Ich^a) Nycolaus von V^otzzingen custer dez gotzhus ze sant Gallen¹ tůn kunt vnd vergich offenlich mit disem brieue allen, die || in sehent lesent oder ho^erent lesen, daz fúr mich kament ze sant Gallen in minem hof an der na^ehsten mitwuchen nach dez hailigen || crútzzes tag, alz ez erho^eht ward, do ich offenlich ze geriht saz, diz nâchgenemten erberen lút Hainrich vnd Othmar die Swan||der gebrůder baid burger ze sant Gallen vnd Margaretha iro elichi swester vnd offenoten da mit fúrsprechen offenlich vor mir an gemainem geriht fúr sich vnd fúr alle iro erben vnd sprachent, daz sv´ mit gůter vorbetrahtung vnd mit ainberem willen vnd von iro redlicher not wegen die alpp, die man nemmet Meglis alpp² gelegen ze Appacelle³, die ainhalb stôsset an die alpp, die man nemmet Wider alpp⁴, mit allen rehten nútzzen vnd gewonhaiten vnd mit allem dem, so von reht ald von gewonhait darzů vnd darin geho^ert, die selb alpp von mir iro lehen wa^er, redlich vnd reht aines iemerwerenden sta^eten êwigen ko^vffes verko^vft vnd ze ko^vffenn geben hettint dem erbern wolbeschaidenn Cůnrat Vogelwaider dem metzger o^vch burger ze sant Gallen vnd sinen erben, ob er enwa^er, vmb sechsú vnd zwainzig phunt vnd vmb fúnfzehen schilling gůter vnd genger haller, der sv´ gantzlich von im gewert wa^erint vnd enphangen hettint vnd an iren offenn nutz bewendet. Vnd batent mich eruarn an ainer vrtail, wie sv´ im die vorgeschribenen alpp vertgen vnd zv^o sinen handen bringen so^eltint vnd mo^ehtint, alz reht wa^er vnd daz ez kraft hett vnd haben mo^eht nv vnd o^vch hie nach. Daz tet ich, vnd ward ertailt mit gemainer vrtail, daz die obgenant Margaretha ainen vogt nemen so^elt an dem ring, wen si wo^elt, vnd daz si daz danne mit ir vnd mit dez selben ir vogtes handen vnd die vorgenemten Hainrich vnd Othmar die Swander ir brůder mit iro vnd o^vch mit miner hant tůn so^eltint vnd daz ez danne also wol kraft vnd maht hetti nach dem rehten. Do nam si ze vogt Hainricen Garnleder den schriber o^vch burger ze sant Gallen, vnd gabent do die vorgenemten Hainrich vnd Othmar die Swander gebrůder mit iro handen vnd die egenemt Margaretha iro swester mit ir vnd mit dez vorgenanten Hainrices Garnleders ir vogtes handen die vorgeschribenen alpp, die man nemmet Meglis alpp, mit allen rehten vnd mit aller zv^o geho^erde willeklich vnd frilich gantzlich vnd gar vf an min hant vnd batent mich sie lihen ze lehen dem vorgenanten Cůnrat Vogelwaider. Do erhort ich iro ernstlichen bet vnd lech dem vorgenemten Cůnrat Vogelwaider vnd lich im mit vrkúnd diz brieues reht vnd redlich ze lehen die vorgeschribenen alpp, die man nemmet Meglis alpp, mit allen rehten vnd mit aller zv^o geho^erde, mir vnd allen minen nachkomen vnd dem vorgeschribenen gotzhus ze sant Gallen an allen v´nseren rehten vnd gewonhaiten gantzlich vnscha^edlich. Vnd verzigent sich o^vch do die vorgenemten Hainrich vnd Othmar die Swander gebrůder vnd Margaretha iro swester offenlich vor mir vnd dem geriht vnd verzihent sich mit disem brieue gantzlich vnd gar fúr sich vnd fúr alle iro erben der vorgeschribenen alpp mit aller zv^o geho^erde aller aigenschaft aller lehenschaft aller kuntschaft aller gewer lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so sv´ oder iro erben an der zv^o der vnd von der vorgeschribenen alpp wegen ie gehept hant ald hie nach iemer gehaben oder gewinnen mo^ehtint. Die vorgenemten Hainrich vnd Othmar die Swander gebrůder vnd Margaretha iro swester lobtent o^vch mit iren trúwen fúr sich vnd fúr alle iro erben, der vorgeschribenen alpp mit aller zv^o geho^erde vnd dez ko^vffes reht wer ze sinne nach dez landes reht vnd o^vch den vorgenanten Cůnrat Vogelwaider vnd sin erben darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wa vnd wie dik sv´ darumb an gesprochen geschadgot oder vf getriben werdent mit dem rehten. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nach reht darzů gehortent ald ho^eren soltent vnd nôtdurftig warent vnd alz ez kraft vnd maht sol vnd mag han. Vnd ze vrkúnd der wârhait aller der vorgeschribenen dinge vnd vergiht so han ich Nycolaus von V^otzzingen custer da vorgenemt min insigel mit vrtail gehenkt an disen brief. Darnach veriehent wir die vorgenemten Hainrich vnd Othmar die Swander gebrůder, Margaretha iro swester vnd Hainrice Garnleder ir vogt in der vorgeschribenen sache ainer gantzzer warhait aller der dinge vnd gedinge, so von v´ns an disem brief da vorgsechriben stant. Vnd ze merer sicherhait der selben dinge so haben wir die vorgenanten Hainrich vnd Othmar die Swander gebrůder vnd Hainrice Garnleder vogt o^vch v´nserú insigel gehenkt an disen brief, vnder dez selben Hainrices Garnleders mines vogtes insigel ich die vorgenant Margaretha Swanderin mich willeklich gebunden han, won ich aigens insigels niht han, war vnd sta^et ze lassenn alles, daz von mir da vorgeschriben stat an disem brief. Der geben ist ze sant Gallen an der vorgeschribenen mitwuchen in dem jâr, do man zalt von Cristus gebúrt drúzehenhundert jâr, ahtzig jar vnd darnach in dem dritten jare.

Source Fulltext: Chartularium Sangallense X, Nr. 5968, S. 140-141.