Wir Geori von gottes gnâden abt des gotzhus ze sant Gallen¹, das ân alles mittel zůgeho^ertt dem stůl ze Ro^vm, veriehen vnd tůn kunt mit disem brief || allen, die in ansehent lesent oder ho^erent lesen, daz fúr v´ns kament die erbern Johans von Niderwille² vnd Johans Wolfartzwis³ vnd ofnoten || da vnd sprachen, daz sú mit gůter vorbetrahtung von ir redlichen nôt wegen redlich vnd reht verko^vffet hettin das gůt, das man nemmet || an der Wis⁴, gelegen entswúschent des Schaiien wis vnd Bisahus⁵ vnd ainhalb sto^vsset an die Hůb⁶ vnd andrenthalb an Beretzrúti⁷, mit allen rehten nútzen vnd gewonhaiten vnd mit aller zůgeho^erd, das von v´ns vnd vnserm gotzhus ir lehen was, vnd hettin ze ko^vffenn geben dem erbern Johansen Straiff burger ze sant Gallen vnd sinen erben vmb drissig pfund vnd vmb zwai pfund pfenning gůter Costentzer múns, der sú o^vch gantzlich von im wa^erin gewert an den stetten, da sú irn from mit geschaffet hettin, vnd wo^eltin o^vch das selb gůt dem selben Johansen Straiffen vfgeben vnd vertgen vnd baten v´ns ernstlich, daz wir das vorgeschriben gůt von inen vfna^emin an v´nser hand vnd das selb gůt dem vorgenemten Johansen Straiffen lihen ze rehtem lehen, do erhorten wir ir ernstlichen be^at vnd haben das vorgeschriben gůt mit allen rehten nútzen vnd gewonhaiten vnd mit aller zůgeho^erd dem vorgenemten Johansen Straiffen reht vnd redlich verlihen vnd lihen im mit disem brief ze rehtem lehen, vnd entzigen sich o^vch do ze stett die vorgenemten Johans von Niderwille vnd Johans Wolfratzwis vnd entzihent sich mit disem brief fúr sich vnd fúr alle ir erben gen dem selben Johansen Straiff vnd gen allen sinen erben aller aigenschaft aller lehenschaft aller manschaft aller gewer alles rehten gaistliches vnd weltliches gerihtes aller vordrung vnd ansprach, so sú zů dem vorgeschribenn gůt baid gemainlich oder dewedrer sunderlich hatten oder hernach gewinnen mo^ehtin von reht oder von gewonhait oder von dehainen andern sachen, die selben Johans von Niderwille vnd Johans von Wolfratzwis hant o^vch gelopt fúr sich vnd fúr alle ir erben, des selben gůtes vnd des ko^vffes reht wern ze sinne nach dem rehten gen ma^englichem vff gaistlichem vnd vff weltlichem geriht, wa ald wenn ald wie dik sin der selb Johans Straiff oder sin erben bedurfent vnd nôtdurftig sint ald darumb von ieman vfgetriben vnd angesprochen werdent, daz sú si darumb ân allen iren schaden verstân vnd versprechen sont vnd von der ansprach entrihen vnd ledig machen ân geua^erd. Vnd ist dis alles redlich vnd reht beschehen vnd vollefu^ert mit allen den worten werken vnd geta^eten, so nach gewonhait vnd nach reht darzů gehorten vnd notdurftig waren^a) vnd alz reht sitte vnd gewonlich was. Vnd des ze ainer warhait henken wir v´nser insigel an disen brief, darnâch veriehen wir die vorgenemten Johans von Niderwille vnd Johans Wolfratzwis ain gantz warhait aller diser vorgeschriben ding vnd daz alles das war ist, das der erwirdig v´nser gna^edigen herre abt Geori dauorgenemt von v´ns veriehen hât an disem brief, vnd ze merer sicherhait der selben ding henk ich Johans von Niderwille dauorgenemt min insigel an disen brief, vnder des selben Johansen von Niderwille insigel ich Johans Wolfratzwis dauorgenemt mich willeklich verbunden han vnd bind mit disem brief, won ich aigens insigels nút enhan. Der geben ist ze Wil⁸ an der na^ehsten mitwochen vor sant V^olrichs tag in dem jar, do man zalt von gottes gebúrt druzehenhundert jar vnd darnach in dem sibentzigosten jar.

Source Fulltext: Chartularium Sangallense VIII, Nr. 5231, S. 418-419.