Ich^a) Nycolaus von V^otzzingen¹ custer dez gotzhus ze sant Gallen tůn kunt vnd vergich offenlich mit disem brief || allen, die in sehent lesent oder ho^erent lesen, daz fúr mich kament ze sant Gallen in minem hof an dem na^ehsten ma^en||tag vor mittem maijen, do ich offenlich ze geriht saz, diz nachgenemten erberen lút Elzbeth Růdolf Wartenbergs || sa^elgen wilunt burgers ze sant Gallen eliche wirtinne vnd Hainrich Wartenberg ir êlicher sun vnd offenotent mit fúrsprechen offenlich vor mir an gemainem geriht vnd sprachent, daz sv´ baidú gemainlich mit ainberem willen mit gůter vorbetrahtung vnd von iro redlicher nôt wegen die alpp, die man nemmet Meglis alpp², gelegen ze Appacelle³, die ainhalb stosset an die alpp, die man nemmet Wider alpp⁴, mit allen rehten nútzzen vnd gewonhaiten vnd mit aller zv^o geho^erde, die von mir iro lehen wa^er, redlich vnd reht aines sta^eten êwigen ko^vffes verko^vft vnd ze ko^vffenn geben hettint den erberen wolbeschaidnen Hainrichen vnd Othmarn den Swandern gebrůdern baid burger ze sant Gallen baiden gemainlich vnd vnuerschaidenlich vnd iren erben, ob sv´ enwa^erint, vmb ahtzehen phunt phenning gůter vnd gena^emer Costentzzer múnse, der sv´ gantzlich von in gewert vnd bezalt wa^erint, vnd batent mich eruarn an ainer vrtail, wie sv´ in die vorgeschribenen alpp vertgen vnd zv^o iren handen bringen so^eltint vnd mo^ehtint, alz reht wa^er vnd daz ez kraft hett vnd haben mo^eht nv vnd o^vch hie nach. Daz tet ich vnd ward ertailt mit gemainer vrtail, daz die vorgenant Elzbeth ainen vogt nemen so^elt an dem ring, wen si wo^elt, vnd daz si daz danne mit ir vnd mit dez selben ir vogtes handen vnd der obgenant Hainrich ir sun mit siner vnd o^vch mit miner hant tůn so^eltint, vnd daz ez danne also wol kraft vnd maht hetti nach dem rehten. Do nam si ze vogt Walthern Schúrphen den phister o^vch burger ze sant Gallen, vnd gabent da die vorgenemt Elzbeth Wartenbergin mit ir vnd mit dez selben Walther Schúrphen ir vogtes handen vnd Hainrich Wartenberg ir sun mit siner hant die vorgeschribenen alpp, die man nemmet Meglis alpp, mit allen rehten vnd mit aller zv^o geho^erde willeklich vnd frilich gantzlich vnd gar vf an min hant vnd batent mich, si lihen ze lehen den vorgenemten Hainrichen vnd Othmarn den Swandern gebrůdern. Do erhort ich iro ernstlichen bet vnd lêch den selben Hainrichen vnd Othmarn den Swandern gebrůdern vnd lich in mit vrkúnd diz brieues reht vnd redlich die vorgeschribenen alpp, die man nemmet Meglis alpp, mit allen rehten vnd mit aller zv^o geho^erde baiden gemainlich vnd vnuerschaidenlich ze lehen vnd ze ainer rehten gemainde mir vnd allen minen nachkomen vnd dem vorgeschribenen gotzhus ze sant Gallen an allen v´nseren rehten vnd gewonhaiten gantzlich vnscha^edlich. Vnd verzigent sich o^vch do die vorgenemten Elzbeth Wartenbergin vnd Hainrich ir sun offenlich vor mir vnd dem geriht vnd verzihent sich mit disem brieue gantzlich vnd gar fúr sich vnd fúr alle iro erben der vorgeschribenen alpp mit aller zů geho^erde aller aigenschaft aller lehenschaft aller kuntschaft aller gewer lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so sv´ oder iro erben an der zv^o der vnd von der vorgeschribenen alpp wegen ie gehept hant ald hienach iemer gehaben oder gewinnen mo^ehtint. Die vorgenemten Elzbeth Wartenbergin vnd Hainrich ir sun lobtent o^vch mit iren trúwen fúr sich vnd alle iro erben, der vorgeschribenen alpp mit aller zv^o geho^erde vnd dez ko^vffes reht wer ze sinne nach dez landes reht vnd o^vch die vorgenemten Hainrichen vnd Othmarn die Swander gebrůder vnd iro erben, ob sv´ enwa^erint, darumb ze versprechenn vnd ze versta^enne an allen stetten gen aller ma^englichem an allen iren schaden, wenn wa vnd wie dik sv´ darumb an gesprochen geschadgot oder vf getriben werdent mit dem rehten. Vnd ze vrkúnd der warhait aller der vorgeschribenen dinge vnd vergiht so han ich Nycolaus von V^otzzingen custer da vorgenemt min insigel mit vrtail gehenkt an disen brief. Darnach veriehent wir die vorgenemten Elzbeth Wartenbergin, Hainrich ir sun vnd Walther Schúrpf ir vogt in der vorgeschribenen sache ainer gantzzer warhait aller der dinge, so von v´ns an disem brief da vorgeschriben stant, vnd ze merer sicherhait der selben dinge so han ich Walther Schúrpf vogt da vorgenemt o^vch min insigel gehenkt an disen brief, vnder daz selb insigel wir die vorgenemten Elzbeth Wartenbergin vnd Hainrich ir sun v´ns willeklich gebunden habent, won wir aigener insigel niht habent, war vnd sta^et ze lassenn alles, daz von v´ns da vorgeschriben stat an disem brief. Der geben ist ze sant Gallen an dem vorgeschribenen ma^entag in dem jar, do man zalt von Cristus gebúrt drúzehenhundert jar, ahtzig jar vnd darnach in dem andern jare.

Source Fulltext: Chartularium Sangallense X, Nr. 5903, S. 66-68.