Allen^a) den, die disen brief an sehent oder ho^erent lesen, kúnden wir Peter vnd Frik vnd och Cůnrat die Fu^egerr von Swarzenbach¹ gebrůder || vnd veriehen offenlich mit disem brief fúr v´ns vnd fúr alle v´nser erben vnd och fúr Annen v´nser swo^ester, das wir mit gůter beschaidenhait || vnd vorbetrahtung ainhelklich mit bedahtem můt mit den erwirdigen gaistlichen frôwen der abtischinnen vnd den vrowen gemainlich || des closters ze Maggnôw² mit allen iren amtlúten mit allen iren lúten vnd mit aller mainglichem von ir wegen vmb alle die sto^es misshellung vnd vmb alle die reht vordrung vnd ansprach, so wir mit inan vnd zůz inan vntz vff disen húttigen tag, als dirre brief geben ist, ie gehebt^b) vnd gewunnen haben, wie vnd in weihen weg vnd wise ald von welher lay sach die sto^es vfgestanden vnd vfgeloffen sint, gar gantzlich vnd och lieplich nah allem v´nserm willen verrihtet sint, won sú v´ns darumb vnd dafúr geben hant zehen schilling pfenning gůter Costentzer múns, der wir gar vnd gantzlich von in sint gewert vnd bezalt, vnd darumb so hant wir alle driie gelobt mit v´nsren trúwen in aydes wise fúr v´ns vnd fúr v´nser erben vnd tro^esten och des fúr die egenanten Annan v´nser swo^ester, das wir noch ainkain v´nser erben noch nieman andrer von v´nsren wegen noch an v´nser stat die vorgenanten frowen ze Maggnôw noch ir nahkômen noch ir closter noch ainkain ir lút noch amtlút noch nienmannen andrer von ir wegen von der selben vorgeschriben sto^es vnd ansprach wegen niemer me súllent noch wellint angriffen ansprechen vftriben bekúmberren noch bekrenken noch in ainkain wîs noch weg beswa^erren weder mit worten noch mit werken vff gaistlichem noch vff weltlichem geriht noch ân reht noch mit ainkainer lay andren sachen. Vnd herúber ze ainer gantzen warhait aller diser vorgeschribner ding vnd rihtung, das die sicher vnd sta^et si vnd vnwandelber belib nv^ vnd hernah, won wir dann aigener insigel nút haben, so hant wir mit gantzem ernst erbetten den frommen vesten junkherr Lútolt den Schenken von Landeg³, das er sin insigel fúr v´ns gehenket hat an disen brief. Ich Lútolt der Schenk da vorgenant vergih och an disem brief, das die vorgenanten Peter, Frik vnd Cůnrat die Fu^egerr dirre vorgeschriben sach vnd rihtung offenlich vor mir veriehen vnd volfu^ert hant, vnd von ir aller driier ernstlichen ba^ett wegen han ich min insigel fúr sú offenlich mir in dirre sach vnschadelich gehenkt an disen brief. Der geben ist ze Wil⁴ in der stat an sant Peters abent, do man zalt von gottes gebúrt drúzehenhundert jar, darnah in dem zway vnd sibentzigosten jar.

Source Fulltext: Chartularium Sangallense VIII, Nr. 5322, S. 512-513.