Wir^a) die burgermaister ra^ete vnd alle burger gemainlich rich vnd arm der zwaier stette Wintzhain¹ vnd Wissenburg² bekennen vnd veriehen offenlich fúr vns vnd fúr vnser nauchkomen mit disem || brieff vnd tu^een kunt allen den, die in ansehent oder ho^erent lesen, alz sich die erbern vnd wisen die burgermaister ra^ete vnd alle burger gemainlich der stette Regenspurg, Augspurg, Vlm, Kostentz, || Eszlingen³, Rútlingen⁴, Ro^vtwil⁵, Wile⁶, V´berlingen⁷, Memmingen⁸, Bibrach⁹, Ravenspurg¹⁰, Lindo^vwe¹¹, sant Gallen, Pfullendorff¹², Kemptun¹³, Kouffbúrren¹⁴, Lutkirch¹⁵, Ysni¹⁶, Wangen¹⁷, Bůchorn¹⁸, Gemúnd¹⁹, Halle²⁰, Hailprunnen²¹, || No^erdlingen²², Dinkelspuhel²³, Routenburg vff der Tuber²⁴, Winpfen²⁵, Winsperg²⁶, Aulon²⁷, Bopfingen²⁸, Giengen²⁹ vnd Bůcho^vwe³⁰ got ze lobe dem hailigen Ro^emischen rich ze nutz vnd ze eren in selb vnd gemainem land ze frid vnd ze gemach ze samen verstriket verainet vnd verbunden hant vnd ouch ainer lieplicher frivntschafft mitainander uberain komen sind mit aiden, die si dar vmbe liplich ze got vnd ze den hailigen gesworen ha^vnt, ain ander getruweclich bi gesta^endig bera^vten vnd beholffen ze sind nauch des verbünd brieffs lute vnd sag, den si darvmb ain ander besigelt vnd gegeben, in dem selben verbundbrief si doch sich selb vnd ir ere gen dem hailigen Ro^emischen rich wol bewart vnd versorget ha^vnt mit dem, daz si dem hailigen rich alliv siniv recht ze halten vnd ze tu^end âne geverde mit namen ha^vnt vsgesetzt vnd behalten, darvmbe vnd ouch von so^elicher truwe frivntschafft vnd liebin, die wir von dez hailigen richs wegen billich zů den vorgenanten stetten haben sullen vnd ouch gebunden sien, so haben wir vns ietzo mit gůtem willen vnd mit gemainem ra^vt vnd rechten fúrsa^etzen v´nser ra^ete vnd aller vnser gemainde durch merrers nutze frides vnd gemaches willen vnser selbs vnd aller der vnser v´ns ietzo dem vorgenanten hailigen Ro^emischen rich ze eren zů den vorgenanten stetten allen in den egenanten iren bunde willeclich vnd tugentlich verstriket vnd verbunden vnd ouch darvmbe alle vnbetzwungenlich gelert aid gesworen liplich zů got vnd zů den hailigen mit vffgebottnen vingern vnd gelerten worten, den selben iren bunde mit in, die wile vnd alz lang der weret vnd gemachet ist, luterlich vnd ane alle geverde ze halten ze laisten vnd ouch ze vollefu^eren in allen mainungen pungten vnd artikeln, alz ouch der selb ir bunde wiset vnd gemachet ist vnd alz ouch der bundbrief von wort ze wort begriffen vnd geschriben sta^vt vnd ze gelicher wise vnd ouch in allem dem rechten, alz ob wir mit namlichen worten by in in dem selben irem verbundbrief begriffen vnd verschriben wa^eren oder dar inne begriffen oder verschriben sin so^elten. Darzů sullen wir vorgenanten von Wintzhain fu^er zwai hundert pfund haller vnd wir die egenanten von Wissenburg fu^er hundert pfund haller mit den vorgenanten stetten anzalen vnd ouch spiesz dienst vnd alle ander kost da von richten haben legen vnd heben in aller der wise, alz ander stett von so vil geltz in selb vff setzent oder von so vil geltz heben oder legen mu^essent, a^vne alle geverde, vnd daz ouch vnser ieglichiv stat besunder ainen vnsers ra^vtz, wenne wir von den vorgenanten stetten gemant werden, zů in senden vnd zů dem spruch setzen súllen ane alle geverde. Mit vrkund ditz brieffs, den wir den vorgenanten stetten allen dar uber besigelten geben mit vnser vorgenanten zwaier stett gemainen insigeln, div baidiv offenlich ze gagen hangent. Der geben ist an sant Anthonyen aubent, do man zalt von Christz gebúrt drivzehen hundert ja^vr vnd darnach in dem dry vnd achtzigostem ja^vre.

Source Fulltext: Chartularium Sangallense X, Nr. 5943, S. 114-115.