Ich^a) Nyclaus Symler vndervogt ze Fro^vwenuelt¹ tůn kunt vnd vergich offenlich an disem brief allen den, die in sehent oder || ho^erent lesen, das fúr mich kâment in Scho^enawegen² an dem na^ehsten ma^entag nach sant Othmars tag, do ich da von des dúr||lúhtigen fúrsten mines gna^edigen herren herzog Lútpoltz von O^esterrich³ gewaltes wegen vnd an siner stat offenlich ze geriht || sass, der beschaiden Cůnrat Huntwiller burger ze sant Gallen an ainem tail vnd Johans Grúter von Êngen⁴ an dem andern tail vnd staltent sich da baidenthalb offenlich vor mir vnd dem geriht mit fúrsprechen, vnd klêgte da der selb Cůnrat Huntwiller mit sinem fúrsprechen zů dem obgenanten Johansen Grúter von Êngen, das er im vnd dem land ain scha^edlich man wa^er vnd das er ain fro^vwen, der lichame vor mir in dem geriht ze gegen stu^end, von dem libe getân vnd gemûrdet hêtt vnd wa^er ain sa^emlich man, das ich von siner missetât wegen billich v´ber in rihten so^elt, vnd batt mich darumb gerihtz zůtz im. Des antwúrte der obgenant Johans Grúter von Êngen mit sinem fúrsprechen vnd sprach, er lo^vgenti niht er hêtt die vorgedâhten fro^vwen von dem libe getân vnd erto^edet von zornes wegen, er hêtt si aber nit gemûrdet. Do frâgte ich vorbenemter vogt vrtail vmb vnd wart ertailt mit gemainer vrtail, wâ der obgenant Cůnrat Huntwiller gesweren mo^eht vnd o^vch swu^er ainen gelêrten ait zů den hailgen, das der obgenant Johans Grúter von Êngen die vorgedahten fro^vwen von dem libe getân vnd ermûrdet hêtt vnd darzů sehs êrber vnuersprochen man bi im hêtti, die geswêren mo^ehtint vnd o^vch swu^erint, das der ait, den er gesworn hêtt, rain wa^er vnd nit main, das er des geniessen so^elt vnd der obgenant Johans Grúter des engelten so^elt. Des antwúrte der obgenant Cůnrat Huntwiller mit sinem fúrsprechen vnd sprach, er wo^elt den ait swêren vnd die wîsung tůn vnd vollefu^eren mit sehs erberen vnuersprochnen mannen, als im ertailt wa^er. Vnd do der selb Cůnrat Huntwiller vnd die sehs erber vnuersprochen man mit im die ait tůn vnd sweren woltent, als in ertailt wart, do erliesse si der obgenant Johans Grúter von Êngen der aide vnd der bewîsung. Vnd veriach o^vch er do offenlich vor mir vnd dem geriht, do er vngebunden stůnd, des vorgedâhten mordes vnd das er die vorgedâhten fro^vwen ermûrdet hêtt. Vnd nâch der vergiht do batt mich der obgenant Cůnrat Huntwiller mit sinem fúrsprechen ervarn an ainer vrtail, was reht wa^er. Das tet ich vnd wart ertailt mit gemainer vrtail, sid der obgenant Johans Grúter von Engen des vorgedâhten mordes vnlo^vgenber wa^er vnd des selben mordes selber vngebunden vnd vnbezwungenlich veriehen hêtt an offenem geriht, das ich den selben Johansen Grúter von Êngen von des vorgedâhten mordes vnd mîssetât vnd von des gerihtes wegen dem nâchrihter beuelhen so^elt vnd das in der ainem ross an den swantz binden vnd in schlaipfen vnd im sinú bain sine armen vnd sinen ruggen brechen so^elt vnd das er in dem ertrich empfro^emden vnd dem luft enphelhen vnd in vff ain rade setzen so^elt. Vnd wa^er, das ieman den obgenanten Cůnrat Huntwiller oder ieman andre, die an des selben Johansen Grúters von Êngen vanknust vnd an sinem tode mit ra^eten oder mit geta^eten dehain schuld hettint, vehtint angriffint oder schadgotint an ir lip oder an ir gůt, das die selben in allen den schulden stan vnd sin sont als der obgenant Johans Grúter von Êngen stůnd, do im der lib widertailt was. Vnd ze vrkúnd der wârhait aller vorgeschribner dinge so han ich Nyclaus Symler vndervogt da vorgenemt von des gerihtes wegen min insigel gehenkt an disen brief, won es mit gemainer vrtail ertailt wart, das ich es tůn so^elt. Dis beschach vnd wart dirr brief geben in Scho^enawegen an dem vorgeschriben ma^entag in dem iâre, do man zalte von Cristus gebúrt drúzehenhundert jâr vnd darnach in dem fúnf vnd ahtzigosten jâre.

Source Fulltext: Chartularium Sangallense X, Nr. 6120, S. 308-309.