Wir Wenczlaw von gotes gnaden Romischer kunig zu allen czeiten merer des reichs vnd kunig zu Beheim || embieten den burgermeistern reten vnd gemeinden der stete Costnicz, Augsburg, Nuremberg, Vlme, Esslin||gen, Rutlingen, Wil, Vberlingen, Memingen, Bibrach, Rauenspurg, Lindow, sant Gallen, Pfullendorf, Mulhusen, || Kempten, Koufburren, Lutkirch, Ysni, Wangen, Nortlingen, Rotenburg, vff der Tawber, Gmunde, Halle, Halltprunn, Dinkelspuhel, Winczheim, Weissenburg, Wimpfen, Winsberg, Giengen, Aulen, Popfingen, Wil in Turgow, Buchorn vnd Buchow vnsern vnd des reichs lieben getrewen vnser gnade vnd alles gute. Wir haben dem edlen Hansen lantgrafen von Luthemberg dem jungen vnserm rate vnd lieben getrewen bescheiden, vfczuheben eynlef hundert schok Behemischer grosser Prager muncze von sulchen vierczig tusent guldein, als ir vns von der juden wegen yeczunt zugeben pflichtig seit, douon so heissen vnd gebieten wir euch ernstlichen mit diesem briefe, das ir dem egenanten lantgrafen so vil guldein fur die egenanten eynlef hundert schoke grosser, als sich das noch rechter werung geburen wirdet, von der egenanten summen genczlichen richten vnd beczalen sollet, wann so ir das getan habent, so sagen wir euch so vil guidein, als ir im noch rechter werunge beczalet habt, an der egenanten summen genczlichen vnd gar qweit ledig vnd loze. Mit vrkunt dicz briefs versigelt mit vnserm anhangendem insigel. Geben zum Burgleins des suntags noch sand Margreten tage noch Cristes geburde dreyczenhundert jare vnd dornach in dem fumfvndachczigisten jaren, vnserr reiche des Behemischen in dem XXIII vnd des Romischen in dem X jaren.

Source Fulltext: Chartularium Sangallense X, Nr. 6098, S. 288.