Wir^a) Leupolt von gots^e gnaden hertzog ze Oster(rich) ze Steyr ze Kernden vnd ze Krain graf ze Tyrol marggraf || ze Teruis¹ etc. tu^en kunt fu^er vns vnd vnser erben, daz wir den edeln vnsern lieben o^eheimen graf Donaten vnd graf || Dyethelmen gebrůdern von Toggenburg² gelten su^ellen vnd schuldig syen vyer tusent vnd nu^enthalb hundert guldin || darumb sy den satz ze Kyburg³ von Hansen seligen des Bonstetters⁴ erben gelo^est habent, dartzů habent sy vns y^etzund zů vnsern notdurften berait gelihen zway tusend vnd siben hundert guldin, also pringt die svmm achthalb tusend vnd fu^enftzig guldin, dafu^er wir in vnd irn erben ingegeben vnd versatzt haben versetzen vnd ingeben in auch wizzentlich mit disem brief Kyburg vnser vest mit aller anderer zůgeho^erung, also daz si denselben satz mit allen rechten nu^etzen eren wirden vêllen půssen twingen pe^annen klainen vnd grozzen gerichten vnd mit aller andrer zůgeho^erung vngeuarlich von vns vnd vnsern erben in ains rechten wernden phandes wise a^vn abslag der nu^etz inn^ehaben vnd niezzen su^ellent, als satzes vnd landes recht ist, vnd als lang, vntz daz wir oder vnser erben die von in vmb das egenant gelt gentzlich erledigen vnd erlo^esen, sy vnd auch ir erben su^ellent auch denselben satz ze Kyburg vnwu^estiklich vnd vnuerdorbenlich inn^ehaben, die egenanten vnser o^eheim von Toggenburg vnd ir erben su^ellent auch vns vnd vnsern erben mit der vest daselbs ze Kyburg zu allen vnsern notdurften allzit gehorsam vnd gewertig sin wider allermêniklich nyemand ausgenomen, vns vnd die vnsern darin vnd darauz ze lazzen vnd auch darinn^e ze enthalten, wenn oder wie oft sin not geschieht, doch ane irn merklichen schaden, wenn auch wi^er oder vnser erben sy oder ir erben mit dem egenanten irm gelt ermanen vnd die losung an si vordem, so sullent sy vns der allzit ane all widerrede vnd ane vertziehen gehorsam sin vnd vns der statt tůn ane alles geuerde. Mit vrchu^end ditz briefs. Geben ze Prukk in Ergo^ew⁵ an sand Elspeten tag, nach Krists gebůrt drutzehenhundert jar, darnach in dem vyer vnd achtzigistem jare.

Source Fulltext: Chartularium Sangallense X, Nr. 6045, S. 216.