Wir^a) Albrecht von gots genaden hertzog ze O^esterrich¹ ze Styr ze Kernden vnd ze Krain graf ze Tyrol etc., Fridrich von gots genaden byschof ze Strasburg², graf Růdolf von Hochemberg³, graf Johans von Habspurch⁴ der junge, graf Berchtolt von Kyburg⁵, grefin Elyzabetha von Núwemburg⁶, Henman von Krenkingen⁷ ein frye, wir die burgermeistere || schultheissen vnd rete der stetten Basel, Zúrich, Luczern⁸, Bern, Burgdorf⁹, Thun¹⁰, Vndersewen¹¹, Arberg¹², Louppen¹³, Solotren¹⁴, Colmer¹⁵, Múnster¹⁶ in sant Gregrorien tal, Keysersperg¹⁷, Múlhusen¹⁸, Richenwilre¹⁹, Zellemberg²⁰ vnd Thu^erenkein²¹ tu^end kunt vnd veriehent offenlich mit disem brief, wand vil grosser gebresten von der múncze || vnd der bo^esen phenningen wegen in disen landen dahar bi gůter verlůffener zite gewesen sint, solichen gebresten ze versorgende ze versehende vnd ze wendende sien wir mit gůter vorbetrachtung vnd rate einhellenklichen diser nachgeschribenen tedinge vnd ordenunge durch gemeines nutzes willen v´berein komen vnd habent versprochen vnd || glo^vbt versprechent vnd globent mit disem brief wir hertzog Albrecht bi v´nsern fu^erstlichen trúwen vnd eren vnd wir die andern, als vor vnd nachgeschriben sint, bi den eyden, als hie nach begriffen ist, daz wir die halten vnd vollefu^eren súllent vnd wellent dise nechste zehen gantze jare, die schierest nachenander kúnftig sint nach date diz briefs ze komende, jeglicher da er gewalt het, ane geuerde. Wir der egenant hertzog Albrecht fu^er v´ns vnd v´nsere lieben vettern hertzog Lúpoltz^21a wilent v´nsers lieben brůders seligen gedencznússe súne in vnsern stetten Friburg in Brisgo^ewe²², Schafhusen²³, Brisach²⁴, Zouingen²⁵, Vilingen²⁶, Berghein²⁷ vnd ouch ze Tottenowe²⁸, die ieczo múnczen habent, so denne Rinfelden²⁹, Sekingen³⁰, Waltzhůt³¹, Diessenhouen³², Stein³³, Wintertúr³⁴, Zelle³⁵, Raprechtswilr³⁶, Frowenfeld³⁷, Surse³⁸, Wietlispach³⁹, Olten⁴⁰, Arowe⁴¹, Brugge⁴², Meilingen⁴³, Baden⁴⁴, Bremgarten⁴⁵, Lentzburg⁴⁶, Arburg⁴⁷, so denne Núwemburg⁴⁸, Kentzingen⁴⁹, Endingen⁵⁰, Altkilch⁵¹, Phirt⁵², Befůrt⁵³, Blůmemberg⁵⁴, Tattenriet⁵⁵, Masmúnster⁵⁶, Tanne⁵⁷, Sennhein⁵⁸ vnd Ennsishein⁵⁹ vnd in den landen vnd kreissen, dar inne die múntze gat, wir Friderich bischof ze Strasburg in vnsern stetten Rufach⁶⁰, Sultz⁶¹, Egenshein⁶², zem Heiligen Cru^etze⁶³, Marggoltzhein⁶⁴ vnd in den landen vnd kreissen, dar inne die mu^entze gat, wir graf Růdolf von Hochemberg, graf Johans von Habspurch, graf Berchtolt von Kyburg, grefin Elyzabetht von Núwembu^erg vnd Henman von Krenkingen ein frye in den stetten Rotemburg⁶⁵, Louffenberg⁶⁶, Wangen⁶⁷, Núwemburg, Tu^engen⁶⁸ vnd als verre wir gewalt habent, vnd wir die vorgenanten bůrgermeistere schultheissen vnd rete in den obgenanten stetten, wir Imer von gots gnaden bischof ze Basel⁶⁹, Wilhelm von den selben gnaden abbet ze Můrbach⁷⁰, Brvn herre ze Rapoltstein⁷¹ vnd graf Heinrich von Sarwerde⁷² herre in der obern stat ze Rapoltswilr⁷³ veriehent ouch mit disem brief, wie doch wir zů disen ziten múntzen nút habent, daz wir dise tegdinge vnd ordenunge wir Imer bischof ze Basel fúr vns vnd vnser stette Telsperg⁷⁴, Louffen⁷⁵, Liestal⁷⁶, Biel⁷⁷ vnd die Núwenstat⁷⁸ vnd da wir gewalt habent, wir Wilhelm abt ze Můrbach fúr vns vnd vnser stette sant Amarin⁷⁹, Watwilr⁸⁰ vnd Gebwilr⁸¹ vnd da wir gewalt habent, wir Brun vnd graf Heinrich von Sarwerd fu^er v´ns, die von Rapoltswilr vnd in den landen vnd kreissen, da die múntze gat vnd wir gewalt habent, stete vnd veste halten wellent, so verre si v´ns vnd si anru^erent, ouch ane geuerde. Wir die bůrgermeistere schultheissen rete vnd bůrgere der vorgenanten stetten Fribůrg in Brisgo^ewe, Schafhusen, Brisach, Zouingen, Vilingen, Berghein, ze Tottenow, Rinfelden, Sekingen, Waltzhůt, Diessenhouen, Stein, Wintertúr, Zelle, Raprechtswilre, Frowenfeld, Surse, Wietlispach, Olten, Zouingen, Arow, Brugg, Meilingen, Baden, Bremgarten, Lentzburg, Arburg, Núwemburg, Kentzingen, Endingen, Altkilch, Phirt, Befůrt, Blůmemberg, Tattenriet, Masmúnster, Tanne, Sennheim, Einsishein, Rufach, Sultz, Egenshein, zem Heiligen Crútze, Marggoltzhein, Rotemburg, Louffemberg, Wangen, Núwemburg, Tůngen, Telsperg, Louffen, Liestal, Biele, zer Núwenstat, sant Amarin, Watwilr, Gebwilr vnd Rapoltswilr veriehent ouch, daz dise tegdinge vnd ordenung mit vnsern gůten willen vnd gunst beschehen sint, vnd hant si ouch globt vesteklich vnd getrúwelich ze haltende, so verre si v´ns anru^erent, vnd da wider nút ze tůnde ane geuerde. Vnd wir die re^ate vnd bůrgere ze sant Vrsinen⁸² vnd ze Waltkilch⁸³ habent ouch globt, die selben ordenung stete ze habend, so verre si v´ns ouch anru^erent, ane geuerde. Vnd sint diz die tegdinge vnd ordenunge, der wir v´berkomen sint. Dez ersten daz wir die vorgenanten herren vnd stette so^ellent slahen ein phund fu^er einen guldin vnd so^ellent geben vmb ein mark silbers sechs phund derselben múntze vnd nút me vnd so^ellent tůn zů ie einer mark sechs lot spis vnd so^ellent schroten vf vier lot ein phund vier schilling vnd vier phenning, vnd so^elent derselben phenningen drissig vnd vierdhalb schilling sechstehalb lot wegen vnd so^ellent die selben sechstehalb lot vier lot vines silbers vsser dem fúre geben, so man si versůcht. Den knechten sol man geben von ie der mark ze lone zwein schilling vnd acht phenning vnd vf zweintzig mark drú lot ze fúrgewicht. Es sol ouch ieder herre vnd stat drie erber manne vsser irren reten kiesen vnd zů der múntz setzen, wenne vnd wie dike ez inen fůglich ist, die ouch liplich zů den heiligen sweren súllent, die phenning ze versůchende, e daz man si malet, vnd sol ouch der die phenning ze malende het, sweren zů den heiligen, keinen phenning ze malende denne die, die im geantwurt werdent von denen, die zů der múntze geordenet vnd gesetzet sint ze versůchende. Vnd wenne man si versůchet, weles werch denne ze ringe funden wirt, daz ist daz phund ain vierdung v´ber vier phenning, die sol man wider in setzen vnd brennen, vnd sol der múntzmeister den schaden haben. Wurde ez aber als swach funden v´ber drú male, daz die, die es versůchend vf ir eide dünkte, daz es ze geuarlich were, die ouch daz bi iren eiden fu^erderlichen fúr ir herren vnd rete bringen so^ellent, so sol man ouch denne zů dem múntzmeister richten nach recht. Ouch múgen wir die vorgenanten herren vnd stette, welen daz vnder v´ns fůglich sit, v´nser phenning ortdacht oder sinwel machen vnd so^ellent vnser ieglicher ir merklich zeichen dar in slahen, doch also, daz die phenning bi dem silber schrote vnd gewichte vnd ouch die lo^ene der múntzmeistere vnd knechten bliben, als vor geordenet ist. Es so^ellent ouch ie der herre vnd stat die múntzmeistere vnd knechte, der si gewalt habent, halten vnd dar zů wisen, daz si bi den selben lo^enen blibent vnd dar vmb werkent, ob si sich da wider sperren wolten. Item wer die phenning beschrotet vnd vsliset, dem sol man die vinger abslahen vnd in hengken. Item wer ouch dise núwen phenning vsliset vnd si brennet, der sol lib vnd gůt veruallen sin dem herren oder stat, da er sesshaft ist vnd hingeho^eret. Item wer silber oder gemúntzet gelte von dem lande fůrte, in welher stat oder der herren stetten landen vnd gebieten der da mit begriffen wurde, daz sol der stat oder dem herren, vnder dem er gesessen ist vnd in zůgeho^ert, volgen vnd bliben vnd inen da zů besseren nach ir erkantnússe. Were aber, daz er da mit nút begriffen wurde vnd sust von iemant darvmb angesprochen vnd mit zwein erbern mannen wurde erzúget, oder mo^echte er sin mit sinem eide nit vsgan, so sol er dem herren oder der stat, da er denne hingeho^ert, so vil gůtes, so er verfu^ert het, veruallen sin vnd dar zů inen ouch bessern nach ir erkantnússe, oder man sol im ein hande absiahen, ob er dez gůtes nút haben mo^echt. Item es so^ellent ouch die herren vnd stette menglich, es sien phaffen leyen geistlich oder weltlich cristan vnd juden gebieten vnd sweren heissen, wer silber hat oder im wirt, es si gebrant silber geslagen silber bruchsilber oder phenningsilber, daz si verkouffen wellent, daz si daz niemant ze kouffende gebent, der ez von dem lande fu^ere, noch si ez selber von dem lande verfu^eren, vnd sol ouch ein ieglicher herre vnd stat daz selb bi inen versorgen, so si beste múgent, vnd wer daz v´berfu^ere, der sol ze besserung veruallen sin die vorgenant pene vnd ouch daz einer den andern ru^ege bi dem selben sinem eide, wer daz v´berfu^ere. Item were ||
ouch iemant, wer der were, der dehein múntze slu^ege, die valsche were oder dar zů nút recht hette, dem sol man an lib vnd an gůt griffen vnd von im richten nach recht ane gnade, vnd so^ellent wir alle bi vnsern eiden enander darzů beraten vnd beholffen sin getrúwelich, so verre wir múgent, fúrderlichen vnd als bald daz fu^erbracht wirt. Item wer ouch semlich bo^ese múntze geuarlichen brechte vnder die andern múntzen, si werent geistlich oder weltlich personen fro^ewen oder man, ab denen sol man richten als vorgeschriben stat. Item waz ouch geltschulden gemachet sint bi einem iare vor dirre ordenunge vnd datum diz briefs, die mag vnd sol man bezalen vnd gelten mit denen phenningen, die ouch sidmals gemúntzet sint, hinnanthin bis vf sant Martins abent nechst komende vnd darnach nút. Waz aber vor einem jare geltschulden gemachet sint, die sol man gelten vnd bezalen mit semlichen phenningen, so man ietz slahende wirt. Wa aber widerko^effe ouch bi einem jare gemachet sint, die mag man ouch ablo^esen vnd widerkouffen biz zů vnser frowen tag zer liechtmesse ze nechst, also daz man ie ein phund dirre núwen múntze geben sol fúr drissig schilling haller oder mitlin. Item es sol ouch dehein wechsseler noch niemant ander, wer der sie, me vmb einen gemeinen gůten guldin geben denne ein phund der egnanten pheningen noch ze gewinne nemen denne zwein phenning an einem guldin, so er in herus verkouffen wil, dez si ouch alle sweren so^ellent. Vnd waz si guldiner inkouffent, die so^ellent si ouch fu^erderlich her wider vß verkouffen, wenne es an si geuordert wirt, bi denselben eyden. Weler daz v´berfu^ere vnd die guldin thúrer ko^vufte oder verko^vuffte, der sol fúnff phund ze besserung veruallen sin dem herren oder stat, da er denne hin geho^ert, als dicke daz beschicht, vnd sol ouch eins daz ander ru^egen, wer daz v´berfu^ere. Item es so^ellent alle múntzmeistere zů den heiligen sweren, diz also vngeuarlich ze haltende vnd ir knechte ouch dar zů halten ze swerende, die phenning glich zů dem seyer ze schrotende vngeuarlich. Item es so^ellen ouch alle herren lantuo^vgt vnd amptlúte vnd alle vo^egte schultheissen rete vnd burgere, die múntzen habent, vnd ouch alle andere vo^egte schultheissen rete vnd burgere, die nút múntzen habent vnd in den landen vnd kreissen sint, da die múntzen gant, vsgenommen hertzog Albrecht vorgenant, der bi siner fúrstlicher trúwe diz globt hat, als vorgeschriben ist, sweren liplich zů den heiligen, dise ordenung vnd stúke alle getrúwelich ze haltende ze vollefu^erende vnd ze besorgende vnd ouch die iren dez selben sweren heissen vnd ouch dar vmb ze richtende, als vorgeschriben stat, die vorgenanten zehen jare vß ane geuerde. Item wenne ouch die lantuo^egt amptlúte vnd rete verkert werdent, so so^ellent die núwen, die an der stat koment, sweren in aller masse, als die vordem getan habent, diz ze haltend. Item were ouch, ob iemand, der in disen múntzen sesshaft were, ein múntze erworben hette oder noch erwúrbe, der sol dise ordenung nemen vnd halten vnd sol ouch die versorgen mit brieuen vnd eyden in aller wise, als vorgeschriben stat. Tete er dez nút, so sol man sin múntze verbieten vnd nút nemen, als verre die múntzen gangent, die gehorsam sint. Vnd wer im silber zů fůrte, der sol die pene liden, als ob er ez von dem lande fůrte. Item man sol die núwen múntze in allen stetten vnd kreissen, als wite si gat, nemen nach dem wechssel, als vorbescheiden ist. Item ouch ist beret, daz wir alle, die da múntze habent, hinnanthin ierlichs oder in der jarsfriste, ob deheinen herren oder stat dungkte, daz gebreste har in vallen wolte vnd ez notdu^erftig were, gen Rinfelden in die stat komen so^ellent, vns da ze vnderredende von dez gebresten wegen, ob deheiner har in viele oder genallen were, den ze wendende vnd ze versorgende, so verre wir vermúgent. Oder were, daz wir alle oder der merteile vnder v´ns v´ns vf vnser eide erkantent, daz har inne v´tzit ze besserende ze minrende oder ze merende were, daz wir ouch daz wol tůn múgent. Vnd mag ouch daz ein ieglicher herre oder stat, die deheinen gebresten befundent, die dirre ordenung schedelich vnd vnnútze werent, die andern alle dar vmb manen gen Rinfelden ze komende, daz ze wendende vnd ze versorgende, als vorgeschriben ist, ane geuerde. Ouch so^ellent dise vorgenanten tegdinge alle vollefu^ert werden vnuerzogenlich vnd ane alle geuerde. Ez ist ouch ze wissende, daz dirre ordenung zwein brief gemachet sint vnd mit dirre nachgeschriben herren vnd stetten ingesigeln versigelt, der einer ze Baden hinder dem obern lantuo^vgt, der ie ze ziten ist, liggen sol, vnd der ander hinder den reten der stat Basel ze gemeinen handen, als ouch daz nemelich beret ist. Har v´ber ze einem steten waren vrkúnde dirre vorgeschriben dingen so ist dirre brief mit vnser der vorgenanten hertzog Albretz, graf Růdolfs von Hochemberg, graf Johans von Habspurg, graf Berchtoltz von Kyburg, grefin Elyzabeth von Núwemburg, Henmans von Krenkingen fryen vnd ouch vnser der egeschriben stetten Zúrich, Lutzern, Bern, Burgdorf, Tun, Vndersewen, Arburg, Louppen, Solotren, Schafhusen, Zouingen, Rinfelden, Sekingen, Waltzhůt, Diessenhouen, Stein, Winterthúr, Zelle, Raprechtswile, Frowenfeld, Surse, Wietlisach, Olten, Arow, Brugg, Mellingen, Baden, Bremgarten, Lentzburg, Arburg, Rotemburg, Louffemberg, Wangen, Núwemburg, Tůngen, Biele vnd der Núwenstat anhangenden ingesigeln versigelt vnd bliben sol hinder den reten der stat Basel in der wise, als vorgeschriben stat. Were ouch, daz diser brief nút vo^elleklichen mit den insigeln, die dar an geho^erent, besigelt wurde, so sol er doch in sinen kreften bliben vnd dar in nút gebrochen werden. Vnd wer in nút besigelte, der múntze hat, dez múntze sol man verru^effen vnd nút nemen, ane geuerde. Diz beschahe vnd wart dirre brief geben ze Basel in dem jare, do man zalt von gots gebúrt drúzehen hundert achtzig vnd siben jare, an dem nechsten samstag nach vnser frowen tag ze herbste.

Source Fulltext: Chartularium Sangallense X, Nr. 6208, S. 411-416.