Wir^a) Johans von gottes verhengnúst abt vnd gemainer couent des gotzhus ze Vischinan sant Benedicten ordens || veriehen vnd tůnt kund allermenglichem mit disem brief. Alz v´ns die erwirdigen gaistlichen herren abt Walther || von gottes verhengnúst des gotzhus ze sant Johann in Turtal in Costentzer bistum gelegen des egenanten sant Bene||dicten ordens vnd gemainer couent desselben gotzhus ledklich vnd frilich zů v´nsers obgenanten gotzhus handen ze rechtem wehsel vnd in wehsels wis geben vnd zů v´nsers gotzhus gewalt braht ha^vnt dis nachgeschribnen zwen erber man Johansen Liebhart den sailer vnd Hainrichen Singer von Sirnach mit lib vnd mit gůt vnd mit aller zůgeho^erd, alz die brief wol wisent, die wir von inan dar vmb inne ha^vnt, dieselben lút ires gotzhus recht aigen warent, daz wir wissentklich vnd wolbedahtklich mit gemainem ainhelligem ra^vt v´nsers capitels durch v´nsers gotzhus nutz vnd fromen denselben abt Walthern vnd gemainem couent des vorgenanten gotzhus ze sant Johann vnd allen iren nachkomen vnd och demselben irem gotzhus ledklich vnd frilich fúr v´ns vnd fúr alle v´nser nachkomen vmb die obgenanten zwen man ze rechtem vngeuarlichem gelichem wehsel vnd in wehsels wis redlich vnd recht geben haben vnd gent inan och mit disem brief dis nachgeschribnen zwen man, die v´nsers obgenanten gotzhus recht aigen warent, Johansen Gupfer von Sirnach vnd Wernlin Hůber genant Saiglin von Kilchberg mit lib vnd mit gůt vnd mit allen rechten nútzen gewonhaiten vnd mit aller zůgeho^erd, also daz si vnd ir nachkomen dieselben lút mit aller zůgeho^erd nu hinnan hin iemermer inne haben vnd niessen sont vnd mugent, wie si went, alz ander ires gotzhus aigen lút a^vn geua^erd, vnd haben inan dieselben Johansen Gupfer vnd Wernlin Hůber mit aller zůgeho^erd ledklich vnd frilich fúr v´ns vnd fúr alle v´nser nachkomen vffgeben vnd zů iren vnd iro nachkomen vnd zů des obgenanten ires gotzhus handen vnd gewalt geuertgot vnd braht vnd si dero in liblich nutzlich gewer gesetzt, alz recht sitt vnd gewonlich was, vnd haben v´ns hierúber fúr v´ns vnd fúr alle v´nser nachkomen vnd fúr daz obgenant v´nser gotzhus gegen inan ledklich vnd frilich verzigen vnd entwert an den egenanten lúten mit lib vnd mit gůt vnd mit aller zůgeho^erd aller aigenschaft aller lehenschaft aller manschaft aller gewer aller besatzung aller kuntschaft aller zúgnúst lút vnd brief aller dienst alles gewalts aller erbschaft aller va^ell vnd gela^ezz alles rechten gaistlichs vnd weltlichs gerihtes aller rechtung aller vordrung vnd ansprach vnd alles fúrzugs vnd vsszugs vnd aller andren sachen vnd geua^erden, dar mit wir ald v´nser nachkomen ald ieman andra von v´nsern ald von v´nsers gotzhus wegen dieselben lút mit lib vnd gůt vnd mit aller zůgeho^erd kúnden ald mo^ehten angesprechen ald dar mit wir wider disen wehsel vnd wider disen brief in dehain wis kúnden ald mo^ehten getůn ald gereden vngeuarlich. Wir so^ellen vnd geloben och vesteklich mit disem brief fúr v´ns vnd fúr alle v´nser nachkomen, der obgenanten Johansen Gupfers vnd Wernli Hůbers mit aller zůgeho^erd vnd dis wehsels der obgenanten abt Walthers vnd gemaines couents des gotzhus ze sant Johann vnd iro nachkomen gen allermenglichem allenthalben recht wern ze sint nach dem rechten, wenn wa ald wie dik si ald ir gotzhus ald die obgenanten lút des bedurfent ald dar vmb mit dem rechten vfgetriben ald angesprochen werdent, vngeuarlich. Vnd des alles ze offem vrkúnd der warhait so haben wir obgenanten abt Johans vnd gemainer couent des gotzhus ze Vischinan v´nsrú insigel offenlich gehenkt an disen brief. Der geben ist ze Vischinan in v´nserm obgenanten gotzhus an dem na^ehsten dunstag nach dem hailgen ostertag, do man zalt von Cristus gebúrt drúzehenhundert vnd ahtzig jar, dar nach in dem ahtenden jar.

Source Fulltext: Chartularium Sangallense X, Nr. 6260, S. 495-496.