Wir^a) Wenczlaw von gots gnaden Romischer kung zu allen zeiten merer des reichs vnd kung zu Beheim bekennen vnd tun kund offenlichen mit || diesem brieff allen den, die yn sehent oder horent lesen, das wir mit gutem willen vnd rate vnser vnd des reichs fursten edeln vnd lieben ge||trewen mit Romischer kunglicher mechte den purgermeistern ammenn reten vnd purgern gemeinlichen der stette Costencz, Auspurg, || Basel, Nuremberg, Vlme, Esslingen, Rutlingen, Rotwil, Wil, Vberlingen, Memingen, Bibrach, Rauenspurg, Lindow, sante Gallen, Mulhusen, Pfulendorff, Kempten, Kauffburen, Lutkirchen, Isenen, Wangen, Nordelingen, Rotemburg vff der Tawber, Gemu^ende, Halle, Hailprun, Dinkelspuhel, Windesheim, Weissemburg, Wimpfen, Winsperg, Giengen, Alen, Bopfingen, Wil im Turgow, Buchorn vnd Buchow vnsern vnd des reichs lieben getrewen von besundern vnsern gnaden die fryheit vnd gnade verlihen vnd geben haben, das nv furbasmer sie alle oder irer iegliche besundern juden vnd judin vnser vnd des reichs camerknechte in ire stette entpfohen innemen vnd haimen sullen vnd auch die von vnsern vnd des reichs wegen halten versprechen schuczen vnd schirmen. Also was sie der von nv vnser frawen tag der liechtmessen, der allerschirest kommet, vber czwei jare die nehesten darnach furbasmer geniezsen, das sie vns vnd dem reiche das gleiche halbes sullen geben vnd folgen lassen one alles geuerde, vnd sullent auch des darumb iren trewen gelauben one alle geuerde, doch vnschedelich den stetten vnder yn, die wir vormals von der juden wegen vnserr camerknechte mit freyheit besurget haben, oder der juden, die von dem reiche vormals verseczet seind, das sie derselben freyheid, ab sie wont, geniezsen sullent nach auswisunge der brieffe, die wir yn vnd vnsere vorfarn an dem reiche vormals darumb geben haben. Vnd wenn sich die czall der jare, als wir sie vor begnadet haben, verruckent oder vswerden oder ob sie vor an dise gnade treten wolten, das sie denne diser vnser fryheit vnd gnade furbas auch genieczsen vnd die bruchen sullent. Mit vrkund dicz briues versigelt mit vnserr kunglichen maiestat ingesigel. Geben zum Purgelins nach Cristus gebúrte dreiczehenhundert jare, darnach in dem fumffvndachczigstem jare, des sontages nach sante Margareten tag, vnserr reiche des Behemischen in dem dreivndczwenczigesten vnd des Romischen in dem czenden jaren.

Source Fulltext: Chartularium Sangallense X, Nr. 6096, S. 286-287.