Wir die von Regenspurg vnd wir die von Basel frye stete vnd wir die burgermeister rate vnd alle burger gemeinlichen der nach geschriben dez heiligen Romischen richs stete Augspurg, Nurenberg, Kostintz, Vlme, Ezling¹, Reutling², Rotwiel³, Wiel⁴, Vberling⁵, Meming⁶, Bybrach⁷, Rabenspurg⁸, Lindaw^e9, sant Gallen, Pfullendorff¹⁰, Kemptten¹¹, Kauffbu^ern¹², Lu^etkirch¹³, Ysenyn¹⁴, Wangen¹⁵, Bucho^ern¹⁶, Gemunde¹⁷, Halle¹⁸, Heilpru^en¹⁹, Nordling²⁰, Rotenburg vff der Tauber²¹, Dinckelsbuhel²², Winpffen²³, Winsperg²⁴, Awln²⁵, Bopfingen²⁶, Gingen²⁷, Buchaw^e28, Winsheim²⁹ vnd Wissenburg³⁰ bekennen vnd veriehen offenlichen mit disem brieff vnd tůn kunt allen den, die in^e ansehen oder hornt lesen, daz wir mit gemein willen vnd gutem fursatz die fursichttigen vnd wisen die burgermeister rate vnd dorzu alle burger gemeinlichen riche vnd arme der stat zu Swinfurt³¹ dem heiligen Romischen riche zu eren vns vnd gemeinem lande zu fride vnd zu gemache zu vns in vnsern bůnt ingenůmen vnd enphangen haben vnd den sie auch gesworn haben einveltiglichen mit vns zu halten nach dez buntbrieffes lůt vnd sage, den wir dorvmb ein ander versigelt vnd gegeben haben. Vnd dorvmb so haben wir yetzo den selben den burgermeistern reten vnd allen burgern gemeinclichen der stat zu Swinfurt mit gutem willen gelobt versprochen vnd verheißen vnd versprechen in^e auch yetzo in kraft diez brieffes vff die eyde, die wir dem vorgenanten vnserm bu^ende gesworn haben, daz wir sie vnd ir stat bey iren fryheitten brieffen gute gewonheitten vnd auch rechten schirmen schutzen vnd auch beraten vnd beholfen sin sullen vnd wollen nach dez vorgenanten vnsers buntbrieffes lute vnd sage vnd auch zu iglicher wise vnd in allem dem rechten, alz wir dez ein ander verbunden sin vnd zu samen gesworn haben vnd alz sie mit nemlichen wortten bey vns in dem vorgenanten bu^entbrieff begriffen vnd verschriben wern oder den mit vns angefangen hetten, an allez geverde. Darzu sullent auch die selbe von Swinfurt mit namen alle wege einen vz irem rate zu vns zu dem sprůch setzen vnd senden on alle geverde. Mit vrkunde diez brieffes, den wir in^e dorvber besigelt geben mit vnser vnd der egenanten zweier stete Rotenburg vff der Tauber vnd der von Rabenspurg angehenckten insigelen, die auch daz von vnser aller heiszes wegen getan vnd ire insigele an disen brieff gehenckt hand. Der geben ist zu Rabenspurg dez nehsten zinstages vor sant Mertins tag, do man zalt von Cristes geburt drutzehen hundert jar vnd dornach in dem funf vnd achtzigsten jare.

Source Fulltext: Chartularium Sangallense X, Nr. 6117, S. 306-307.