Allen^a) den, die disen brief ansehent lesent oder ho^erent lesen, kúnden wir dis nâchgenemten Růdolf Wulliweber, den man nemmt Sto^ebi, burger ze || sant Gallen vnd Adelhait sin êlichi wirtinne vnd veriehent offenlich an disem brief, das wir baidú gemainlich vnd ainmu^eteklich mit gůtem || ffriem willen vnd mit gůter vorbetrahtunge reht vnd rêdlich verko^vfft vnd ze ko^vffennt geben habent disen nâchgenemten erberen swestran || swester Vrsulen Brunnerinen, swester Adelhaiden von V^rna^eschen¹, swester Annun Friginen von Vttwille² vnd swester Cristinen Sifridinen, die ze No^eggersegg³ im Tan⁴ in gaistlichem schin gesessen sint, vnd allen iren nâchkomen, welhi ie dann daselbs vnd vff der selben hofstat im Tan in gaistlichem schin sesshaft werdent ald sesshaft sint, das holtz, das da stât in Wisertan⁴, das ainhalb sto^vsset an der selben swestran hofstat ze No^eggersegg vnd sto^vsset anderthalb an Cristans holtz von Wisa⁵, das selb holtz in Wisertan vnd alles das holtz, das hienâch iemer vff dem selben grunt vnd boden wahset, habent wir den obgenanten swestran allen gemainlich vnd vnuerschaidenlich vnd allen iren nachkomen, als vor ist beschaiden, mit allen rehten nútzen vnd gewonhaiten vnd mit aller zů geho^erde ân allain den boden vnd mit allen den rehten, als wir vnd v´nser vordern das selb holtz genept vnd genossen vnd herbraht habent vntz vff disen húttigen tag, als dirr brief ist geben, reht vnd redlich ze ko^vffenn geben vmb vier pfunt pfenning gůter vnd gena^emer Costentzer múnse, dero wir gantzlich von in gewert sien vnd enpfangen habent vnd in v´nsern gůten nutz bewendet. Vnd darvmb so habent wir v´ns willeklich verzigen vnd verzihent v´ns mit disem brief fúr v´ns vnd v´nser erben gegen den obgenanten swestran vnd iren nâchkomen alles rehtes gaistlichs vnd weltliches gerihtes aller vordrung vnd ansprachen, so wir baidú gemainlich ald deweders besunder ald v´nser erben an dem zů dem vnd von des vorgedahten holtzes wegen ie gehattent oder hie nach iemer gehaben oder gewinnen mo^ehtint, vnd das wir noch v´nser erben noch ieman andre von v´nser wegen die obgenanten swestran noch kain iro nâchkomen gemainlich noch besunder an dem vorgeschriben holtz niemer sûmen irren bekúmberren bekrenken noch in kain wîse beswa^eren so^ellin noch wêllent. Darúber so habent wir baidú gelopt mit v´nsren trúwen vnd lobent mit disem brief fúr v´ns vnd v´nser êrben, des vorgeschribnen holtzes in Wisertan vnd des ko^vffs reht wern ze sinne vnd die vorgedahten swestran vnd alle ir nâchkomen, als vor ist beschaiden, darvmb ze versprechenn vnd ze versta^enne vff gaistlichem vnd vff weltlichem geriht vnd an allen stetten gegen aller ma^englichem, wenn wâ oder als dik sú darvmb angesprochen v^fgetriben ald geschadgot werdent mit dem rehten. Vnd des alles ze offemm wâren vrkúnde vnd ze ainer sta^eten sicherhait aller vorgeschribner dinge vnd vergiht so han ich Růdolf Wulliweber da vorgenemt min insigel fúr mich vnd fúr alle min erben offenlich gehenkt an disen brief. Vnd won ich die obgenant Adelhait des selben Růdolfs Wulliwebers elichi wirtinne aigens insigels niht hatt, so han ich erbetten den fromen man Johansen Blârrer Pfilippen Blârrers sa^elgen svn wilunt burgermaister ze sant Gallen⁶, das er sin insigel fúr mich gehenkt hat an disen brief, vnder das selb insigel ich mich vnd min erben willeklich gebunden han aller vorgeschribner dinge. Vnd ich der selb Johans Blârrer vergich, das ich von bett der obgenanten Adelhaiden min insigel fúr si gehenkt han an disen brief mir vnd minen erben vnscha^edlich. Dirre brief ist geben ze sant Gallen an dem na^ehsten fritag vor dem hailgen tag ze pfingsten, do man von Cristus gebúrt zalte drúzehenhundert jar vnd darnach in dem aht vnd ahtzigosten jare.

Source Fulltext: Chartularium Sangallense X, Nr. 6269, S. 509-510.