Allen^a) den, die disen brief an sehent oder ho^erent lesen, kúnd ich V^olrich Kupfersmit genant Wirri¹ schulthais ze Wil² vnd vergih des offenlich mit disem brief, || daz ich offenlich ze gericht sass ze Bramschofen³ in dem dorf in miner vogty hútt dis tags, als dirr brief geben ist, vnd kam da fúr mich in gerichte die || fromen kneht an ainem taile Berschi Krinberger von Bramschofen vnd an dem andern taile Hainrich Krinberger gebrůder, vnd offent vnd veriah da der selb || Hainrich Krinberger offenlich vor mir in gerichte mit fúrsprechen vnd sprach, daz er vnd der vorgenant Berchtolt sin brůder lieplich frúntlich vnd och gar vnd gentzlich getailt hettint reht vnd redlich allez das ligendes vnd varendes gůt, so si von vatter oder von můter ie an geuallen wa^eri vnd inen gelâssen hettint, vnd och alles daz ligend vnd varend gůt, so si sust ie erworben vnd v´berkomen hettint bis her vff disen húttigen tag, alz dirr brief ist geben, wa daz gelegen vnd wie daz genant wa^eri, vnd daz er sines tailes, so im an ligendem vnd an varendem gůt von dem selben sinem brůder ze tail worden wa^eri, gentzlich bewiset vsgericht vnd bezalt wa^eri nach allem sinem willen, vnd das der selb Berchtolt sin brůder sin rehter getauter brůder wa^eri vnd sin solti nv^ vnd hernach an ligendem vnd an varendem gůt, er hetti es ietz oder er gewunne es hernach, vnd so ferre daz er noch kain sin erben noch nieman andrer von ir wegen den selben Bertschin Krinberger noch sin erben vmb ainkainen tail noch gemainschaft weder von ligendes noch varendez gůtes wegen niemer me súllent noch wellent ansprechen vftriben bekúmberren noch bekrenken weder mit reht noch ân reht noch mit enkainen andren sachen vngeuerlich, vnd nach dem do offent vnd veriah och do der selb Hainrich Krinberger ze stund mit fúrsprechen vnd sprach, daz er von siner kumberhafti vnd redlichen not wegen von dem selben Bertschin Krinberger sinem brůder enpfangen vnd in genomen hetti fúnf pfunt vnd zehen schilling pfenning alles gůter vnd gena^emer Costentzer múns, dero er aller gentzlich vnd gar von im wa^eri gewert vnd bezalt an den stetten, da ers in sinen offenn gůten nûtz geben vnd bewendet hetti, vnd vmb die selben pfenning hetti er dem selben Bertschin sinem brůder vnd sinen erben fúr sich vnd fúr alle sin erben ze koffenn geben ains rehten besta^eten jemer werenden kofs dis nâhgeschriben akker gelegen ze Bramschofen in dem bann, da ich vogt vnd herr v´ber bin vnd die im von dem vorbenemten sinem brůder ze tail worden vnd geuallen wa^erint, den akker gelegen an Gerwigs Lo, stosset an die wisan vnd an des Widmers bongarten, den akker, den man nemt der Stainru^esseller vnd dem man och spricht der Anwander, vnd den akker gelegen vnder dem burgstal an Peters Zimbermans sailigen akker mit allen rehten nútzzen vnd zůgeho^erung der selben akker, vnd nach der vergiht do stůnd der selb Hainrich Krinberger dar vnd vertegot vnd gab do mit gůter vorbetrahtung mit siner hand reht vnd redlich mit gelerten worten an dez gerichtes stab, als reht was vnd mit gemainer vrtaild ertailt ward, die vorgeschriben driie akker mit allen rehten nútzzen vnd mit aller zůgeho^erd letklich vnd frilich vf hin in dez vorbenemten Bertschis Krinbergers vnd in siner erben hand, vnd verzeh sich do der Hainrich Krinberger offenlich vnd frilich fúr sich vnd fúr alle sin erben in gerichte hin in dez vorbenemten Bertschis Krinbergers sines brůders vnd in siner erben hand vnd verziht sich gentzlich gar vnd reht vnd redlich mit disem brief an den vorgeschriben akern mit aller zůgeho^erd aller aigenschaft aller manschaft aller lehenschaft aller kuntschaft aller besatzzung aller zúgnust aller gewêr lút vnd brieue aller vordrung vnd ansprach alles rehtes gaistlichs vnd weltlichs gerichtes aller gemainschaft vnd taile vnd aller der ander sach vnd geuerden, da mit er oder sin erben oder jeman andrer von ir wegen vnd an ir statt die selben akker alle oder dehainen besunder gantz oder an dekainem taile nû ald hernach kúndint angesprechen ald da mit si den selben disen koffe vertegung vnd vfgebung vnd dis sach wider ru^effen wider bringen abgetriben ald ze niht schaffen ald machen mo^ehtint in dehainen weg vngeuerlich. Der selb Hainrich Krinberger hât och gelobt in gerichte fúr sich vnd fúr alle sin erben, der vorgeschriben akker mit aller zůgeho^erd, vnd och des redlichen kofs reht wer ze sinne dez vorgenanten Bertschis Krinbergers vnd siner erben nach reht gen mainglich vff gaistlichem vnd vff weltlichem gericht, wenn wa vnd wie dik si dez bedurfent vnd notdurftig sint, ân geuerd. Vnd dez vnd hierúber ze ainer besta^eten wârhait aller vorgeschribner ding gib ich V^olrich Kupfersmit schulthais da vorgenant dem vorbenemten Bertschin Krinberger von siner vordrung wegen disen brief darüber versigelt vnd besta^etet mit minem insigel von dez gerichtes wegen mit rehter vrtaild, doch also mir vnd minen erben an v´nsren stúren diensten vnd allen v´nsren rehten in dirr sach gentzlich vnscha^edlich. Dirr brief ist geben do selbs ze Bramschofen an der na^ehsten mitwochen vor v´nser frowen tag ze der liehtmis, do man zalt von gottez gebúrt drúzehenhundert jar, ahtzig jar, darnach in dem andern jar.

Source Fulltext: Chartularium Sangallense X, Nr. 5889, S. 6-7.