Wir Wenczlaw von gots gnaden Romischer kunig zu allen czeiten merer des reichs vnd kunig zu Beheim embieten dem || burgermeister rate vnd burgern gemeinlichen der stat zu sant Gallen vnsern vnd des reichs liben getrewen vnser gnad || vnd alles gut. Liben getrewen, wie wol das sey das wir vormals Petren Lewen zu Vlme³ vnd Anshelm zu Weyle⁴ burgern vn||sern vnd des reichs liben getrewen beuolhen vnd gancze macht geben hatten, das sie vnsere vnd des reichs stewre ewer vnd andern steten in Obern vnd Nidern Swaben gelegen von vnsern vnd des reichs wegen vfheben vnd einnemen solten, ydoch wann sie durch notlicher irer geschefte vnd sachen willen sulche vnsre stewer nicht empfahen noch einnemen mochten, so haben wir Niclasen Muffel vnd Heinrichen Eisfogel burgern zu Nuremberg vnsern liben getrewen beuolhen, das sie sulche stewer von ewern vnd andern vnsern vnd des reichs steten vfheben vnd einnemen solten in aller masse, als wir das den egenanten Petren Lewen vnd Anshelm beuolhen hatten, als euch das Jesk Jablonecz vnser diner vnd liber getrewer, den wir dorumb sunderlichen zu euch senden, wol vnderweisen wirdet, douon ist vnser meynung vnd gebiten euch ernstlichen mit disem brife, das ir die egenanten stewer von ewer stat, die ir vns vf den nehsten sand Merteins tag zu geben pflichtig seit, den egenanten Niclasen Muffel vnd Heinrichen Eisfogel vnd nymanden anders gebet richtet vnd beczalet, wann so ir das getan habt, so sagen wir euch der egenanten ewer stewer als von disem jare in disen vnd andern vnsern maiestat briuen, die in der egenanten Peter Lewen vnd Anshelm von Weyle namen lauten, genczlichen vnd gar qweit ledig vnd los. Mit vrkund dicz briues versigelt mit vnserm angedruktem insigel. Geben zu Prage noch Crists geburte dreiczenhundert jar vnd dornach in dem sibenvndachczigistem jare, an sand Symon vnd Judas tage, vnserr reiche des Behemischen in dem XXV vnd des Romischen in dem XII jaren.

Source Fulltext: Chartularium Sangallense X, Nr. 6215, S. 424.