Allen^a) den, die disen brief ansehent lesent oder ho^erent lesen, tůn ich V^olrich von Lo^enberg wilent her V^olrichs saelgen von Lo^enberg¹ || ritters elicher sun kunt vnd vergich offenlich mit disem brief fúr mich vnd fúr alle min erben, alz der ietzgenant her V^olrich saelig || von Lo^enberg min elicher vatter vnd Frik saelig von Lo^enberg² min elicher brůder luterlich durch gott vnd durch iro vnd iro vorderen selan || hailes willen ledklich vnd frilich geben ha^vnt dem comentúr vnd den brůdern gemainlich des hus ze Tobel³ sant Johans ordens des spitals von Jherusalem vnd zů desselben huses handen ain gůt Zůtzwile⁴ gelegen, daz man nempt des Tossers gůt, mit disen nachgeschribnen akkern wisen hofstetten holtz vnd veld vnd gemainlich mit allen rechten nútzen zinsen gewonhaiten vnd mit allen zůgeho^erden desselben gůts, des ersten ze ainer zelgge daz klain Linden⁵ a^ekkerli, des ain halbi juchart ist, der akker ze Brunstrasse, des ain juchart ist, der gross Linden akker, dez zwo juchart sint, vnd daz a^ekkerli ze der Bintzwis⁶, des ain halbi juchart ist, vnd ze der andren zeig des Tossers akkern zwischan den ba^echen, des ain halbi juchart ist, daz a^ekkerli bi den wingarten, des ain halbi juchart ist, vnd ain wisli och dar bi gelegen vnd Hainrichs von Loppen⁷ hofstatt, da sin stadel vfstatt, vnd die hofstatt, die niderthalb dar an stosset, vnd der gart dar bi gelegen, daz ietzo ia^erklich giltet ain viertel kernen vnd ain herbst hůn ze weglo^esin, vnd in der dritten zeig daz a^ekkerli ze dem húsli, des ain halbi juchart ist, der Mergelakker⁸, dez och ain halbi juchart ist, der akker ze der Struben foren⁸, des zwo juchart sint, die a^ekkerli ze Lubburg⁹ sint anderthalb juchart, ain juchart bi der múli ze Huwentobel⁸ vnd ze Haussrugg¹⁰ zwo juchart, vnd ain holtz ob dem dorf Zůtzwile gelegen, des zwo juchart sint, vnd des getailet ietzo Hainrich von Loppen ha^vt, daz ich mit wolbedachtem můt wilklich von besundren gnaden, so ich zů dem vorgedachten orden zů den brůdern vnd zů dem hus ze Tobel ha^vn, vnd och der obgedachten mines vatter vnd mines brůders saelgen vnd aller miner vordren selan vnd och miner sei ze trost vnd ze hail minen gůten willen vnd gunst geben ha^vn vnd gib och redlich vnd recht mit disem brief fúr mich vnd fúr alle min erben zů der vorgeschriben gab vnd gift, also daz ain comentúr, wer der ist, vnd die brůder gemainlich dez obgenanten hus ze Tobel der vorgenanten mines vatters vnd mines brůders saelgen selan dar vmb getrúwlich gen got gedenken vnd ia^erklich irú iarzit nach ires ordens sitten vnd gewonhait ietweders besunder began sont, des obgenanten mines vatter iarzit ia^erklich in der wochen, dar inne sant Laurencien tag vallet, vnd des vorgenanten mines brůders iarzit ia^erklich in der wochen, dar inne sant Verenen tag kumpt, a^vn geua^erd. Vnd wan ich daz alz wilklich vnd wolbedachtklich verhengd vnd minen willen dar zů geben ha^vn, so ha^vn ich mich hierúber gen den obgenanten brůdern des huses ze Tobel vnd gen allen iren nachkomen vnd och gen demselben hus redlich vnd recht fúr mich vnd fúr alle min erben verzigen vnd verzieh och wissentklich mit disem brief aller aigenschaft aller lehenschaft aller gewer aller kuntschaft alles rechten aller vordrung vnd ansprach, so ich ald min erben zů dem obgenanten gůt mit allen obgeschribnen rechten vnd zůgeho^erden ie gehatten oder hernach iemer me gehan gewinnen ald erwerben mo^echten von dehainerlay sach wegen. Vnd des alles ze offem vrkúnd der warhait so ha^vn ich V^olrich von Lo^enberg da obgenant min insigel offenlich gehenkt an disen brief. Der geben ist ze Lo^enberg vf miner burg, do man zalt von Cristus gebúrt drúzehenhundert vnd ahtzig jar, dar nach in dem fúnften jar, an der nechsten mitwochen vor sant Margrethen tag.

Source Fulltext: Chartularium Sangallense X, Nr. 6090, S. 276-277.