Ich^a) Hainrich herr ze Hewen¹ vnd frow Clement sin elichi husfrow von Tokkenburg² geborn || veriehen vnd tůnt kunt offenlich mit disem brief fúr v´ns vnd fúr alle v´nser erben allen den, die || disen brief ansehent lesent oder ho^erent lesen, daz wir durch v´nsers nutzes wegen an barem || beraitem gelt ingenomen vnd enpfangen haben von dem erwirdigen herren abt Jacob des gotzhus ze Vischinan³ zwainzig pfund pfenning alles gůter vnd genemer Costentzer pfenning, derselben pfenning wir o^vch von im bezalt sint an den stetten, da wir v´nsern fromen mit geschaffot haben, vnd vmb dieselben pfenning haben wir im vnd sinem obgenanten gotzhus vnd zů desselben gotzhus handen mit gůter wissenlicher vorbetrahtung fúr v´ns vnd fúr alle v´nser erben ains rechten redlichen ewigen vngeuarlichen kofs ze koffent geben die erbern lút Briden Hainrichs Verren von Bussnang⁴ elichen tohter Růdolfes Burkartz elichen frowen vnd Josen iren sun, den si hett bi dem ietzgenanten irem elichen man, die v´nser recht aigen warent, vnd o^vch fúr recht aigen, vnd entzihen vnd entweren v´ns mit disem brief fúr v´ns vnd fúr alle v´nser erben gegen dem vorgenanten abt Jacob vnd gegen allen sinen nachkomen vnd o^vch gegen dem obgenanten gotzhus der vorgenanten lút ires libs vnd alles ires gůts vnd darzů aller aigenschaft aller lehenschaft aller gemainschaft aller manschaft aller gewer aller kuntschaft aller zúgnúst lút vnd brief alles gewaltes alles rechten nutzes vordrung vnd ansprach, so wir ald v´nser erben ald ieman andra von v´nsren wegen von recht ald von gewonhait ald von dehainen andren sachen zů denselben lút ald zů ir lib ald zů ir gůt hetten ald hienach iemer gewinnen ald erwerben mo^ehten in dehainerlai wis ald weg a^vn geuaerd. Wir haben o^vch baidi gemainlich vnd vnuerschaidenlich gelobt fúr v´ns vnd fúr alle v´nser erben vnd loben och mit disem brief, der vorgenanten lút fúr recht aigen vnd des redlichen koffes recht weren ze sint nach dem rechten vf gaistlichem vnd vf weltlichem gerihten, wenn wa ald wiedik sin der vorgenant abt Jacob ald sin nachkomen ald daz vorgenant sin gotzhus bedurfent vnd noturftig sint ald darvmb vf getriben ald angesprochen werdent, daz wir sú dar vmb a^vn allen iren schaden versta^vn vnd versprechen so^ellen vnd von der ansprach entrihen vnd ledig machen a^vn geuaerd.Vnd des alles vnd hierúber ze warem vnd offem vrkúnd so haben wir Hainrich von Hewen vnd frow Clement sin elichi husfrow da obgenant v´nsrú insigel offenlich gehenkt an disen brief. Der geben ist an dem na^echsten fritag nach dem hailgen vffart tag, do man zalt von Cristus gebúrt drúzehenhundert iar, ahtzig iar, dar nach in dem vierden jar.

Source Fulltext: Chartularium Sangallense X, Nr. 6012, S. 189.