Wir Wentzlaw^e von gots gnaden Romischer kunig zu^e allen zeiten merer dez reichs vnd kunig zu^e Beheim bekennen etc., wann^e vnser kunigleicher wirdikeit von angeborner gute zugehort alle vnser vnd dez heiligen Romischen reichs lieben getrewen lant vnd auch lewt zu bedenken, wie sie mit muntzen besachet vnd besorget werden, wann^e aber wir nu^e kuntlichen vnd merklichen schaden vnd gebrechen an der muntz^e in den landen zu^e Swoben zu Franken vnd in andern vnsern vnd dez reichs steten vnd landen erfunden haben, den wir furbaz nicht mer leyden noch verhengen wollen, darvmb von Romischer kuniglicher maht mit wolbedahtem mu^et vnd rechter wissen setzen vnd wollen wir vnd gebieten auch allen gaistlichen vnd werltlichen herren steten vnd allen andern, die die mu^entz slahen vff Swartzburger³, Wirtzbu^erger⁴, Amberger⁵ oder waz mu^entz man vff den selben slag sleht, vnd sunderlichen vnd mit namen den fursten vnd herren in Swoben, die die posen haller slahen ern^estlichen vnd vesticlichen bey vnsern vnd dez reichs hulden, daz ir vnuerzogenlich aufhorent vnd dieselben muntz nicht mer slahet, vnd wo ir alle oder welcher vnter euch, ez sein herre oder stet, daz vberfurent vnd niht hielten, so sol daz furbaz ein valsch haissen vnd sein vnd sullen auch vnser vnd dez reichs stete mit namen die von Auchsburg, von Nuremberg, von Vlm, von Costnitz, von Esslingen, von Rewtlingen, von Rotweil, von Weil, von Vberlingen, von Memyngen, von Bybrach, von Rauensburg, von Lindaw^e, von sant Gallen, von Pfullendorf, von Kempten, von Kaw^efbu^erren, von Lutkirch, von Ysni, von Wangen, von Nordlingen, von Rotenburg vff der Tůber, von Halle, von Heilbru^enne, von Gemunde, von Dinkelspuhel, von Windshein, von Weissenbu^erg, von Winpfen, von Weinsberg, von Giengen, von Awlůn, von Popffingen, von Buchorn^e vnd die von Buchaw^e von vnserm kuniglichen gewalt, den wir in darvmbe gegeben haben, zu den selben muntzmeistern vnd zu^e den, die dieselben mu^entze slahen, richten vnd tu^en, als zu^e einem valsch von reht gehort. Wir wollen vnd setzen auch, daz alle vorgenanten vnser vnd dez reichs stete in Swaben vnd in Franken von vnserm kuniglichen gewalt furkomen vnd in iren steten gebieten sullen, daz furbaz allermeniclichen, er sey in iren steten burger oder niht, der dem andern schuldig ist, ie einer den andern bezalen sol vor den gesworen schawern, die dann die bu^erger vnd der rate in iclicher stat darvber gesetzt haben, als lang biz inan die haller vnd pfenning mu^entz vffwu^erffet, die wir verschriben haben noch awsweysu^eng dez briefs, den wir in darvmb besigelt geben haben, vnd wer daz vberfu^ere vnd vor den gesworen schawern also nicht bezalt vnd der sich dauon mit seinem eyde niht genemen mohte, der solt vnd mu^est der stat, dorin dann^e die bezalunge also geschehen wer, zu^e puzz^e geben vnd veruallen sein den zehenden pfenning von dem gelt, daz er also on die schawer het awzgeben oder eingenomen, wie vil dez gelts gewesen wer v^eber sechtzig pfenning, die mag man wol nemen on die schawer, vnd waz man also pfenning für die schawer bringet von Schwartzburgern, Ambergern oder waz pfenning man vff denselben slag sieht, die sullen sie alle wegen, vnd welicher pfenning funf vnd zweintzig vff ein Nu^eremberger lot gingen, die sullen die schawer versigeln. Wer aber, daz derselben pfenning mer dann^e funf vnd zweintzig vff ein Nuremberger lot gingen, so sullen die schawer die geringsten vnd die leichtsten als lang herawz lesen vnd zersneiden, vntz daz ir fu^enf vnd zweintzig vff ein Nuremberger lot gen werden on alle geuerde. Ouch setzen vnd wollen wir, daz ein icliche vorgenante stat bestellen sol, daz man daz gelt alle wochen an dem korn^e versuche, vnd welches gelt nicht bestünde an dem korn^e zehen lot vein lo^etig silber vnd sechs lot zusatz allez Nuremberger lot, daz ringer an dem ko^ern wer, dez sol man niht nemen vnd sol daz zersneiden vnd ob ir wol funf vnd zweintzig an ein lot gingen. Wir wollen auch, daz alle stet bestellen, daz die schawer alle wochen wissen, wie icliche muntze bestee an dem korn, vnd daz auch die schawer alle valsch pfenning, die fur sie komen, zersneiden. Mit vrkund ditz briefs^a-) versigelt mit vnser kúnglichen maiestat ynsigel. Geben zum Burglins nach Cristy gepúrt drivczechenhundert jare vnd darnach in dem fúnff vnd achczigisten jare, des nehsten suntages nach sant Margarethen tage, vnser ryche des Behmischen in dem XXIII^sten vnd des Ro^emischen in dem zechenden jaren^-a).

Source Fulltext: Chartularium Sangallense X, Nr. 6094, S. 283-285.