Allen^a) den, die disen brief ansehent lesent oder ho^erent lesen, kúnden wir dis nâchgenemten Laurentz Arnolt, Johans O^etli || vnd Entz Ga^edemler burger ze sant Gallen vnd veriehen offenlich an disem brieff von des êrbes vnd erbschaft wegen || ligendes vnd varendes gůtes, als Růdolff Behaim sa^elig wilunt burger ze sant Gallen gelâssen ha^vt, das selb erb vnd erb||schaft die fromen wîsen der burgermaister vnd der rât gemainlich ze sant Gallen disen nâchgenemten erberen lúten Cůnraten vnd V^olrichen Bûsskugeln gebrůdern vnd Hainrichen Riser von Schnúfis¹ vnd V^olrichen am Berg, des selben Růdolff Behaims sa^eligen erbornen frúnden, hant lassen gelangot vnd ervolget, darvmb so haben wir durch der selben erberr lút bette willen alle drie vnuerschaidenlich gelopt vnd v´ns gegen den selben dem burgermaister dem rât vnd gegen den burgern gemainlich ze sant Gallen verbunden vnd bindent v´ns des mit disem brieff, also bescha^eh, das ieman, wer oder welhi die wa^erint fro^vw ald man pfaff oder laye gaistlich oder weltlich, wie er oder wie si genant wa^erint, die vorgedahten den burgermaister vnd der^b) rât oder die burger gemainlich der selben stat ze sant Gallen ald ir nâchkomen oder dehainen burger von sant Gallen besunder, fro^vwen oder man, von des vorgedâhten erbes vnd êrbschaft wegen ligendes oder varendes gůtes, so der obgenant Růdolff Behain sa^elig gela^vssen ha^vt, iemer anspra^echint v^fftribint oder bekúmbertint, es war mit gaistlichen oder mit weltlichen gerihten, es wa^er vmb v´bernútz ald von v´bernútzze wegen ald von dehainerlay ander sache wegen ald mit dehainerlay ander ansprach, wenne oder wa ald wie dik das bescha^eh ietzo oder hienâch, das wir sú darvmb allweg verstân versprechen vnd vertretten vnd inen die selben so^elich ansprachen gantzlich vnd gar ablegen so^ellin vnd wellent âne allen iren schaden âne allen fúrzug vnd widerrede vnd âne alle geua^erde. Vnd wa^er, das wir das niht ta^etint oder daran súmig wa^erint, wie si ie denn des ze schaden koment in dehainen weg, den schaden so^ellint vnd wellent wir den selben burgern von sant Gallen gemainlich vnd ir ieklichem besunder gantzlich vnd gar ablegen vnd abtůn âne allen fúrzug vnd widerrede vnd âne alle geua^erde bi den trúwen, als wir gelopt habent. Wir habent o^vch den selben burgern von sant Gallen gemainlich vnd ir ieklichem besunder vnd iren nâchkomen vollen vnd gantzen gewalt geben vnd fries vrlob, das sú vnd wer in des helffen wil v´ns darvmb angriffen pfenden no^eten vnd heften sont vnd mugent an v´nsern lúten vnd gu^etern in stetten in do^erffern vnd vff dem lande mit gaistlichen vnd mit weltlichen gerihten vnd âne alles reht ân klag vnd âne allen zorn, wie vnd wâ oder wâhin sú das getůn mugent oder wênt, in stett oder in do^erffer oder in welhes geriht si wênt, als vil vnd als dik, vntz das in ie ir schad, in den si ie dann von des vorgedâhten v^fftribenns vnd ansprâchen wegen koment ald komen sint, vnd o^vch der schad, in den si von des selben pfendens no^etens vnd angriffens wegen koment, gantzlich abgelait wirt, âne alle geua^erde, vnd sol v´ns noch v´nser lút noch gu^eter davor noch dawider niht schirmen noch gůt sin enkain frihait noch gewonhait enkain buntnust der herren noch der stette enkain burgreht weder stettreht noch lantgriht enkain reht gaistlichs noch weltlichs gerihtes noch enkain ander sache noch fúrzug. Vnd des ze offemm wâren vrkúnde vnd sta^eter sicherhait aller vorgeschribner dinge vnd vergiht so haben wir die obgenanten Laurentz Arnolt vnd Johans O^etli v´nsrú insigel offenlich gehenkt an disen brieff, vnd won ich der obgenant Entz Ga^edemler aigens insigels niht hatt, so han ich erbetten den erbern beschaidenn Jacob Růprehten², den man nemmt der Lo^ew, stat-amman ze sant Gallen, das er sin insigel fúr mich gehenkt hât an disen brief im vnd sinen erben vnscha^edlich, vnder das selb insigel ich mich willeklich gebunden han aller vorgeschribnen dinge vnd gedinge. Dirre brief ist geben ze sant Gallen an dem na^ehsten ma^entag vor dem zwelfften tag, dem man in latyn sprichet epiphanya, in dem jâre, do man zalt von Cristus gebúrt drúzehenhundert jâr vnd darnach in dem vier vnd ahtzigosten jâre.

Source Fulltext: Chartularium Sangallense X, Nr. 5990, S. 161-162.