Allen^a) den, die disen brief ansehent lesent oder ho^erent lesen, kúnden wir Êglolf von Roschach¹ ritter vnd Êlzbethe min êliche || wirtenn her Růdolfs sa^eligen von Rinegge² êliche dohter vnd veriehint offenlich mit vrkúnd dises brieues, das wir || baydú gemainlich ze ko^vffenn geben habint fúr v´ns vnd v´nser êrben aines rehten redlichen êwigen ko^vffes dem vesten || ritter her Hainrich von Helmenstorf³ vnd sinen êrben v´nser burg A^eppishûsen⁴ mit aller zů geho^erde vnd alles das, das ich dú vorgenemt Elsbethe von minem vatter herr Růdolf sa^eligen von Rinegge geêrbt han, es sîe lút ald gůt, wie das genant ald gehaissen ist, es sie aygen oder lehen, vnd mit namen den pfantschatz v´nsern dritten taile der quart ze Sumbri⁵, als die ko^vff brief wol wîsent, die er von v´ns dar vmb hât, vnd habint im baydú vnd jêtweders besunder geswôrn ainen gelêrten ayde ze den hailgon mit v^fgehabnen handen vnd mit gelêrten wôrten fúr v´ns vnd v´nser êrben, die selben lút vnd gu^eter a^ellú ze vertigenn vnd v^f ze gebenn, wie er ald sin êrben des nôtdurftig sint, nâch des landes gewonhait, âne alle geua^erde, das aygen fúr aygen, das lehen fúr lehen, vnd den pfantschatz ze sinen handen ze bringenn, von dem er v´nser pfant ist, hinnan ze v^s ga^ender osterwûchen der na^ehsten, so nû kumpt nach dem tag, als dirre brief geben ist. Es wa^ere dann, das es sich âne geua^erde verzûge, so hett der vorgenant her Hainrich von Helmenstorf ritter ald sin êrben, ob er enwere, wol gewalt, das sú v´ns fúrbass vmb das v^f geben vnd vertgon tag mugent geben, ob sú went. Wir súllint o^vch bi den ayden, als wir geswôrn habint, dú vorgenemten lút vnd gu^eter a^ellú entrihen an allen den stetten, da sú haft sint, vnd súllint o^vch aller der lút vnd gu^eter, sú sigint aygen oder lehen, wâ die sesshaft ald gelegen sint, sú sigint benemt ald vnbenemt, als die ko^vff brief wîsent, die er von v´ns dar vmb hât, reht werne sin nach reht vnd sú verstân vnd versprechen nach dem rehten an allen den stetten, da sú des nôtdurftig sint vnd sin bedurfent, an gaistlichen vnd an weltlichen gerihten, âne allen iren schaden âne alle geuerde. Vnd des ze ainem wâren vrkúnd vnd gantzer sicherhait aller der dinge vnd gedinge, so vôr an disem brief geschriben stânt, so habin wir die vorgenemten Êglolf von Roschach vnd Elsbethe min êliche wirtenn jêtweders sin aygen insigel fúr v´ns vnd v´nser êrben offenlich gehenkt an disen brief. Der geben ist ze Byscho^vffcelle⁶ in der stat an dem na^ehsten frytag nach sant Othmars tag in dem jâr, do man zalt von Cristus gebúrt drútzehenhundert jâr, sibentzig jar vnd dar nach in dem andern jâre.

Source Fulltext: Chartularium Sangallense VIII, Nr. 5330, S. 520-521.