Allen^a) den, die disen brief an sehent oder ho^erent lesen, kv´nden wir Johans von Eppenstain¹ vnd Anna sin elichi swo^ester Růdolf des Asters elichi frôw vnd veriehen || offenlich mit disem brieue, das wir von dem beschaidenn kneht Hylpolten von Wittenwille² burger ze Wil³ enpfangen vnd in genomen habin fúnf gůter || guldin, die er v´ns geben vnd bezalt hat fúr alle die sto^ez vnd ansprach, so wir mit im vnd zůz im vntz vff disen huttigen tag, als dirre brief geben || ist, gehebt habin gemainlich oder dewedres besunderlich, vnd mit namen vnd sunderlich fúr alle die reht vordrung vnd ansprach, so wir ie gehebt habin an vnd zů der múli vnd múlistat ze Mos⁴ gelegen zwischent Gundoltzhusen⁵ vnd Maistershusen⁶ vnd zů allen iro rehten nútzzen vnd gewônhaitten ehafti vnd zůgeho^erden, die der vorbenemt Hylpolt von Wittenwille in rehtes wehsels wise geben vnd braht zů handen vnd wegen der erwirdigen gaistlichen frowon in got der a^ebtischinnen vnd des conuentes gemainlich des gotzhus ze Ta^ennikon⁷, vnd darumb so haben wir v´ns mit gůter gewisseni vnd vorbetrahtung wilklich vnd frilich bedú gemainlich vnd ietwedres besunder v´ns vnd alle v´nser erben vnd nachkommen verzigen vnd verzihen v´ns mit disem brieue gen dem vorgen(an)ten Hylpolten von Wittenwille vnd gen allen sinen erben der vorgeschriben sto^ez vnd ansprach, so wir vntz vff disen húttigen tag, als dirre brief ist geben, mit im vnd zůz im gehebt habin, vnd mit namen vnd sunderlich gen den vorbenemten frowen gen iren nâhkomen vnd gen irem gotzhus vnd och gen dem selben Hylpolten von Wittenwille vnd gen allen sinen erben aller der reht vordrung vnd ansprach, so wir von kainer lay sach vnd ansprach wegen an der zů der vnd von der vorgeschriben múli vnd múlistat wegen vntz her gehebt habin ald noch hinnenhin iemer gehan vnd gewinnen in dehain wis mo^ehtint von reht ald von gewonhait. Wir haben och ainmu^eteklich von aigenem willen gelobt mit gůten trúwen fúr v´ns fúr alle v´nser erben vnd nâhkomen, die wir vesteklich herzů binden, das wir noch nieman andrer von v´nsren wegen noch an v´nser stat die vorgeschriben múli vnd múlistat noch och die vorbenemten gaistlichen frowen noch ir nahkomen noch ir gotzhus noch och den vorbenemten Hylpolten von Wittenwille noch ainkain sin erben von der selben múli vnd múlistat wegen noch von ainkainer vorgeschriben sto^ez vnd ansprach wegen niemer me súllent noch wellint ansprechen vftriben bekumberren bekrenken noch in ainkain wis noch weg beswa^erren weder mit reht noch ân reht noch mit ainkainen andren sachen. Vnd herúber ze ainer warhait aller vorgeschribener ding vnd gedingd haben wir Johans von Eppenstain vnd Anna sin elichi swo^ester da vorg(enant) v´nsri insigel fúr v´ns vnd fúr alle v´nser erben vnd nahkommen offenlich gehenkt an disen brieue. Der geben ist ze Wil in der stat an sant Martis abent, do man zalt von gottes gebúrt drúzehenhundert jar, darnach in dem zway vnd sibentzigosten jar.

Source Fulltext: Chartularium Sangallense VIII, Nr. 5329, S. 519-520.