Wir^a) Wenczlaw von gots gnaden Romischer kung zu allen zeiten merer des reichs vnd kung zu Behein empieten allen vnd || iglichen fursten geistlichen vnd werltlichen epten prelaten clostern graffen fryen dyenstluten rittern knechten vnd darzu || nemlichen vnd besundern allen vnd iglichen vnsern vnd des reichs stetten Costencz, Auspurg, Vlme, Esslingen³, Lyndow⁴, || Rauenspurg⁵, Santegallen, Rotwil⁶, Rutlingen⁷, Nordelingen⁸, Bibrach⁹, Dinkelspuel¹⁰, Memmyngen¹¹, Pfulendorff¹², Halle¹³, Buchow¹⁴, Buchorn¹⁵, Kempten¹⁶, Wangen¹⁷, Ysnyn¹⁸, Hailprun¹⁹, Wympfen²⁰, Wile²¹, Kauffburen²², Lutkirchen²³, Bopfingen²⁴, Gyengen²⁵ vnd allen andern stetten gemeinden inwonern vnd vndersessen geistlichen vnd werltlichen, wie die genant sein, nyemands ausgenomen, die in Obern vnd Nydern Swaben gelegen vnd gesessen sein vnd in die lantfogtye doselbest gehorent, vnsern vnd des reichs lieben getrewen vnser gnade vnd alles gut. Lieben getrewen, wie wol wir vormals dem hochgebornen Leupolden herczogen zu Osterrich²⁶ vnsere vnd des reichs lantfogtie in Obern vnd Nydern Swaben verschriben vnd entpfolhen hatten, als ir selber wol wisset, jdoch durch grosser redelicher vnd merklicher sachen willen, die vns vnd das reiche anrurende sein, so meinen wir dieselbe lantfogtie selber zuhaben vnd vns dem reiche vnd dem gemeinen lande zu friden vnd nucze bestellen. Vnd douon mit wolbedachtem mute vnd rechter wissen haben wir widerrufft vnd abegeseczt widerruffen vnd abeseczen mit crefften dicz briues den egenanten herczogen Leupolden von den obegenanten vnsern vnd des reichs lantfogetien in Obern vnd Nydern Swaben vnd wer von seinen wegen vnderlantfogt doselbest gewesen ist, vnd meinen vnd wollen, das ir euch vorbas an die von wegen derselben lantfogtie nicht keren noch yn mit vnsern vnd des reichs stewren lantgerichten gerichten oder sust gehorsam oder gewartende sein sullet in dheinenweis. Auch haben wir dem edeln Wilhelme dem Frawenberger²⁷ vnserm hoffgesinde diener vnd lieben getrewen die obgenanten lantfogtien in Obern vnd Nydern Swaben von vnsern vnd des reichs wegen zuverwesen vnd zu versteen mit allen rechten gerichten vnd nuczen, als gewonlichen ist, genczlichen entpfolhen. Vnd darum gebieten wir euch allen vnd ewer iglichen ernstlichen vnd vesticlichen bei vnsern vnd des reichs hulden, das ir denselben Wilhelm als vnsern vnd des reichs lantfogt in Obern vnd Nydern Swaben vffnemet habet haldet vnd ym von vnsern vnd des reichs wegen gehorsam beigestendig vnd gewartende seit in alle der mazse, als man vnserm vnd des reichs lantfogte doselbest billichen tun sol an vnser vnd des reichs stat vnd als das von alter herkomen ist, alle die wile vnd wir yn doran nicht widerruffen. Mit vrkund dicz brieffs versigelt mit vnserm kunglichen maiestat ingesigel. Geben zu Berne²⁸ nach Cristus geburte dreiczehenhundert jar, darnach in dem fumffvndachczigstem jare, des nehesten donrstags nach vnserr frawen tag assumpcionis, vnser reiche des Behemischen in dem dreyvndczwenczigsten vnd des Romischen in dem czehenden jaren.

Source Fulltext: Chartularium Sangallense X, Nr. 6104, S. 293-294.