Allen^a) den, die disen brief ansehent lesent oder ho^errent lesen, tůn ich V^olrich Ru^edger burger ze sant Gallen kund vnd vergich || offenlich mit disem brief fúr mich vnd alle min erben, das ich reht vnd redlich in aines besta^eten ewigen vnwiderru^effenden ko^vffes || wise ze ko^vffenn geben ha^vn dem beschaidenn Hainrichen Klinger dem schmid burger ze Wil¹ vnd sinen erben dis nachgeschriben wisan || vmb zwainzig vnd nún pfund gůter ga^eber genger vnd Ytaliger haller, der ich o^vch von im gantzlich vnd gar gewert bin vnd an minen offnen nútz bewendet, vnd die selben wisa ich im fúr reht ledig aigen ze ko^vffenn geben ha^vn. Vnd sint das die wisan, item ain wis ist gelegen vff Wilmatt² vnd stosset ainhalb an der kylchen wisan vnd andrenthalb an Hans Kramers von Zůtzwille³ wisan vnd stosset obnan an Hansen Masnangs wisun vnd vndan aber an der kylchen wisen, item ain halb wisan ist gelegen im riet ze Wil, da das ander halbe tail Cůnrad Sennen ist, vnd stosset ainhalb an des erwirdigen herren Cůnen von gottes gnaden abt vnd sines gotzhus ze sant Gallen⁴ wisen vnd anderthalb an Hainrich Walawilles akker vnd an die blaiki ze Wil, vnd darvmb so han ich fúr mich vnd all min erben entzigen ledklich vnd frylich vnd entzihe mich o^vch wissentlich mit disem brief gantzlich vnd gar an den vorgenanten wisan aller aigenschafft aller manschafft aller kuntschafft aller besatzzung aller zúgnust aller gewer lút vnd brieue aller vordrung vnd ansprach vnd alles des rehten gaistlich vnd weltlichs gerihtes, da mit ich oder min erben oder ieman andre von vnsren wegen vnd an vnser statt die selben vorgenanten wisan mit aller zůgeho^erden nû oder hie nach gar oder an dehainem taile iemer kundint ald mo^ehtint angesprechen in dekain wise ald mit dekainer lay ander sache, a^vn geuerd. Ich han och gelobt vnd loben mit disem brieue fúr mich vnd fúr alle min erben, des vorgenanten Hainrich Klingers vnd siner erben der vorgenanten wisan vnd des koffs reht wer zesinne gen aller ma^engklichem nach aigens reht an gaistlichem vnd weltlichem gerihte, wenn wa vnd wie dikk der vorgenant Hainrich Klinger vnd sin erben des bedurfent vnd notdurftig sint, a^vn allen iren schaden a^vn geuerd. Vnd des hierv´ber ze warem sta^etem vnd offemm vrkúnd aller vorgenanter ding vnd gedinge han ich V^olrich Ru^edger burger ze sant Gallen^b) da obgenant min aigen insigel offenlich gehenkt an disen brief. Der geben ist ze sant Gallen an sant Matheus tag des zwelfbotten in dem jar, do man zalt von Cristi gebúrt drúzehenhundert jar, ahtzig jar vnd siben jare.

Source Fulltext: Chartularium Sangallense X, Nr. 6209, S. 416-417.