Allen^a) den, die disen brief ansehent oder ho^erent lesen, kúnden wir Eberhart Wu^est vogt vnd der rât der statt ze || Rapreschwil¹ vnd veriechent offenlich mit disem brief, daz fúr v´ns kamen fúr gericht Hans von Wilberg² sesshafft || ze Gúndisow³ ze ainem tail vnd frô Bry^d geborn von Húnwil⁴ sîn elichi wirtinn ze dem andern tail. Hans von || Wilberg offnot mit sinem fúrsprechen, daz er der selben frô Bryden siner elichen wirtinn schuldig wa^er vnd gelten so^elt viertzig guldin gůter vnd ga^eber an gold vnd an gewiht, die sy fúr in Růdolff dem Keller geben vnd golten hette, fúr die selben viertzig guldin wo^elt er ir vnd iren erben fúr sich vnd sin erben lediklich vnd lôs vffgeben sîn vischentzen vnd va^echer in den Hurden⁵ in frônvach in stok vnd in stritvach vnd die darzů ho^erent, geltend ja^erlich acht hundert vnd ain vierling a^elbellen geltz, vnd do daz geoffnot vnd fúrgeleit ward, do stůnd der vorgenant Hans von Wilberg dar vnd gab dúselben va^echer vnd daz a^elbellen gelt lediklich vnd lôs vff an den stab vnd vertigot daz ze der vorgenanten fro Bryden siner elichen wirtinn handen vnd in ir gewalt mit allen den worten werchen ra^eten vnd geta^eten, so dar zů hort vnd notúrfftig waz vnd als gericht vnd vrtail gab vnd erber lút ertailten vff den aid, die dar vmb gefragt wurden, daz die duht, daz es beschehen wa^er, daz es billich krafft vnd macht hette nu vnd hie nach. Vnd dez alles ze ainem vrkúnd der warhait so haben wir die obgenanten der vogt vnd der rât der statt ze Rapreschwil der selben vnser statt insigel von dez gerichtz wegen, won daz ertailt ward, offenlich gehenkt an disen brief. Dis beschach vnd ward dirr brief geben, do man von Crists gebu^ert zalt drútzehenhundert jar vnd dar nach in dem fúnf vnd achtzigosten jar, an dem na^echsten zinstag vor sant Gallen tag. Hie bi warent die ra^et gemainlich.

Source Fulltext: Chartularium Sangallense X, Nr. 6112, S. 300-301.