Ich^a) Johans Entziswiller vogt ze sant Gallen¹ von des hailgen Ro^emschen richs wegen tůn kunt vnd vergich offenlich an disem brief allen den, die in sehent lesent oder ho^erent lesen, das fúr mich kam || ze sant Gallen in der stat an sant Laurencius âbent, do ich vff des richs offner strâsse von des hailgen riches gewaltes wegen von des nachgenemten knehtes Hartman Schniders ernstlicher || bett wegen offenlich ze geriht sass, der selb Hartman Schnider, V^olrichs des Schniders von Maienuelt² elicher sun, vnd der selb Hartman nam ze fúrsprechen Walthern Schúrpfen burger ze sant Gallen, || der selb sin fúrsprech offnote vnd veriâh offenlich vor mir in gerihte an siner stat vnd von sinen wegen von der vanknust wegen, als in die fromen wisen der burgermaister vnd der rât vnd die burger der stat ze sant Gallen gehaimot vnd in ir vanknust vnd banden hattent vmb das, das er in fúr geben wart, er wa^er vff iro laster vnd schaden gangen, vnd won aber in die selben burgermaister vnd der rat ze sant Gallen durch siner vnd des obgenanten sines vatters ernstlicher bett willen vss der selben vanknust ledig gelâssen hettint, darvmb so wo^elti er sich aller diser nachgeschribner sache willeklich vnd gern verbinden, als hie nach beschaiden ist an disem brief. Des ersten do swůr der selb Hartman Schnider offenlich vor mir in gerihte frilich vnd willeklich vngebunden vnd vngeuangen gesunt lips vnd můtes mit gůter vorbetrahtunge ainen gelêrten ait liplich zů got vnd zů den hailgen mit v^fgehabnen vingern, vmb die vorgedahten vanknust der vorgedahten des burgermaisters des rates vnd aller burger gemainlich von sant Gallen vnd iro ieklichs besunder vnd mit namen aller dero vnd aller ma^englichs, wer an der selben siner vanknust dehainerlay schuld gehept hat oder gehept hant ald des tâtent ald helffent gewesen sint oder darzů gehafft sint, luter gantz vnd gůt frúnd ze sinne vnd alle sin frúnd in darvmb ze frúnd ze gewinnen ân allen fúrzug vnd die selben vanknust vnd getât niemer ze andenn noch ze a^eferrenn weder mit gaistlichem noch mit weltlichem geriht noch ân reht noch in kain wîse noch ieman von sinen wegen vnd wider die stat ze sant Gallen niemer ze tu^ende noch wider si ze sinne in kain wîse âne alle gua^erde. Wa^er aber, das er ald ieman von sinen wegen den selben ait vnd sin êr iemer v´berfu^eri in dehain wîse, so sol er der selben gemainer stat ze sant Gallen fúnfzig pfunt pfenning gůter Costentzer múnze gantzlich veruallen sin, vnd vmb die selben pfenning hât er der selben gemainer stat ze sant Gallen zůtz im ze merer sicherhait ze rehtem búrgen geben vnd gesetzt den vorbenemten V^olrichen den Schnider sinen vatter, der selb sin vatter hât o^vch gelopt vor mir im geriht offenlich mit siner trúwe, den selben burgern vnd der stat ze sant Gallen gemainlich vnd iren erben vnd nâchkomen die selben fúnfzig pfunt pfenning gůter Costenzer múnse gantzlich ze gebenn vnd ze rihtenn ân allen fúrzug vnd widerrêde, wenne das wa^eri, das er den vorgeschriben sinen geswornen ait iemer v´berfu^eri in dehain wise, die selben Hartman Schnider vnd V^olrich der Schnider sin vatter hant sich och offenlich vor mir im geriht des willeklich verbunden, das die obgenanten burgermaister der rat vnd die burger alle gemainlich der stat ze sant Gallen vnd ir helffer si vmb die selben fúnfzig pfunt pfenning angriffen vnd pfenden sont vnd mugent in stetten in do^erffern vnd vff dem lande mit gaistlichem vnd mit weltlichem geriht vnd âne alles reht an allen iren gůten, wie vnd wâ oder wahin si das getůn mugent oder went, als vil vntz das si der selben fúnftzig pfunt pfenning vnd och des schaden, in den si vnd ir helffer von des selben pfendenns vnd angriffens wegen koment, gantzlich gewert vnd aller ding entschadgot werdent, vnd sol si da vor nit schirmen enkain frihait noch gewonhait enkain burgreht stetreht lantfrid noch buntnúst enkain reht weder gaistlichs noch weltlichs gerihtes noch enkainerlay ander sach noch fúrzug. V´ber das alles so hat sich der obgenant Hartman Schnider sunderlich verbunden vor mir in offemm geriht frilich vnd willeklich also, wa^er, da vor got sie, das er ald ieman von sinen wegen den vorgeschriben sinen ait iemer v´berfu^eri an dehainem stuk oder in dehain wîse, wenne oder wâ das bescha^eh, das dann der burgermaister der rât vnd die burger alle gemainlich der stat ze sant Gallen vnd iro iekliche besunder vnd alle iro helffer den selben Hartman Schnider angriffen haimen vnd vahen sont vnd mugent ân alles reht vffemm lande vff wasser in do^erffern oder in stêtten oder wâ si in dann ankomen vnd ergriffen mugent, vnd das si dann den selben Hartman fúr ainen verschulten vnd vertailten man verdêrben vnd vom libe tůn sont vnd mugent âne alles reht vnd âne vrtail, vnd das in da vor noch dawider niht schirmen sol enkain frihait noch gewonhait enkain reht weder gaistlichs noch weltlichs gerihtes enkain gesetzt noch buntnust der herren noch der stette enkain burgreht stettreht noch lantreht noch enkainerlay ander sach noch schirm, won er sich mit namen verzigen hat aller helffe aller gnaden alles vsszugs alles schirmes vnd alles des, damit er sich wider die vorgeschriben sach vnd buntnust iemer gesetzen ald dawider gereden ald gewerben kundi oder mo^ehti ald ieman von sinen wegen in dehain wîse. Darnach batt mich der obgenant Hartman Schnider mit sinem fúrsprechen, das ich erfu^eri an ainer vrtail, ob er die vorgeschriben sach vnd vergiht vnd das vorgeschriben verbinden getân vnd vollfu^ert hetti, das es kraft hêtt vnd haben mo^eht nâch dem rehten. Do fragte ich vorbenemter rihter vrtail vmb vnd wart ertailt mit gemainer vrtail, das der obgenant Hartman die vorgeschriben vergiht vnd sach vnd das vorgedaht verbinden mit sa^emlichen worten vnd werken getân vnd vollfu^ert hett, das es billich kraft vnd maht haben so^elt vnd mo^eht nâch dem rehten ietzo vnd hienach. Vnd des alles ze offemm waren vrkúnde so han ich der obgenant Johans Entziswiller vogt als vorgeschriben stât min insigel nâch rehter vrtail offenlich gehenkt an disen brief, won es mit gemainer vrtail ertailt wart, das ichs tůn so^elti. Darnach veriehent wir die obgenanten Hartman Schnider vnd V^olrich der Schnider von Maienuelt sin vatter vnd Walther Schúrpf sin fúrsprech als vorgeschriben stat offenlich ain gantz warhait aller der dinge, so von v´ns da vorgeschriben stat an disem brief, vnd dez ze merer sicherhait so han ich der selb Walther Schúrpf och min insigel gehenkt an disen brief, vnder das selb insigel wir die selben Hartman vnd V^olrich sin vatter v´ns willeklich gebunden habent aller vorgeschribner dinge vnd gedinge, won wir aigner insigel nit hattent, v´ber das so habent wir erbetten den froman man Jacob Růprehten, den man nemmt der Lo^ew, ze disen ziten statamman ze sant Gallen³, das er sin insigel ze ainer zúgnust aller vorgeschribner sache och gehenkt hat an disen brief, won er och bi allen vorgeschribnen sachen ze gegen gewesen ist, des o^vch ich der selb Jacob Růpreht statamman als vorgeschriben stat offenlich vergich mit vrkúnd dis brieues mir ân schaden. Dis beschach vnd wart dirr brief geben an dem vorgedahten sant Laurencius abent in dem iâre, do man von Cristus gebúrt zalt drúzehenhundert jar vnd darnach in dem nún vnd ahtzigosten jâre.

Source Fulltext: Chartularium Sangallense X, Nr. 6340, S. 582-584.