Allen^a) den, die disen brief an sehent oder ho^erent lesen, kúnde ich Cůnrat von Sâl ze den ziten Schultheis ze Winterthur¹ vnd vergich, || daz ich ze Winterthur offenlich ze gerichte sazz, vnd kamen da in gerichte die fromen vnd erbern lúte Albr. von Lindenberg² || an einem tail vnd vro Clara vnd vro Elzbetha³ geswestran klosterfro^vwan ze Tennikon⁴ sant Bernhartz orden gelegen in Co||stentzer bystům des vorgenanten von Lindenberg swestran an dem andern tail. Vnd mit gůter vorbetrachtunge vnd mit wolbedachtem můte nam da vor dem gerichte der obgenant Albr. von Lindenberg gesunt libes sinnen vnd můtes recht vnd redlich frilich vnd vnbetwungenlich mit miner hand gunst vnd gůtem willen die vorgesprochen vro Claren vnd vro Elzbethen sin swestran ze rechten gemeindern v´ber das gůt gelegen ze Huggenwille⁵ vnd ia^erlichs gelten sol vier mútte kernen ein malter habern fúnfzig eyger vnd zehen schilling phenning gewonlicher Zúricher múntze, vnd v´ber daz gůt gelegen ze Obern Hagnegg⁶, daz o^vch gelten sol ierlichs ein mútt kernen alles Wyler⁷ messes vnd ein schilling gewonlicher Costentzer phenning, mit aller rechtunge vnd zůgeho^erde, die sin aigen we^aren vnd si vormals von dem gotzhus ze Tennikon geko^vffet hat, mit gelerten worten, als gerichte vnd vrteil gab, also mit der bescheidenheit vnd mit dem gedinge, daz die obgenanten vro Clara vnd vro Elzbetha geswestran des vorgenanten Albr. von Lindenberg rechte geme^aindere vnd tailgenossen sin sont v´ber die egeschriben zwei gu^eter mit aller zůgeho^erde, doch also, v´ber lebent sú in, so sont sú mit den selben gu^etern schaffen vnd tůn, was in fůglich ist, v´ber lebet aber er si beide, so so^ellent die egesprochen gu^eter geuallen an den ietzgenanten Albr. von Lindenberg ane aller menklichs irrunge vnd widerrede. Vnd ist dise gemeinde vor mir beschehen mit aller der ehafti vnd sicherheit worten vnd werken, so nach rechte oder von gewonheit deheins wegs dazů gehorte vnd man tůn solte vnd damit es nu vnd hie nach gůt krafte vnd hantvesti haben sol, als vor mir mit gesamnoter vrteil erteilet wart. Vnd des ze offenem vrkúnd der warheit so han ich der obgesprochen richter min insigel von des gerichtes wegen vnd als vrteil gab offenlich gehenket an disen brief. Ich der obgenant Albr. von Lindenberg vergich o^vch einer gantzen warheit aller vorgeschribener dinge, vnd des ze noch merer sicherheit so han ich min aigen insigel ze einer zúgnúste diser sache o^vch gehenket an disen brief. Der geben wart ze Winterthur an dem nechsten fritag vor sant Valentins tag, do man zalte von gots geburte tusent drúhundert achtzig jaren vnd darnach in dem andern jare.

Source Fulltext: Chartularium Sangallense X, Nr. 5890, S. 8.