Allen^a) den, die disen brief ansehent lesent oder ho^erent lesen, kúnden wir dis nachgenemten Cůnrat, Johans vnd Bertolt die Keller von Bu^esenhouen¹ gebrůder burger ze sant Gallen || vnd veriehen offenlich an disem brief, als die fromen wisen der burgermaister vnd der rât der stat ze sant Gallen V^olrich den Keller von Bu^esenhouen v´nsern brůder vnd V^olrich || Frien von Ta^eschlerhusen² ainen suterkneht hattent geuangen vnd in irn turn vnd band gelait hattent vmb die vntât, als si ains erbern manns tohter von Hefenhouen³ hiess Adelhait || vnd was aines v´nsers burgers verdingotti iunkfro^vw vff der strâsse fra^euenlich erzwungent vnd si genotzogt hatten vnd aber sú die selben geuangenn durch v´nser vnd ander v´nser frúnde ernstlichen bett vss der selben vanknust ledig gelassen hânt, also das wir alle drie vnd darzů dis nachgenemten erbern lút mit v´ns fúr si wer worden sien in der wise vnd mit den gedingen, als hienâch beschaiden ist an disem brief. Des ersten so hant die selben V^olrich Keller von Bu^esenhouen v´nser brůder vnd V^olrich Frie von Ta^eschlerhusen offenlich frilich vnd willeklich vngebunden vnd vngeuangen gesunt lib vnd můt ietwedre besunder gesworn ainen gelerten ait zů den hailgen mit v^fgebotten vingern, der obgedahten des burgermaisters des rates vnd aller burger gemainlich der stat ze sant Gallen vnd iro ieklichs besunder vnd mit namen aller dero, die an der selben iro vorgedâhten vanknust schuld gehept hant, es sie mit ra^eten ald geta^eten haimlich oder offenlich oder in dehain wîs, luter vnd gůt frúnd ze sinne vnd alle iro frúnd in darvmb ze frúnd ze gewinnenn âne allen fúrzug vnd ân alle geua^erde vnd die vorgedâhten vanknust gegen den selben burgern noch gegen der stat ze sant Gallen noch gegen iemann, wer oder welhi darzů gehaft sint oder daran in dehain wîs schuld gehept hant nieman vssgelassen, niemer ze andenn noch ze a^eferrenn noch ieman von iro wegen noch an iro stat weder nu noch hienach weder mit gaistlichem noch mit weltlichem geriht noch ân reht weder mit||
worten noch mit werken noch in dehain wis vnd wider die stat noch wider die burger von sant Gallen gemainlich niemer ze komenn noch ze tu^enne in kain wîs ân geua^erde. Der obgenant v´nser brůder V^olrich Keller hat o^vch in den selben ait genomen vnd gesworn, von dem na^ehsten sunnentag hin inrunt dem na^ehsten mânot vss der stat vnd vsser den gerihten daselbs ze varenn vnd dannanhin dú na^ehsten drú ga^entzzú jâr nâchanander vor der stat ze sant Gallen vnd vsserthalb den gerihten daselbs ze belibenn, vnd der obgenant V^olrich Frie hat in den selben ait o^vch genomen vnd gesworn, von dem selben na^ehsten sunnentag hin inrunt dem selben na^ehsten manot vsser der stat ze sant Gallen vnd vsserthalb den gerihten daselbs ze varenn vnd in die selben stat ze sant Gallen noch in dú geriht daselbs niemer me ze komenn, ez wa^er denne, das ain Ro^emscher kúng oder kayser oder ain núwe hêrr vnd abt von sant Gallen ze sant Gallen infu^eri vnd das sú mit den selben herren o^vch in fu^erint, was denne andren so^elichen verbottnen vnd verschulten lúten von alter darvmb reht vnd gewonlich gewesen ist, das ist in baiden o^vch behalten vnd in dem ait v^sgesetzt. Vnd darvmb das die selben burger vnd die stat ze sant Gallen dester sicherer sien, so haben wir in darvmb zůtz v´ns ze rehten wern geben vnd gesetzt dis nâchgenemten erbern lút V^olrichen ab Egg, Eberharten Schirmer, Friken vnd Cůnrat die Kêssler gebrůder, Johansen Schindler den zimberman alle burger ze sant Gallen, Johansen Keller von Bu^esenhouen v´nsern vetter, Johansen Múller von Ramswag⁴, Johansen von Wolffrahtzwis⁵, V^elin Weber von Stoka⁶ vnd V^olrich Lutzen, die hant alle gemainlich vnd vnuerschaidenlich mit v´ns gelopt iekliche besunder mit siner trúwe vnd hant sich mit namen des verbunden also mit so^elichem gedinge, bescha^eh, da vor got sie, das die obgenanten V^olrich Keller von Bu^esenhouen v´nser brůder vnd V^olrich Friie von Ta^eschlerhusen oder dewedre besunder den vorgedahten geswornen ait, als ietwedre gesworn hat, in dehain wîs iemer v´berf^e'rint vnd niht sta^et hieltint vnd vollfůrtint, als vor ist beschaiden, ald das si beid ald dewedre besunder ald ieman andre an iro stat ald von iro wegen die vorgedâhten vanknust iemer in dehain wîse andottint oder a^efertint wider dem ait, den si gesworn hant vnd als vor ist beschaiden, welhes da bescha^eh, so sien wir vnd o^vch die vorgenemten wern alle vnuerschaidenlich den obgedâhten dem burgermaister dem rât den burgern vnd der stat ze sant Gallen gemainlich vnd iren erben vnd nâchkomen hundert pfunt pfenning gůter vnd gena^emer Costentzer múnse gantzlich veruallen vnd inen das selb gůt gebunden ze gebenn vnd rihtenn gantzlich ân alle widerrede vnd ân allen fúrzug, wenn si des fúrbass nit enbern wênt. Wa^er aber, das wir ald die obgenanten wern inen das selb gůt dú hundert pfunt pfenning gůter Costentzer múnse gantzlich niht rihtint vnd bezaltint in der wîs, als vor ist beschaiden, so hant die selben der burgermaister der rât vnd die burger alle gemainlich der stat ze sant Gallen vnd ir erben vnd nâchkomen vnd alle iro helffer, wer die sint, fries vrlob vnd vollen gewalt darnach wenn si went, das sú v´ns vnd o^vch die vorgenemten wern pfenden no^eten heften vnd angriffen sont vnd mugent an allen v´nsern vnd der selben wern gůten ligenden vnd varenden in stetten in do^erffern vnd vff dem lande mit gaistlichem vnd mit weltlichem geriht vnd ân alles reht ân klag vnd ân allen zorn, wie vnd wâ oder wâhin sú des getůn mugent oder wênt, als vil vnd als dik, vntz das sú der vorgeschribnen hundert pfunt pfenning gůter Costentzer múnse vnd o^vch des schaden, in den sú vnd ir helffer von des selben pfendens no^etens heftens vnd angriffens wegen koment, gantzlich gewert vnd vssgeriht werdent ân allen iro schaden, vnd sol v´ns noch die vorgenemten wern noch kainú vnsrú noch der selben wern gůt davor niht schirmen noch gůt sin enkain frihait noch gewonhait enkain buntnust noch burgreht noch kain lantfrid noch kain reht des landes noch der stêtte gaistlichs noch weltlichs gerihtes noch enkain ander sach noch fúrzug. Wa^er aber, das wir ald die vorgenemten wern danne die obgenanten V^olrich den Keller von Bu^esenhouen v´nsern brůder vnd V^olrich Frien baid antwúrtint ainem burgermaister vnd dem rât ald besorgern ze sant Gallen, ob da nit râtes wa^er, in irú band, das sú iro sicher vnd gewaltig sint, ê das sú dehainen schaden mit to^etlichen wundan begangen hêttint, so sont wir vnd die selben wern dann der vorgeschribnen gelúpt vnd buntnust vnd vmb die vorgeschriben hundert pfunt pfenning danne gantzlich ledig sin. Vnd ze offemm wâren vrkúnde vnd sta^eter sicherhait aller vorgeschribnen dinge vnd gedinge so haben wir die obgenanten wern Cůnrat, Johans vnd Bertolt die Keller von Bu^esenhouen gebrůder v´nsrú insigel offenlich gehenkt an disen brief, vnd wir die vorgenemten wern V^olrich ab Egg, Eberhart Schirmer, Frik vnd Cůnrat die Kessler gebrůder, Johan Schindler, Johans Keller von Bu^esenhouen der obgenanten Keller von Bu^esenhouen vetter, Johans Múller von Ramswag, Johans von Wolffrahtzwis, V^eli Weber von Stoka vnd V^olrich Lutz veriehent offenlich an disem brief ain gantz wârhait aller der dinge vnd gedinge gelúpt vnd buntnust, so von v´ns da vorgeschriben stât an disem brief, vnd des ze merer sicherhait so haben wir die obgenanten V^olrich ab Egg, Eberhart Schirmer vnd Johans Keller von Bu^esenhouen der obgenanten Keller von Bu^esenhouen vetter v´nsrú insigel o^vch gehenkt an disen brief, vnd wir die obgenanten Frik vnd Cůnrat die Kessler gebrůder vnd Johans Schindler habent erbetten den beschaiden Blârrer Sta^ehillin burger ze sant Gallen, das er sin insigel fúr v´ns gehenkt hat an disen brief, won wir a^eigner insigel niht hattent, vnd wir die obgenanten Johans Múller von Ramswag, Johans von Wolffrahtzwis, V^oli Weber von Stoka vnd V^olrich Lutz habent erbetten den beschaiden Jacob Růpreht den Lo^ewen ze disen ziten statamman ze sant Gallen⁷, das er sin insigel fúr v´ns gehenkt ha^vt an disen brief, won wir o^vch aigner insigel nit hattent, vnder das selb insigel wir v´ns willeklich gebunden haben aller vorgeschribner dinge nd gedinge. Ich der obgenant Blârrer Sta^ehilli vergich, das ich von bett der obgenanten Friken vnd Cůnratz der Kessler gebrůder vnd Johansen Schindlers min insigel fúr sú gehenkt han an disen brief mir vnd minen erben vnscha^edlich, vnd ich Jacob Růpreht der Lo^ew da vorgenemt statamman, alz vorgeschriben stat, han o^vch von bett der obgenanten Johans Múllers von Ramswag, Johansen von Wolffrahtzwis, V^eli Webers von Stoka vnd V^olrichs Lutzen min insigel fúr si o^vch gehenkt an disen brief mir vnd minen erben vnscha^edlich. Dirr brief ist geben ze sant Gallen an dem na^ehsten zinstag vor sant Martins tag in dem jâre, do man von Cristus gebúrt zalte drúzehenhundert jâr vnd darnach in dem drú vnd ahtzigosten jâre.

Source Fulltext: Chartularium Sangallense X, Nr. 5977, S. 148-151.