Allen den, die disen brief ansehent lesent oder ho^errent lesen, kúnden wir dis nachbenanten Herman Philipp, den man nempt Hochdorff, burger ze [Rheinegge]^a), Wetzel vnd Johans sin elichen sún vnd veriehin o^vffennlich mit disem briefe fúr v´ns vnd alle v´nser erben vnd nachkomen, das wir [alle]^b) dry mit ainberem willen vnd mit gůter vorbetrachtung den mittlesten wingarten gelegen in der Grůb² enent der burg ze Rinegg, der ainhalb stosset an v´nsern wingarten vnd anderthalb an der Nostler wingarten, der selb vorgeschriben wingart v´nser recht ledig aigen was, mit grund mit grât mit stegen mit wegen mit allen rechten nútzen vnd gewônhaiten vnd mit allem dem, so von recht oder von gewonhaiten zů dem selben wingarten ald darin geho^ert, es sy genemptz alder vngenemptz gesůchtz oder vngesůchtz wissentz oder vnwissentz, redlich vnd recht ains jemerwerenden sta^eten ewigen kouffz verkouffet vnd ze kouffent geben habent dem erberen wolbeschaidnen Burkarten Kolben dem eltern vnd sinen erben, o^vb er enwa^er, vmb hundert pfunt vnd vmb zwainzig pfunt pfening gůter vnd gena^emer Costentzer múns, dero wir gantzlich vnd gar von im gewert sint vnd enpfangen habent vnd an v´nser aller gemeinen nutz bewendet an den stetten, da wir v´nsern grôssen wachsenden schaden mit verkômen habent, den selben vorgenanten wingarten habin wir dem egenanten Burkart Kolben mit allen rechten vnd mit aller zůgeho^erd, als vor ist beschaiden, fúr ain recht ledig aigen recht vnd redlich o^vffennlich an des richz strauss vfgeben vnd zů sinen handen geuertgôt mit allen den worten werken vnd geta^eten, so nach gewonhait vnd nach recht darzů gehôrten ald ho^erren soltend vnd nôtdúrfftig warent vnd als es kraft vnd macht sol vnd mag hân, vnd sunderlich mit so^elicher beschaidenhait vnd in dem rechten dinge vnd gedinge, das der obgenant Burkart Kôlb vnd alle sin erben vnd nachkomen, in dero hand der vorgenant mittlest wingart gelegen in der Grůb jemer kompt, steg vnd weg durch v´nsern bomgarten by dem vorgenanten wingarten gelegen in den selben wingarten vnd darus haben sont vnd iren buw darin ze legen, wenn vnd wie dik sy wellent vnd des bedurffent vnd notdúrfftig sint, ân alle geuerde. Vnd darvmb so habent wir v´ns willenklich verzigen vnd verzihent v´ns mit vrkúnd dis briefes gantzlich vnd gar fúr v´ns vnd fúr alle v´nser erben des vorgenanten mitlesten wingarten in der Grůb mit aller zůgeho^erde aller aigenschaft aller lehenschaft aller kontschaft aller gewer lút vnd brief alles gaistlichen vnd weltlichen rechtes aller vordrung vnd ansprâchen aller reht vnd rechtung, so wir o^vder v´nser erben an dem zů dem vnd von des vorgenanten wingarten wegen vnd was darzů vnd darin geho^ert je gehept habent ald hienach jemer gehaben oder gewúnnen mo^echtint, vnd das wir no^vch dehein v´nser erben noch nieman andrer an v´nser statt no^vch von v´nser wegen den vorgenanten Burkart Ko^vlben no^vch dehain sin erben nôch nachkomen von des vorgenanten wingarten wegen vnd was darzů vnd darin geho^ert niemer so^ellent no^vch wellent ansprechen vftriben bekúmmeren bekrenken no^vch in dehain wis beschwa^eren weder mit gaistlichem no^vch weltlichem gericht no^vch ân recht noch mit enkainerlay ander sachen ân alle geuerde. Wir habin ouch gelo^vpt mit v´nsern trúwen vnd lobent mit disem briefe fúr v´ns vnd alle v´nser erben, des vorgeschribnen mitlosten wingarten in der Grůb mit aller zůgeho^erde vnd des kouffz fúr ain recht ledig aigen recht wer ze sinne nach des landes recht vnd ouch den vôrbenanten Burkart Kolben vnd sin erben darvmb ze versprechen vnd ze verstenne an allen stetten gen allermenglichem ân allen iren schaden, wenn wâ vnd wie dik sy darvmb angesprôchen geschadgôt oder vfgetriben werdent mit dem rechten. Vnd ze vrkúnd der wârhait aller der vorgeschribnen dinge vnd gedinge so habin wir die vorbenanten Herman Phylipp, den man nempt Hôhdo^vrff, Wetzel vnd Jôhans sin elichen sún fúr v´ns fúr alle v´nser erben vnd nachkômen v´nsry insigel o^vffennlich gehenkt an disen brief. Der geben ist ze Rinegg an sant Symons vnd sant Judas a^vbend in dem jâr, do man zalt von Crysts gepurt drúzehenhundert jâr, ahtzig jâr vnd darnach in dem fúnfften jâre.

Source Fulltext: Chartularium Sangallense X, Nr. 6114, S. 302-303.