Wir^a) die von Regenspurg ain fryn stat vnd ouch wir die burgermaister ra^ete vnd alle burger gemainlich der na^vchbenempten dez hailigen Ro^emischen || richs stette Augspurg, Vlm, Costentz, Eßlingen, Rútlingen, Ro^vtwil, Wile, V´berlingen, Memmingen, Bibrach, Ravenspurg, Lindo^vwe, sant Gallen, Pfullendorf, || Kemptun, Kouffbúrren, Lútkirch, Ysni, Wangen, Bůchorn, Gemúnd, Halle, Hailprunnen, No^erdlingen, Dinkelspúhel, Routenburg vff der Tuber, Winpfen, || Winsperg, Aulon, Bopfingen, Giengen vnd Bůcho^vwe bekennen vnd veriehen offenlich mit disem brief vnd tůen kunt allen den, die in ansehent oder ho^eerent lesen, alz wir mit gemainem ra^vt vnd mit gůten fúrsa^etzen die fúrsichtigen wisen die ra^ete vnd alle burger gemainlich der stett Wintzhain vnd Wissenburg dem hailigen rich ze eren vns vnd gemainem lande ze frid vnd gemach zů vns in vnsern bund ingenomen vnd enpfangen haben vnd den ouch si gesworen ha^vnt ainfa^elteclich mit v´ns ze halten nauch dez bundbrieffs lute vnd sag, den wir darvmb ain ander gegeben vnd besigelt haben, darvmb so haben wir ietzo den selben ra^eten vnd burgern gemainlich der vorgenanten stette Wintzhain vnd Wissenburg mit gůtem willen gelopt vnd versprochen vnd verhaißen vnd versprechen ouch ietzo mit krafft ditz brieffs vff die aide, die wir dem vorgenanten v´nserm bund gesworen haben, daz wir si vnd die iren getruweclich schirmen vnd ouch bera^vten vnd beholffen súllen sin na^vch dez vorgenanten v´nsers verbundbrieffs sag ze gelicher wise vnd in allem dem rechten, alz wir dez ain ander verbunden sien vnd ze samen gesworn haben vnd alz ob si mit na^emlichen worten bi v´ns in dem vorgenanten bundbrief begriffen vnd verschriben wa^eren oder den mit vns angefangen hetten, a^vne alle geverde. Mit vrkúnd ditz brieffs, den wir in dar úber besigelten geben mit der vorgenanten zwaier stett Vlm vnd No^erdlingen aignen angehenkten insigeln, die ouch die von v´nser aller haissentz wegen offenlich gehenkt ha^vnt an disen brief. Der geben ist an sant Anthonyen aubent, do man zalt von Cristz gebúrt drivzehen hundert ja^vr vnd darnach in dem dry vnd achtzigostem ja^vre.

Source Fulltext: Chartularium Sangallense X, Nr. 5944, S. 115-116.