Eberhardus dei et apostolice sedis gracia abbas Augie Maioris¹ ordinis sancti Benedicti sedi apostolice inmediate subiecti Const(anciensis) dyocesis omnibus || et singulis, quorum interest vel quos presens tangit negocium vel tangere poterit quomodolibet in futurum, quibuscumque nominibus censeantur, ac || eciam omnibus et singulis personis ecclesiasticis, ad quarum noticiam presentes littere pervenerint, prelatis rectoribus plebanis et altaristis per civitatem || et dyocesim Const(anciensem) et presertim in decanatu rurali apud sanctum Gallum ubilibet constitutis salutem et mandatis nostris ymo verius apostolicis firmiter obedire. Noveritis nos litteras sanctissimi in Christo patris ac domini domini Vrbani digna dei providencia pape quinti non rasas non cancellatas nec abolitas nulla quoque sui parte viciatas sed omni prorsus suspicione carentes bulla plumbea ipsius domini nostri pape filo canapis ad modum Romane curie bullatas ea qua decuit reverentia recepisse, quarum litterarum apostolicarum tenor secundum principium et finem sie est: Vrbanus episcopus servus servorum dei dilecto filio abbati monasterii Augie Maioris Const(anciensis) dyocesis salutem et apostolicam benedictionem. Sua nobis dilecti filii etc. Finis vero sic: Quocirca discrectioni tue per apostolica scripta mandamus, quatinus sentenciam ipsam, sicut est iusta, facias auctoritate nostra appellatione remota firmiter observari. Datum Rome apud sanctum Petrum, II. idus novembris, pontificatus nostri anno VIII°.² Visis quoque dictis litteris earumque tenorem prospeximus diligenter, contenta quoque in eis maturo ponderavimus consilio sagaciter et attente ac ad earum execucionem tamquam obedientie filius procedentes litteras reverendi in Christo patris ac domini domini Heinrici episcopi Const(anciensis)³ sentenciam seu declaracionem, de qua in dictis litteris apostolicis fit mentio, continentes, nobis cum dictis litteris apostolicis presentatis ac porrectis etiam de verbo ad verbum perlegimus recensivimus ac consideravimus ipsiusque sentencie seu declaracionis processum etiam episcopali et maiori sigillo roboratum omni prorsus suspicione carentem invenimus, cuius etiam domini episcopi processus tenor quo ad principium et finem ac ipsius sentencie seu declaracionis verba est talis: Heinricus dei gracia episcopus Const(anciensis) omnibus presencium inspectoribus etc. Finis vero sic: Christi nomine invocato iuris quoque ordine in talibus observando servato dictam ecclesiam monasterii sentenciis interdicti a nobis seu alias auctoritate nostra ordinaria in ecclesiam parrochialem sancti Laurencii⁴ predictam et eins parrochiam latis et inantea ferendis affectam et ligatam hactenus non fuisse et etiam inantea non affici nec ligari. Ipsiusque monasterii sancti Galli conventuales et alios ad observanciam eiusdem interdicti in dicta ecclesia monasterii sancti Galli astrictos non fuisse nec esse declaramus et pronunciamus hiis in scriptis adhibitis in premissis sollempnitatibus debitis et consuetis. In quorum omnium testimonium sigillum nostrum episcopale presentibus mandavimus appendi. Datum Const(ancie) anno domini M°.CCC°.LX° septimo, III° kln. augusti, indictione quinta⁵. Quibus sic ut premittitur peractis per partes ipsas in dictis litteris apostolicis nominatas a nobis fuit humiliter supplicatum, quatinus ad executionem dictarum apostolicarum litterarum secundum formam mandati nobis facti et ad confirmationem dicte sentencie seu pronunciationis in litteris domini episcopi Const(anciensis) predictis contentis^a) procederemus. Nos vero in hac parte secundum apostolicum mandatum eorum peticioni annuentes et quia etiam a dicta pronuntiacione domini episcopi predicti a nullo extitit appellatum sed dudum transivit in rem iudicatam, adhibitis ad hoc sollempnitatibus debitis et conswetis iuris quoque ordine observato habito etiam super hoc iurisperitorum consilio necnon et matura deliberacione previa Christi insuper nomine invocato dicimus decernimus et diffinimus declaramus etiam per presentes dictam sentenciam declaracionem seu pronuntiacionem dicti domini Heinrici episcopi Const(anciensis) iustam esse ac in iure fundatam ipsumque dominum episcopum predictum in dicta pronuntiacione bene processisse rite et legitime diffinitive pronunciasse. Unde secundum apostolicum nobis in hac parte factum mandatum dictam pronuntiacionem sentenciam et declaracionem apostolica auctoritate confirmamus roboramus ac inviolabiliter ab omnibus clericis et laycis sicut iustam et legitimam observandam fore eadem auctoritate ostendimus et mandamus presencium per tenorem. Nichilominus etiam in virtute sancte obedientie omnibus et singulis rectoribus plebanis curatis ac clericis, cuiuscumque status seu eminencie existant, precipimus, quatinus dictam pronuntiacionem domini episcopi predicti sie a nobis ut premittitur auctoritate apostolica confirmatam publice in cancellis presente populo pronuncietis, sicut est iusta et quia iusta est, a nobis dicta auctoritate confirmatam universosque et singulos clericos et laycos tamquam obedientie filios deinceps ad observacionem eiusdem pronunciacionis apostolica auctoritate artius esse astrictos ad omnium et singulorum supradictorum noticiam deducentes, quod nisi dictis nostris ymo verius apostolicis paruerint mandatis cum effectu, contra eos et eorum quemlibet, sicut ordo iuris dictaverit, per sentencias ecclesiastice censure procul dubio procedemus. In quorum omnium testimonium et roboris firmitatem sigillum nostrum abbatiale presentibus duximus appendendum. Datum in monasterio nostro predicto anno domini millesimo CCC°.LXX°, VI. idus ianuarii.

Source Fulltext: Chartularium Sangallense VIII, Nr. 5207, S. 392-394.