Wir^a) Hainrich von Hewen¹ ain friier herre vnd fro Menta sin êlichi hûsfro^vw geborn von Tokkenburg² || tu^en kunt vnd veriehent offenlich mit disem brieue fúr v´ns vnd fúr alle v´nser erben allen, die || in sehent lesent oder ho^erent lesen, won v´ns v´nser lieben getrúwen Hainrich Verre von Buss||nang³ vnd Margaretha sin elichi wirtinne, die man nemmet die Bu^elma^ennin von Rotahusen⁴, die v´nser aigen sint von dem libe, v´ns willeklich vnd frilich geben hant a^ehtú vnd zwainzig phunt phenning gůter vnd gena^emer Costentzzer múnse, die an v´nsern offenn nutz komen sint vnd bewendet, vnd won sv´ v´ns daran alz nutzlich vnd gůt dienst erzo^egt vnd getân hant, darumb so habent wir mit gůter vorbetrahtung ainhelleklich willeklich vnd frilich den vorgenemten Hainrich Verren vnd Margarethen siner elichen wirtinnen baiden gemainlich vnd vnuerschaidenlich geben vnd gebent in mit disem brieue reht vnd redlich ze ainem rehten lipgedinge vnd in lipgedinges wis vnd reht vier mutt kernen vnd drú malter habern gůtes vnd vngeuarliches kornes Costentzzer messes ja^erliches geltes von dem vnd vsser dem hof ze Vilmasperg⁵, der v´nser reht aigen ist, vnd ab allem vnd vsser allem dem, so zv^o dem selben hof ald darin geho^ert, den selben hof Nycolaus in dem Stadel⁶ buwet, mit so^elicher beschaidenhait vnd in dem rehten, daz die vorgenemten Hainrich Verre vnd Margaretha sin elichi wirtinne die vorgeschribenen vier mutt kernen vnd drú malter habern dez vorgeschribenen messes von dem vnd vsser dem vorgeschribenen hof ze Vilmasperg aller ja^erlich ie ze sant Martis tag dez ersten vor allen zinsen vnd vor aller ma^englichem innemen haben vnd niessen sont in libgedinges reht, alle die wile sv´ baidú lebent oder aines vnder in, vnd wedres vnder in zwain abstirbet, so sol daz ander, daz vnder in zwain dennoht lebt, daz vorgeschriben lipgedinge an kernen vnd an habern aller jarlich vor ma^englichem innemen vnd niessen, alle die wile ez lebt, ze gelicher wise vnd in allen den rehten, alz ob sv´ baidú lebtint. Vnd wenne o^vch die vorgenemten Hainrich Verre vnd Margaretha sin elichi wirtinne baidú absterbent vnd ensint von todes wegen, so sol danne daz vorgeschriben lipgedinge die vier mutt kernen vnd drú malter haber ja^erliches geltes von dem vorgeschribenen hof ze Wilmasperg v´ns vnd v´nseren erben vnd nachkomen mit allen rehten gantzlich ledig sin vnd lôs, also daz enkain iro erben dannenhin daran noch darzů enhain reht vordrung noch ansprachen hant noch haben sont. Vnd ze vrkúnd der warhait aller der vorgeschribenen dinge vnd gedinge so haben wir die vorgenemten Hainrich von Hewen herre ze Hewen vnd fro Menta sin elichi husfrôw fúr v´ns vnf fúr alle v´nser erben v´nserú insigel gehenkt an disen brief. Der geben ist ze Griessenberg⁷ an dem na^ehsten fritag nach sant Gallen tag in dem jar, do man zalt von Cristus gebúrt drúzehenhundert jar, ahtzig jar vnd darnach in dem sibendem jare.

Source Fulltext: Chartularium Sangallense X, Nr. 6214, S. 423.