Allen den, die disen brief ansechent oder ho^erent lesen, kúnde ich Johans von Langenhart vogt ze Raprehschwil¹ von des guo^et||lis wegen, dz heiset Batzenbergs schůposs, dz ze Vegschwil² gelegen ist vnd von mir lechen ist vnd manlechen ist, dz selbe gu^etli hatte || ich gelichen nach lechens recht Heini Peter ab Gúntersperg³, dz selbe gu^etli hat der selbe Heini Peter verko^vffet vnd ze ko^vffen ge||geben den erberren knechten Růedgern vnd Burkart Sigristen gebrůdern von Vegschwil vnd allen iren erben mit akkern mit wisen mit weg mit steg mit wasser rúnsen mit flússen mit grunt mit grad mit wunn mit weide vnd mit allem dem rechte, so dar zů geho^erde, vmb achtzechen lb. pfenning Zúricher gůter vnd geber, dero er von in gantzlich gewert ist vnd in sinen elichen nutz gekert hat, vnd hat der selbe Heini Peter dz selbe gůetli mir dem obgenanten Johans von Langenhart vff geben an min hand vnd hat mich da mit gebetten, dz ich dz egenant gůetli liehe den obgenanten Růegern vnd Burkart Sigristen, vnd des han ich angesechen sin ernsthaft bete vnd han es von im vff genomen vnd han es vorgenanten Růedgern vnd Burkartten geliehen nach lechens recht vnd lieh in es mit disem brief in allem dem recht vnd in aller der wise, als ich es dem vorbenempten Heini Peter geliehen hatt, mir vnd minen erben an miner manschaft vnschedlich. Vnd des ze offenem vrkúnd so han ich der obgenant Johans von Langenhart min eigen insigel gehenket ze merer sicherheit an disen brief, der geben wart des jares, do man zalt von gottes gebút^a) drúzechen hundert jar, dar nach in dem sibenzigosten jar, an dem zinstag in der oster wuchen. Ich o^vch der obgenant Heini Peter vergiche einer warheit alles, so hie vor von mir geschriben stat, vnd won ich eigens insigels nit enhan, so binde ich mich vnd alle min erben vnder des obgenanten Johans von Langenhart mines herren insigel.

Source Fulltext: Chartularium Sangallense VIII, Nr. 5218, S. 407.