Frater^a) Gerardus abbas Cistercii¹ venerabili in Christo nobis carissimo coabbati nostro de Maristella alias Wettingen² salutem || et diligenciam in commissis. Annue visitacionis officium, quod dilectis nobis in Christo filiabus abbatisse et conventui monasterii || de Cella Marie³ nobis immediate subiecti personaliter impendere non possumus aliis nostri ordinis arduis negociis prepediti, || discrecioni vestre per continuum triennium duximus committendum, dantes vobis et concedentes auctoritatem in dicta domo visitandi corrigendi reformandi ac eciam statuendi tam in capite quam in menbris, quandocumque ibidem visitacionis correctionis ac reformacionis beneficio noveritis indigere. Proviso tamen, quod visitacio huiusmodi usque post festum beati Gregorii annis singulis differatur, sane si abbatissam in dicto monasterio destitui vel institui oportuerit, destitucionem huiusmodi ac eciam institucionem per vos fieri volumus tam ante visitacionem quam post in nostra et ordinis plenaria potestate, servatis tamen in omnibus premissis et singulis canonicis ac nostri ordinis regularibus institutis. Damus insuper vobis auctoritatem omnium personarum regularium dicti loci confessiones audiendi ipsasque absolvendi in omnibus et singulis casibus, in quibus eas de iure absolvere possumus et debemus, confessoresque instituendi, qui consimilem absolvendi habeant potestatem, ipsosque mutandi, si et quociens suadente racione videbitur oportunum, universis autem et singulis dicti monasterii personis regularibus damus tenore presencium firmiter in mandatis, quatenus in omnibus et singulis ac dependentibus ab ipsis vobis obediant humiliter et devote pareant tanquam nobis, presentibus per immediate sequens triennium ut prefertur in suo robore duraturis. Datum Diuion.⁴ sub nostro sigillo anno domini millesimo CCC^mo octogesimo quinto, tempore nostri capituli generalis.

Source Fulltext: Chartularium Sangallense X, Nr. 6109, S. 298-299.