Wir die burgermaister vnd der rat vnd alle burger gemainlich der stette Regens(purg) vnd Basel frye stette vnd ouch des hailigen Ro^emischen richs stette Augspurg, Nu^erenberg, Costentz, Vlme, Esslingen¹, Rútlingen², Rotwil³, Wile⁴, Bibrach⁵, Rauenspurg⁶, Lindow⁷, V´berlingen⁸, sant Gallen, Memmingen⁹, Kempten¹⁰, Koufbúren¹¹, Livtkirch¹², Isni¹³, Wangen¹⁴, Bůchorn¹⁵, Gemunde¹⁶, Halle¹⁷, Hailprunnen¹⁸, Winpfen¹⁹, Winsperg²⁰, Nu^erdlingen²¹, Dinkel(spuhel)²², Rotenburg vff der Tuber²³, Windshain²⁴, Wissenburg²⁵, Swinfurt²⁶, Giengen²⁷, Aulun²⁸, Popfingen²⁹, Mulnhusen³⁰, Pfullendorff³¹, Wile in Turgow³² vnd Bůchow³³ bekennen offenlich mit disem brieff etc., alz sich der edel hochgeborner v´nser lieber gnadiger herre hern Bernhart von gotz gnaden marggraff ze Baden³⁴ mit im selb vnd ouch mit allen sinen stetten schlossen landen vnd leuten zu vns in vnsern bund verstrikt vnd verbunden ha^vt nach des briefs lut vnd vsswisung, den er vns darumbe besigelt vnd gegeben hat, darumbe so haben wir im her wider vmb jetzo gelopt versprochen vnd verhaissen vnd versprechent mit disem brief mit vnsern gůten truwen vnd vff die aide, die wir in vnserm bund gelopt vnd gesworen haben, daz wir im vnd den sinen getrivlich bera^vten vnd beholffen sin súllen vnd wellen hinnan von hivt dem tag, alz dirr brieff geben ist, driv gantziv jar div na^echsten nach ainander in aller der wise forme vnd masse, alz hernach geschriben stat. By dem ersten, weres daz jeman, wer der were, den vorgenanten vnsern herren den marggraffen oder die sinen, die im ze versprechent stundent, angriffe oder bescha^edigotte mit roub mit mord mit brand oder mit vnrechtem widersagen oder wie ald in welich wise in vnrecht beschehe, daz denne wir vorgenanten stette gemainlich vnd vnser jeglichiv besunder oder wer zů vns geho^eret, in darzů getrivlich bera^vtten vnd beholffen sullen sin, alz bald wir oder die vnsern des innan oder gewar werdent oder von in ald von den, den der schad widerfaren vnd beschehen were oder von jeman anders von iren wegen darumbe gemant werdent, zů frischer geta^vt mit nachylen mit zůspringen vnd ouch mit allen andern sachen, die darzů gehoret, nach allem irem besten von ainem mittemtag bis an den andern zů gelicher wise, als vns dasselb angieng vnd vns selb widerfaren vnd beschehen were, ane alle geva^erde. Weres aber sach, daz die angriff also gestalt vnd geschaffen weren, daz si zů frischer geta^vte nit so^elten noch mochten erobert noch vssgetragen werden, wanne sich denne der vorgenant vnser herre marggraff Bernhart vff sinen aide vnd mit im zwen siner ra^vte och vff ir aide erkennent, daz im oder den sinen vnrecht beschehen si oder beschehe, vnd vns darumbe manent vnd vmb hilf zů sprechent mit ir gewisser botschaft oder brieffen gen Vlme in den rate, so sullen wir in nach der selben iro ermanung funftzig mit spiessen ze ross erber vnd wol erzugt lute a^vne alle geuerde schiken vnd bestellen vnd div ouch nach der selben iro ermanunge in den nechsten vierzehen tagen von hus vs ritten súllen vnd o^vch fu^erderlich volleriten an die stette, die vns denne benempt vnd verkunt werden, a^vne alle geuerde, vnd sullen ouch daz tůn vff vnser aigen kost schaden vnd verlust also lang, bis das so^elicher schad widerkert vnd abgeleit wirt, a^vne alle geuerde. Weres aber sach, daz die angriff aber also geschaffen vnd gestalt weren, daz si mit der vorgenant(en) hilf nit vstragen mo^echten werden vnd daz sich vnser herre der marggraff vf sinen aide vnd mit im zwen siner ra^ete ouch vff ir aide, alz vorgeschriben stat, bekanten, daz si vnser hilf notdúrftig weren, so mag der vorgenant vnser herre der marggraff oder sin obrost vogt vnd amptlut, ob er selb in dlands nit were, ir erbotschaft^a) zů vns schiken vnd senden gen Vlme in den ra^vte, vns der sach, der si denne notdurftig sind, ze vnderwisen vnd ouch daruff vmb hilf ze manen, so súllen denne wir mit vnsern ra^eten in den nechsten drin wochen vngeuarlich v´ber die sach sichen^b) vnd vns vff vnser ere vnd aide erkennen, was hilf wir in fúrbas muglichen tu^egen nach gelegenhait der sach, alz div denne an ir selb gestalt ist, zů gelicher wise, alz ob ez vnser selbs sach were, a^vne alle geuerde. Vnd súllen och in denne mit der selben vnser hilf aber getrivlichen bera^vten vnd beholffen sin, alz vorgeschriben stat, vnd sol ouch div selb vnser hilf beschen in den nachten^c) viertziehen tagen nach den vorgenanten drin wochen, a^vne alle geuerde. Darzů so^ele dem vorgenanten vnserm herren dem marggraffen vnd den sinen alle vnser stette vnd sloss offem sin zů allen iren no^eten sich dar vs vnd dar in ze belassen, a^vne alle geuerde. Vnd vmbe daz, daz div vorgenant verbuntnusse dez fruntlicher gehalten werde, so haben wir vns des jetzo mit vnserm herren dem marggraffen och verainet, ob daz were, daz wir oder dhain vnser burger diener closter oder ander gaistlich lútt oder gebursman ichtzit zů des vorgenanten vnsers herren des marggraffen oder der der sinen, die im zů versprechen stunden, stette burgern clostern oder closterluten oder gebursmannen vnd die doch in gůten geswornen gesetzten gerichten gesesen wem, zů clagen zů sprechen oder ze vordern hette oder gewunnen, darumbe sullen wir vnd die vnsern recht von in nemen vnd in nach fa^vren fur die schluthaissen^d) an die stet vnd fúr die gericht, da sy denne gesessen sind, oder in div gericht, dar in si denne geho^erent, vnd sullen ouch vns da des rechten von in benu^egen laß^d), vnd sol ouch man vns vnd den vnsern des rechten da furderlichen beholffen sin, daz vns daz nit verzogen werde, a^vne alle geuerde, vsgenomen vnser aidgenossen der von Rottwile, die sullen sich gen den zwain schlossen Oberndorff³⁵ vnd Scho^enenberg³⁶ mitt dem rechten div egeschriben driv jar halten, alz si sich vormals bis her gen in gehalten hant, a^vne alle geuerde. Weres aber sach, daz wir vorgenanten stette oder die vnsern, die vns ze versprechen stu^enden, ichtzit zů dem vorgenanten vnserm herren dem marggrafen selb oder zů dehainen sinen diener, ez werend herren ritter oder knecht, ze sprechen hetten oder gewunnen, darumbe sullen wir oder die vnsern dry vsser des vorgenanten vnsers herren des marggraffen ra^et nemen, welich dry wir denne wellen, vnd sol der vorgenant vnser herre der marggraffe schaffen vnd bestellen, welich dry wir also vss sinen ra^etten nemen oder erwellen, daz sich die der sach an nemen vnd o^vch vns darumbe beschaiden, nach dem oder die vnsern daz ervordern, in vierzehen tagen den nechsten gen Pfortzhain³⁷ in die stat. Vnd sullen ouch der vorgenant vnser herre der marggraffen oder sin dienern, alz vor geschriben stat, vns oder die vnsern rechtz vf denselben tag vnd vff die vorgenanten dry sins ratz tugentlich verhengen vnd gestatten, vnd sullen och die selben dry sins ratz daz recht darussprechen^e) vff ir aide, ob si daz sust mit baider partye gůten willen vnd gunst nit fruntlich verrichten vnd abtragen mugen. Dar zů haben wir dem vorgenanten vnserm herren dem marggraffen daz besunderlich och versprochen vnd verhaissen, daz wir gemainlich noch dehain stat vnder vns besunder im dehainen den sinen inerhalb den vorgenanten drin jaren ze burger nit innemen noch enpfahen sullen wider sinen willen in dehainem weg a^vne alle geuerde. Vnd also haben wir vorgenanten stette mit vnsern gůten truwen vff die aide, die wir vnserm bund gesworen haben, alle vorgeschriben sach war vnd sta^et ze halten ze laisten vnd ze volle fu^eren a^vne alle geuerde nach ditz brieffs sag. Doch so nemen wir vs vnsern gena^edigen herren den Romschen kung vnd daz hailig Ro^emisch riche. Darzů nemen wir vs den hochwirdigen fu^ersten vnsern gena^edigen herren hern Pilgrin von gotz gnaden ertzbischoff ze Saltzburg³⁸ des hailigen stůls legate, vnser aidgenossen die Ro^emischen^f) stette vnd die Wldstette³⁹. Mit vrkund ditz briefs, den wir in besigelt dar v´ber geben mit der vier stette Vlme, Esslingen, Rútlingen vnd Wile angehenkten insigeln, die och sy von vnser aller haissentz wegen an disen brieff gehenkt hant. Der geben ist des ersten sunnentags in der vasten, alz man singet Invocavit, do man zalt etc. LXXXVIII°.

Source Fulltext: Chartularium Sangallense X, Nr. 6246, S. 471-473.