der cappelle der obgenanten ho^vfstat, die man da nemnet in dem Sedel ze Ganderswile, alle die wil so erwirdig gaistlich priester oder brůder oder swo^estran da wonhaft sint, vmb das das liecht da sta^etteclich brinne. Wer aber, da vor got si, das dv´ obgenat^b) hofstat in dem tobel im Sedel ze Ganderswile gewu^est alder zesto^ert wrd von todes alder von fúres alder von vrlúges wegen alder was sach es wa^er, das nieman da wonhaft wer, der got dienti vnd der cappelle phlege, so sol das obgenant gu^etli mit allem nutz wider gen Mageno^vw ho^eren, als lang vntz das aber erwirdig lút gaistlich brůder oder swo^estran wider vf die obgenanten hofstat kement, got da ze dienen vnd sta^eteclich da ze belibenn, vnd wenne das beschiht, so sol der obgenant nutz zins wider vmb geho^eren^e), an alles svmen vnd wider red. Vnd ze ainer merer sicherhait dis vorgescriben ko^vffes vnd beding so geben wir swo^ester Cristin a^ebtischin des closters ze Magenow vnd des conventus cappitels v´nsrú ingesigel an disen brief vnd mit v´nsers gena^edigen herren ingesigel abt Albrehtes von Wettigen. Der geben ward an dem na^ehsten samtag nach sant V^olrichs tag, do man zalt von Cristes gebúrt drúzehen hundert iar, dar nach in dem sehzgosten vnd núden iar.

Source Fulltext: Chartularium Sangallense VIII, Nr. 5184, S. 353-354.