Wir die von Regenspurg ain frygú stat vnd ouch wir die burgermaister ra^ete vnd alle burger gemainlich der nachbenempten dez hailigen Ro^emischen richs stette Basel, Augspurg, Vlme, Kostentz, || Ezzlingen, Rútlingen, Rotwil, Wil, V´berlingen, Memingen, Bybrach, Rauenspurg, Lindow, sant Gallen, Pfullendorff, Kempten, Kouffbúrren, Liutkirch, Isni, Wangen, Halle, Haylbrunnen, Gemúnde, Winpfen, || Winsperg, No^erdlingen, Rotenburg vff der Tuber, Dinkelspúhel, Windshain, Wissenburg, Aulun, Bopfingen, Giengen, Bůchorn vnd Bůchow etc., die den bund mit ain ander haltend in Swauben, bekennen || vnd veriehent offenlich mit disem brief vnd tu^egent kunt allen den, die in ansehent oder ho^erent lesen, daz wir mit gemainem raute vnd mit gůten fúrsa^etzen die fúrsichtigen vnd wisen die burger dez rates vnd die gemainde gemainlich der stat ze Nu^errenberg dem hailigen rych ze eren v´ns vnd gemainem lande zu fride vnd zu gemach zů v´ns in v´nsern bunde ingenomen vnd enphangen haben vnd den ouch si gesworn haben ainfaltklich mit v´ns ze haltende nach des bundbriefs lut vnd sag, den wir enander darumb gegeben vnd versigelt haben, vzzgenomen ob daz wa^er, daz wir den bunde fúr die zit, alz der bundbrief ietzo helt, daz ist mit namen hinnan bis zů sant Go^erygen tag vnd darnach zehen ga^entzú iar die nechsten, fúrbas erlengen wo^elten oder ander búnde oder lantfride anuahen oder machen wo^elten, die fúr die zit weren so^elten, alz der bundbrief helt, als vorgeschriben stet, es geschech denne mit irem gůten willen, darumb so^elten si niht lenger verbunden sin, die selben búnde vnd fride zu halten, denne als lang alz v´nser bundbrief ietzunt helt, alz vorgeschriben stet. Vnd darumb so habint wir ietzunt den selben burgern dez rates vnd der gemainde gemainlichen der stat zu Nu^errenberg mit gůtem willen versprochen gelobt vnd verhaizzen vnd versprechint och ietz mit kraft dis briefs vff die aide, die wir dem vorgenanten v´nserm bund gesworn haben, daz wir si vnd die iren getrúlich schirmen vnd ouch geraten vnd beholfen sin wellen vnd súllent nach dez vorgenanten v´nsers bundbriefs sag zu glicher wise vnd in allem dem rechten, alz wir dez ain ander verbunden sint vnd zu samen gesworn haben vnd als si mit na^emlichen worten bi v´ns in dem vorgenanten bundbrief begriffen vnd verschriben weren oder den mit v´ns angefangen hetten, ane alle geuerde. Ouch bekennen wir die vorgenanten stett, daz wir die vorgenanten von Nurrenberg ingenomen vnd empfangen haben, also daz si mit v´ns liden dulden vnd dienen súllen an spiess dinst vnd aller ander kost gelicher wise, als ob si dem rieh niht mer geben denne acht hundert pfund haller, vnd súllent ouch von den selben acht hundert pfund hallern mit v´ns den vorgenanten stetten anzalen vnd ouch spiess dinst vnd ouch alle andern kost dauon richten haben legen vnd heben in alle der wise, alz ander von souil geltz in selb ufsetzent oder von souil geltz heben oder legen mu^eßent, ane alle geuerde, vnd daz ouch die selben von Nu^errberg zwen vss irem rate zů v´ns zů dem spruch setzen súllen ane alle geuerde. Mit vrkúnd dis briefs, den wir in darúber besigelten geben mit v´nser der egenanten vier stett Regenspurg, Ougspurg, Vlme vnd Costentz angehenkten insigeln, die och daz von v´nser aller haizzentz wegen getan vnd och irú insigel an disen brief gehenkt hant. Der geben ist dez nechsten zinstags vor sant Johans tag ze súnwenden, do man zalt von Cristz gebúrt drúzehenhundert iar vnd darnach in dem vier vnd achtzigostem jaur.

Source Fulltext: Chartularium Sangallense X, Nr. 6024, S. 199-200.