Allen^a) den, die disen brief ansehent oder ho^erent lesen, kúnd vnd vergich ich Wernher von Búttikon¹ ritter, daz ich recht vnd redlich ze ko^vffenn gegeben han von || mir vnd minen erben Johans Stieber schulth(ais) ze Aro^vw² vnd sinen erben dise nachgeschriben gu^eter, des ersten den kelrehoffze Ko^ellikon³, die vogtye, daz || meiier ampt ze Ko^ellikon mit allen schůppossen gu^etern Zinsen nútzen vnd zůgeho^erden, so dar zů geho^erent nu vnd hie nach vnd ia^erlich geltend ze zinse || zwei vnd zweintzig malter dinkeln eis viertels minder, zwelf malter habern vnd ein viertel, zehen viertel kernen, ein phunt pfenningen vnd vier schilling vnd vier pfenning, achtzig stuffel hu^enr, sechs vnd viertzig vasnacht hu^enr, dar zů twing vnd ban vnd dú gerichte, als ich si da har bracht han in dem selben dorf ze Ko^ellikon, dar zů alle wa^elde ho^eltzer velde vnd geuilde, wa si gelegen sint, si sigen klein vnd gros, die in den vorgenanten getwing ze Ko^ellikon geho^erent, mit wasser vnd wasserrúnsen vnd mit der sagen ze Ko^ellikon, dar zů die gu^eter, von dien man git ze zinse, die man heisset sunder haber, dar zů alle die gu^eter akker matten húser hofstetten, genemtes vnd vngenemtes besetztes vnd vnbesetztes, mit allen rechten nútzen zinsen vnd zůgeho^erden, so dar zů geho^eret oder geho^eren mag nu oder hie nach, es si funden oder werde noch funden, als ich es har bracht han vnd genossen han vntz vff disen húttigen tag, als diser brief geben ist. O^vch hab ich im in disen vorgeschoben ko^vff gegeben dis nachgeschriben lúte, die gesessen sint ze Ko^ellikon in dem getwing, des ersten Heinrich Swab, Claus Swab, Ru^edin Banwart vnd sin wib, Ru^edin Kúbeler, Weltin Go^esker, der o^vch in disen ko^vff geho^eret, Jennin Seiler, Cu^entzin Seiler vnd sin wib, Peter Ieglis vnd Heinrich von Zetzwile⁴, dise vorgeschriben lúte vnd gu^eter alle vnd ieklichs besunder twing ba^enne vnd gerichte wa^eld ho^eltzer veld vnd geuilde mit allen iren zůgeho^erden hab ich dem vorgenanten Stieber vnd sinen erben gegeben fúr lehen von dem erwirdigen herren dem abbte des gotzhus von sant Gallen. O^vch han ich im gegeben des berges drig teil, den man nemmet O^etlisberg⁵, vnd ist der berg eigen, vnd han dar vmb enphangen von dem egenanten Stieber achthundert guldin gůter vnd gena^emer vnd vollen swa^erer an der gewicht, dero ich von im gar vnd gantzlich gewert vnd bezalt bin, als ich vergich an disem brief. Vnd dar vmb entzihe ich mich fúr mich vnd min erben alles des rechten, so ich ie dar an gewan oder ich ald min erben noch gewinnen mo^echten, vnd setzzen den dikgenanten Stieber in nutzlich gewer der vorgeschriben lút vnd gu^eter mit allen iren zůgeho^erden ru^ewklich ze besetzzenn vnd ze entsetzzenn ze habenn vnd ze niessenn, als ein man sin lehen billich niessen vnd haben sol vnd als ich es vntz har genossen han, ane alle geua^erde. Ich lob o^vch fúr mich vnd min erben, wider disen ko^vff niemer ze tůnne noch schaffen getan weder mit worten noch mit werken noch mit gericht noch ane gericht, si sigen geislich oder weltlich, noch mit enkeinen sachen, die ieman erdenken kan oder mag, ane alle geua^erde. Were o^vch, daz dem vorgenanten Stieber oder sinen erben dise vorgeschriben lúte vnd gu^eter alle oder keines besunder anspra^echig wurde von ieman mit geislichem oder weltlichem gerichte oder ane gericht vnd si der ansprach ze schaden ka^emen, den schaden lob ich fúr mich vnd min erben im vnd sinen erben vff ze richten vnd ab ze leggenne gar vnd gantzlich ane alle geua^erde, wenne es an mich oder an min erben geuordert wird. Ich lob o^vch fúr mich vnd min erben, dem egenanten Stieber vnd sinen erben diser vorgeschriben lúten gu^etern twingen ba^ennen wa^elden ho^eltzern velden vnd geuilden mit allen iren zůgehorden recht were ze sin fúr lehen, als vorgeschriben stat, an allen den stetten, da si werschaft notdurftig sint vnd es an mich oder an min erben geuordert wird, ane alle geua^erd. Har vmb daz dis alles war sta^ett vnd vnlo^vgenhaft belib nu vnd hie nach, hab ich obgenanter Wernherr von Búttikon min ingesigel offenlich fúr mich vnd min erben gehenkt an disen brief. Hie bi waren herr Johans von Kienberg⁶ ritter, herr Jacob Zúricher kilcherr ze Bremgarten⁷, Claus Zehender, Heinrich Sumer, Berchtold Zúricher, Henman Trúllerey, Růdolf Grauo, Johans Bleicher burger ze Aro^vw vnd ander erber lút. Dis beschach vnd wart diser brief geben ze Aro^vw in der statt an dem nechsten fritag vor sant Johans tag ze súngichten des jares, do man zalte von gottes gebúrte drúzehenhundert jar vnd sibentzig jar, dar nach in dem ersten jare.

Source Fulltext: Chartularium Sangallense VIII, Nr. 5282, S. 480-481.