Wir^a) fro Menta geborn von Tokkenburg¹ hern Hainrichs sa^elgen von Hewen friien vnd ritters wilunt elichi husfro^vw vnd Peter von || Hewen² ir elicher sun tu^en kunt vnd veriehent offenlich mit disem brieue fúr v´ns vnd fúr alle v´nser erben allen, die in sehent lesent oder || ho^erent lesen, won v´ns v´nser lieben getrúwen Hainrich Verre von Bussnang³ vnd Margaretha Bu^elma^ennin von Rotahusen⁴ sin elichi wirtinn, die || v´nser aigen sint von dem libe, willeklich vnd frilich geben hant ahtzehenthalb phunt phenning gůter vnd gena^emer Costentzzer múnse, die an v´nsern offenn nutz komen sint, dar in sv´ v´ns alz nutzlich gůt dienst erzo^egt vnd getan hant, darumb so habent wir in mit gůter vorbetrahtung reht vnd redlich geben vnd gebent in mit vrkúnd diz brieues baiden gemainlich vnd vnuerschaidenlich ze ainem rehten lipgedinge vnd in lipgedinges reht diz nachgeschriben ja^erlich gelt an korn vnd an phenningen driie mutt gůtes vnd vngeuarliches kernen vnd zwen mutt haber alles Costenzer messes vnd vier schilling phenning gůter vnd gena^emer Costentzzer múnse ja^erliches geltes von dem vnd vsser dem kelnhof ze Lútma^erkun⁵ bi der kilchun gelegun vnd stosset ainhalb an die widum ze Lútma^erken mit so^elicher beschaidenhait vnd in dem rehten, daz wir vnd alle v´nser erben vnd nachkomen, in dero hant der vorgeschriben kelnhof iemer kumpt, den vorgenemten Hainrich Verren vnd Margarethen siner elichen wirtinnen aller ja^erlich ie ze sant Martis tag die vorgeschribenen driie mutt kernen zwen mutt haber dez vorgeschribenen messes vnd vier schilling phenning der vorgeschribenen múnse von dem vnd vsser dem vorgeschribenen kelnhof ân fúrzug vnd ân alle geua^erde vnd ân alle minrung ze ainem rehten lipgedinge vnd in libgedinges wis vnd reht geben vnd rihten sont, alle die wile sv´ baidú lebent oder aines vnder in. Weles jares aber wir daz niht ta^etint, so hant die vorgenemten Hainrich Verre vnd Margaretha sin elichi wirtinn friies vrlob vnd vollen gewalt, darnach wenn sv´ wellent den vorgeschribenen kelnhof mit allen rehten vnd mit aller zv^o geho^erde ze besetzzenn vnd ze entsetzzenn oder selber ze buwenn vnd ze niessenn vnd sich selber dez vorgeschribenen lipgedinges an phenningen vnd an korn gantzlich ze werenn, vnd wedres vnder in zwain ab stirbet vnd enist von todes wegen, so súllent wir dem andern, daz vnder in zwain dennoht lebt, daz vorgeschriben lipding an korn vnd an phenningen gantzlich geben vnd rihten, alle die wile ez lept vnd in lip ist, ze gelicher wise vnd in allen den rehten, alz ob sv´ baidú lebtint. Vnd wenne sv´ baidú ersterbent vnd ensint von todes wegen, so sol danne daz vorgeschriben lipding an korn vnd an phenningen von dem vorgeschribenen kelnhof v´ns vnd v´nseren erben vnd nachkomen dannenhin gantzlich vnd gar ledig sin vnd los vnd wider an v´ns genallen. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nach reht darzů gehortent ald ho^eren soltent vnd notdurftig warent vnd alz ez kraft vnd maht sol vnd mag han. Vnd ze ainem waren vrkúnde vnd ze ainer sta^eten sicherhait aller der vorgeschribenen dinge vnd gedinge so habent wir die vorgenemten fro Menta von Hewen geborn von Tokkenburg vnd Peter ir sun fúr v´ns fúr alle v´nser erben vnd nachkomen v´nserú insigel offenlich gehenkt an disen brief. Der geben ist ze Griessenberg⁶ an v´nser fro^vwen abent ze herbst in dem jar, do man zalt von Cristus gebúrt drúzehenhundert jar, ahtzig jar vnd darnach in dem núnden jâre.

Source Fulltext: Chartularium Sangallense X, Nr. 6352, S. 598-599.