Wir^a) Fridrich von gots gnaden bysschof zů Eysteten¹ veriehen vnd tu^en kunt offenlichen mit disem brief allen den, die in sehen horen oder lesen, || vmb die aynunge vnd puntnu^esse, als die von Regensbu^erg ein freye stat vnd ander dez heiligen reichs stete Auchsbu^erg, Basel, Nuremberg, Vlm^e, || Costnitz, Esslingen², Rew^etlingen³, Rotweil⁴, Weil⁵, Vberlingen⁶, Memyngen⁷, Bybrach⁸, Rauensbu^erg⁹, Lindaw^e10, sant Gallen, Pfullendorf¹¹, Kempten¹², Kaw^ebu^erren¹³, || Lutkirch¹⁴, Ysni¹⁵, Wangen¹⁶, Halle¹⁷, Heilprunne¹⁸, Gemunde¹⁹, Winpffen²⁰, Weinsberg²¹, Nordlingen²², Rotenburg vff der Tawber²³, Dinkelspu^ehel²⁴, Windshein²⁵, Weissenburg²⁶, Awln²⁷, Popffingen²⁸, Giengen²⁹, Buchorne³⁰ vnd Buchawe³¹ in Swoben vnd in Franken sich mit einander veraint vnd verbunden haben got zu lobe dem heiligen Romischem reiche zu eren in vnd gemainem lande ze nutz vnd zu frúmen, in demselben pu^ente sie dem heiligen Romischen reich alle seine recht zuhalten vnd zetun erberclichen awzgenomen vnd hindan gesatzt haben, daz wir vns got zu lobe dem heiligen Romischen reiche zu eren vns vnd vnserm stiffte vnd lant vnd lewten zu^e schirm ze nu^etz vnd zu^e frúmen mit rechter wissen wolbedahtem mute vnd mit gutem rate vnsers rats vnd andrer vnserr lieben getrewen mit vnserm stiffte vnd mit allen vnsern steten vesten slossen land vnd lewten zu den egenanten steten lieplichen freuntlichen vnd vorbetrehticlich verstrikt veraynt vnd verbunden haben verstriken veraynen vnd verbinden vns zu in mit krafft ditz briefs in den selben iren punt nach lawt vnd sag dez puntbriefs, den sie darvber gemacht vnd gegeben haben, von sant Mertins tag, der schirst ku^empt, vnd dornach funf gantze iar, die schirst nach einander komen, geleicher weise als wir nemlichen in dem selben irem puntbrief begrifffen vnd geschriben wern vnd den mit in angevangen heten, vnd wir nemen auch awz, dem heiligen reich seine recht alle zuhalten vnd zetun, als sie daz selber auch haben getan. Wenn auch vns die vorgenanten stete ermanen, als oft in dez not geschieht, so sullen wir in dienen mit sechtzehen mit glefen wol erzewgter lewte, die wir in senden vnd schikken sullen on allez vertziehen in acht tagen ongeuerde an solch stet, do sie vns dann hin manen, vnd sullen in domit dienen vff vnser selbs kost vnd schaden on iren schaden, als lang sie der bedurffen, on allez geuerde. Wer auch, daz sie mer volks bedorften vnd furbaz vns manten, ez wer zu^e gesezzen zů streichenden raysen oder zu^e teglichen kriegen, so sullen wir drey vnsers rats dorzu^e setzen vnd die vorgenanten stete zwen, vnd wie die fu^enf oder der mererteil vnter in erkennen, daz wir in furbaz vber die egenanten sechtzehen mit glefen helfen vnd dienen sullen, nach dem als dann die sache an irer selber gestalt ist, daz sullen wir tu^en getrewlichen on allez vertziehen vnd on allez geuerde. Ez sullen auch alle vnser slo^ez stet vesten der vorgenanten stete offene hewser sein zu allen iren kriegen vnd noten, als oft in dez not geschiht, die weil dise aynung vnd puntnusse wert. Ez sullen auch alle vnser amptlewt vogt richter vnd schultheissen swern den vorgenanten pu^ent nach dez pu^entbriefs lawt vnd sag, vnd wenn der selben einer oder mer abgingen oder daz wir ander an der selben stat setzten, der oder dieselben sullen allewegen sweren in alle der mo^vz, als die vordem getan haben, on geuerde. Vnd diser vorgenanten sache vnd artikel haben wir gelobt mit guten trewen vnd dorzu^e einen gelerten eyd zu got vnd zu den heiligen gesworen zuhalten zuleysten vnd volfu^eren getrewlichen on alle argelist vnd geuerde. Ez sullen auch wir vnd vnser stift vnd alle die vnsern bleiben bey allen vnsern freyheiten rechten guten gewonheiten, als wir die von alter her haben braht. Gleicher weise sullen die vorgenanten stete vnd alle die iren bleiben bey allen iren rehten freyheiten vnd guten gewonheiten, als sie die auch biz her braht haben, on allez geuerde. Vnd dez zu^e vrkunde vnd vester stetikeit geben wir disen brief versigelt mit vnserm anhangendem insigel. Der geben ist an sant Lucas tag dez heiligen ewangelisten nach Cristus gebu^ert drewzehenhundert iar vnd dornach in dem vier vnd achtzigistem jare.

Source Fulltext: Chartularium Sangallense X, Nr. 6042, S. 211-213.