Ich^a) Walther Herman von der Núwen Burg kúnd vnd vergich offenlich mit disem brief allen, die in an sehent lesent oder ho^erent lesen, daz die || erwirdigen gaistlichen fro^vwen dú a^ebtischinne vnd der conuent gemainlich dez gotzhusez ze Maggenowe daz gůt gelegen ze Wînuelden, || daz man da nemt Horands gůt, mit húsern mit hofstetten mit akern mit wisen mit ho^ultz mit veld mit wingarten vnd mit aller zůgeho^erd || mir vnd allen minen elichen kinden, so ich ietz han, knaben vnd to^vchteran ze zins lehen verlihen hant vnd ich es mir vnd allen minen elichen kinden von inen enpfangen han mit so^elicher beschaidenhait vnd mit der gedinge, daz ich vnd minú kind daz selb gůt getrúlich vnd vngeuarlich wol buwen vnd in rehtem bu vnd in eren haben sont dem gůt vnscha^edlich vnwůstlich, vnd besunder den wingarten, der zů dem gůt ho^eret, wa daz no^vtdúrftig ist, da sont wir fúr sich an lebend reban in legen vnd ja^erlichen den bu, waz úber den wingarten ho^eret, von buwes wegen, es sig ho^vwen graben mit dem messer ald mit andren sachen, daz sont wir allez tůn vnd volbringen ze den ziten vnd in dien stunden, als es dem wîngarten aller nutzlicho^vst ist, an alle geua^erd, an allen schaden miner vorgenanten frowen, vnd von dem selben gůt sont wir inen alle ja^erliches ze zins geben den dritten aimer dez wines, v´berho^vpt waz in dem wingarten ie wirt vnd wir erbuwen haben, an alle minrung, vnd sont inen o^vch den win an fúrzug geben vnd weran jegliches jares, so wir wimnent, in dem torgel vnder der rennen an var. Vnd ist berett vnd gedingot, bescha^eh daz wir den bu dez wingarten dehains jars versumdin an dem bu vnd ain missbu von v´ns bescha^eh ald daz wir den wingarten nút besserotin mit inlegen der reban, als vor ist beschaiden, welhes jars daz beschiht vnd beschehen ist vnd die vorgenanten mîn frowen ald ir amtlút dunkent vnd sprchent^b), daz ain missbu beschehen si, so han ich von minen vnd von miner kind wegen darzů geben vnd gesetzet die beschaidenn manne Hainrich Ma^erkis vnd Hainrich Lopis vnd die egenanten min frowen von ir wegen Hilprant den amman vnd Berchto^vlt Stainlin, die vier sont dann darzů gan, wenn sú den missbu an sú bringent vnd vordrent, daz ain missbu beschehen si, vnd sont den bu besehen vnd scha^etzzen, vnd ist danne, daz die vier ald daz mer vnder in sprechent vnd sich erkennent, daz ain missbu beschehen si, welhes jars daz ist, so sol ich vnd minú kind den nutz, so wir vff dem gůt vnd wingarten dez jars erbuwen haben, ab dem gůt zúhen vnd nemen, als dez landes sitt vnd gewonhait stat vmb a^endrú gu^eter, vnd dien egenanten frowen iren zins dauon rihten vnuerzůgenlich an wider rede, vnd sol danne daz vorgeschriben gůt mit dem wingarten vnd mit aller zů geho^erde vnd o^vch mit allem reht ledklich ledig vnd los sin an irrung. Vnd waz sich o^vch die vorgenanten vier man ald daz mer vnder in erkennent vnd dar vmb vssprechent, daz wir inen fúr den missbu ze besserung geben vnd tůn so^elint, daz sont wir inen o^vch an fúrzug weran vnd vsrihten an widersprechen. Gieng o^vch vnder den vorgenanten vier mannen dehainer ab ald daz sú alle ald dehainer vnder in zů der scha^etzzung dez buwes nút komen wo^elten, wenn sú von den vorgenanten minen frowen darumb angeru^eft werdent, so sont vnd múgent die selben min frowen ainen andern schidlichen buman, dem darumb ze wissenn ist, darzů geben vnd erwellen, vnd sol o^vch vff dem stan vnd beliben in aller wise vnd in allem dem rehten, als es vff dien stůnd vnd gesetzt waz, die abgangen sint vnd dar zů nút ko^vmen wolten, als vor ist beschaiden, an alle geuer. Die egenanten min frowen sont mich no^vch minú kind von dem gůt nút sto^vssen noch an dem zins nit hora triben durch kainer sach willen noch vmb meres zinses, alle die wile wir inen den vorgeschriben zins verrihteklich vsrihtent vnd kainen missbu nút getan haben, als vorgeschriben stat. Vnd ze ainer warhait vnd sta^eter sicherhait aller diser vorgeschribner ding vnd gedingde haben wir die vorgenant a^ebtischinne vnd der conuent gemainlich gebetten den edelen v´nsren gna^edigen herren herr Albrehten von Bussnang friie vnd ritter, daz er sin insigel fúr v´ns gehenket hat an disen brief. Ich Albreht von Bussnang friie vnd ritter da vorgenant vergich och offenlich an disem brief, daz ich von ernstlicher flissiger ba^ett wegen der vorgenanten ersamen frowen der a^ebtischinne vnd dez conuentz ze Maggenowe min insigel offenlich mir vnd minen erben vnscha^edlich fúr sú gehenket han an disen brief. Der geben ist ze der Núwen Burg in dem jar, do man zalt von go^vttez gebúrt drúzehenhundert jar, sehzig jar, dar nach in dem núnden jar, an dem na^echsten mentag vor sant Thomas tag.

Source Fulltext: Chartularium Sangallense VIII, Nr. 5206a, S. 390-392.