Ich^a) Jacob Růpreht, den man nemmet der Lo^ew, statamman ze sant Gallen¹ tůn kunt vnd vergich offenlich mit disem brieue allen, || die in sehent lesent oder ho^erent lesen, daz fúr mich kament ze sant Gallen in der stat an dem tag, alz dirre brief geben ist, do ich || offenlich ze geriht saz armen vnd richen, die beschaiden lút Hainrich von Mitmenswille², den man nemmet Ka^emlis Gaiss, vnd Anna || Tremlin sin elichi wirtinn vnd nament ze fúrsprechen Johansen Widmer burger ze sant Gallen, der offenot an iro stat vnd von iro baider wegen offenlich vor mir an gemainem geriht vnd sprachent, daz sv´ mit wolbedahtem můt vnd mit ainberem willen den hof ze Aicha³, der dez spittals ze sant Gallen reht aigen ist vnd den sv´ vor etwauil zites von dez selben spittals phlegern ze ainem rehten erbzinslehen vmb ainen sta^eten zins enphangen hettint, der selb hof ainhalb stosset an der Bo^ek sa^elgen hof vnd anderthalb an die gu^eter ze Mo^erswille⁴, mit allen rehten vnd mit aller zv^o geho^erde den nachgenemten Bartholome dem Blarrer, V^olrich Ru^edgern vnd V^olrich Ko^echler phleger der siechen dez selben spittals ze sant Gallen an dez selben spittals stat vnd zv^o sinen handen wider vf geben vnd ledig vnd los gelassen hettint, vnd wo^eltint sich o^vch dez selben erblehens vnd aller der reht vordrung vnd ansprachen, die sv´ an dem ald zv^o dem vorgeschribenen hof ze Aicha vnd waz darzů vnd darin gehorti ie gehept hettint ald hienach iemer gehaben oder gewinnen mo^ehtint, willeklich verzihen gantzlich vnd gar fúr sich vnd fúr alle iro erben, vnd batent mich mit irem fúrsprechen eruarn an ainer vrtail, wie sv´ daz tůn so^eltint vnd mo^ehtint, alz reht wa^er vnd daz ez kraft hett vnd haben mo^eht nv vnd o^vch hie nach. Daz tet ich vnd ward ertailt mit gemainer vrtail, daz die vorgenant Anna ainen vogt nemen so^elt mit dez vorgenanten ir elichen mannes willen an dem ring, wen si wo^elt, vnd daz si der ze drin malen vsser dez gerihtes ring fu^eren so^elt vnd si fragen, ob si ez willeklich vnd gern ta^et vnd tůn wo^elt, vnd daz si daz danne mit ir vnd mit dez selben ir vogtes handen vnd der vorgenant Hainrich von Mitmenswille mit siner hant vnd o^vch mit dez gerihtes stab tůn vnd darnach sweren so^eltint ainen gelerten aid ze den hailigen, daz sta^et ze habenn vnd da wider niemer ze komenn noch ze tu^enne vnd daz ez danne also wol kraft vnd maht hetti nach dem rehten. Do nam si mit dez vorgenanten ir elichen mannes willen ze vogt Hainricen Garnleder den schriber o^vch burger ze sant Gallen, der fůrt si ze drin malen vsser dez gerihtes ring vnd fragot si alz ertailt waz, ob si ez willeklich vnd gern ta^et vnd tůn wo^elt, der sait ze ieklichem mal bi sinem aide, daz si spra^ech, daz si ez vnbezwungenlich ta^et vnd willeklich vnd gern tůn wo^elt, vnd verzigent sich o^vch do die vorgenemten Hainrich von Mitmenswille mit siner hant vnd Anna sin elichi wirtinn mit ir vnd mit dez selben Hainrices Garnleders ir vogtes handen vnd o^vch mit dez gerihtes stab, alz reht sitte vnd gewonlich waz vnd alz o^vch mit gemainer vrtail ertailt ward, vnd verzihent sich mit disem brieue gantzlich vnd gar fúr sich vnd fúr alle iro erben dez vorgeschribenen erblehens vnd aller der reht vordrung vnd ansprachen gaistlichs vnd weltlichs gerihtes, so sv´ oder iro erben zv^o dem vorgeschribenen hof vnd erblehen ze Aicha vnd waz darzů vnd darin geho^ert ie gehept hant ald hienach iemer gehaben oder gewinnen mo^ehtint, vnd swůrent o^vch do die vorgenemten Hainrich von Mitmenswille vnd Anna sin elichi wirtinn ietwedres besunder willeklich ainen gelerten aid ze den hailigen mit vfgehabenen vingern, daz sv´ noch iro erben noch nieman andre an iro stat noch von iro wegen die vorgenemten phleger noch dehain iro nachkomen noch den vorgedahten spittal ze sant Gallen von dez vorgeschribenen erblehens noch hofes wegen ze Aicha vnd waz darzů vnd darin geho^ert niemer súllent noch wellent ansprechen vftriben bekúmberren bekrenken noch in kain wis beswa^eren weder mit gaistlichem noch mit weltlichem geriht noch an reht noch mit enkainer lay ander sachen ân alle geua^erde. Vnd ze vrkúnd der warhait aller der vorgeschribenen dinge vnd vergiht so han ich Jacob Růpreht amman da vorgenemt von dez gerihtes wegen min insigel mit vrtail offenlich gehenkt an disen brief. Darnach veriehent wir die vorgenemten Hainrich von Mitmenswille, Anna sin elichi wirtinne, Hainrice Garnleder ir vogt vnd Johans Widmer fúrsprech in der vorgeschribenen sache ainer gantzzer warhait aller der dinge, so von v´ns an disem brief da vorgeschriben stant, vnd ze merer sicherhait der selben dinge so haben wir die vorgenanten Hainrice Garnleder vnd Johans Widmer o^vch v´nserú insigel gehenkt an disen brief, vnder dez selben Hainrices Garnleders mines vogtes insigel ich die obgenant Anna mich willeklich gebunden han, vnd ich vorbenemter Hainrich von Mitmenswille han mich willeklich gebunden vnder dez obgenanten Johansen Widmers insigel, won wir aigener insigel niht habent, wâr vnd sta^et ze lassenn alles, daz von v´ns da vorgeschriben stat an disem brief. Der geben ist ze sant Gallen an dem na^ehsten ma^entag nach vnsers herren vffart tag in dem jar, do man zalt von Cristus gebúrt drúzehenhundert jâr, ahtzig jar vnd darnach in dem sehsten jare.

Source Fulltext: Chartularium Sangallense X, Nr. 6146, S. 337-338.