Allen^a) den, die disen brief ansehent lesent oder ho^erent lesen, kúnde ich V^olrich Segensser burger ze sant Gallen vnd vergich offenlich an disem brieff, als mich die || fromen wisen der burgermaister vnd der rât ze sant Gallen gehaimot vnd in iro vanknust vnd banden hattent vmb das, das ich wider den burgermaister || vnd wider den rat daselbs fra^euenlich vnd schalklich gerêtt hatt vnd tro^ewlich âne alle iro schulde, vnd won aber si mich begnâdet hant vnd mich durch || min vnd miner frúnd ernstlich bett ledig vss der vanknust gelassen hant, darvmb so han ich frilich vnd vnbetwugenlich vngebunden vnd vngeuangen mit gůter vorbetrahtunge offenlich ainen gelerten ait liplich zů got vnd zů den hailgen gesworn mit v^fgehabnen vingern, vmb die vorgedahten vanknust vnd getât der vorgedahten des burgermaisters des rates vnd aller burger gemainlich der stat ze sant Gallen vnd iro ieklichs besunder vnd mit namen aller dero, wer die sint, die an der selben miner vanknust schuld gehept hant mit ra^eten oder mit geta^eten oder in dehain wîse, luter gantz vnd gůt frúnd ze sinne vnd alle min frúnd inen darvmb ze frúnd ze gewinnenn ân allen fúrzug vnd die selben vanknust niemer ze andenn noch ze a^eferrenn weder mit gaistlichem noch mit weltlichem geriht weder mit worten noch mit werken noch in kain wîse noch ieman von minen wegen ân alle geua^erde. Ich han och in den selben ait genomen vnd gesworn, das ich gemain stat ze sant Gallen niemer angriffen noch beschadgen sol noch wil wider rehtes. Wa^er aber, das got nit welle, das ich den ait iemer v´berfu^eri an dehainem vorgeschriben stuk, so sol ich den selben burgern vnd gemainer stat ze sant Gallen hundert pfunt gůter vnd ga^eber haller gantzlich veruallen sin ân alle widerrede, vnd han in vmb das selb gůt zů mir ze merer sicherhait ze rehten búrgen geben vnd gesetzt dis nachgenemten Johansen Segensser minen brůder, Cůnrat Sa^errin, Cůnrat Helffenbergen, Johansen Ytun von Oberndorf¹, Herman vnd Johansen die Gúl gebrůder, Johansen Râdholtzer, Růdolfen Wulliweber, den man nemmt Sto^ebi, vnd Johansen Wulliweber den eltern vnd Johansen Wulliweber den iungern alle drie gebrůder vnd Johansen Vorster den satler alle burger ze sant Gallen, die hant alle vnuerschaidenlich gelopt ieklicher mit siner trúwe, ob das wa^eri, das ich in des selben gůtes veruieli, als vor ist beschaiden, das si danne alle vnuerschaidenlich den selben burgermaister dem rat vnd gemainer stat ze sant Gallen die selben hundert pfunt gůter haller gantzlich geben weren vnd rihten sont vnd in och gebunden sin sont, inen das selb gelt gantzlich ze geben vnd v^sszerihten ân allen fúrzug vnd âne alle widerrede âne alle geua^erde. Vnd wa^er, das ich ald die obgenanten búrgen inen das selb gůt dann gantzlich nit rihtint vnd vnuerzogenlich, so hant die selben burgermaister der rat vnd die burger gemainlich ze sant Gallen vnd ir helffer fries vrlob vnd vollen gewalt, das si mich vnd och die obgenanten búrgen darvmb pfenden no^eten heften vnd angriffen sont vnd mugent an lúten vnd gůten in stetten in do^erffern vnd vff dem lande mit gaistlichem vnd mit weltlichem gerihte vnd âne alles reht, wie vnd wâ oder wa hin si das getůn mugent oder went, als vil vnd als dik, vntz das si derselben hundert pfunt gůter vnd ga^eber haller vnd och des schaden, in den si vnd ir helffer von des selben pfendens no^etens vnd angriffens wegen koment, gantzlich gewert vnd vssgeriht werdent, vnd sol mich noch die obgenanten búrgen da vor nit schirmen enkain frihait noch gewonhait enkain buntnust burgreht noch stettreht noch kain lantfrid enkain reht weder gaistlichs noch weltlichs gerihtes noch enkain ander sach noch fúrzug. Ich der selb V^olrich Segensser han o^vch in den vorgeschribenn ait genomen vnd gesworn, wa^er das ich dehainerlay sto^ess sach oder ansprâchen hinnanhin hêtti oder gewuni zů gemainer stat ze sant Gallen oder zů dehainem burger ald burgerinen ze sant Gallen besunder, als dik das bescha^eh, vnd wo^elt ich dann ie darvmb rehtes nit enbern, das ich dann ie darvmb rehtes pflegen vnd reht von in nemen sol vnd wil ze sant Gallen in der stat vor irem geriht vnd nienert anderswâ nâch der selben stat reht vnd gewonhait, es wa^er denn, das ich da selbs rehtlos gelassen wurdi vnd das das kuntlich da wurdi, so ist mir behalten vnd in dem ait v^ssgelassen, das ich das reht ie dann anderswâ sůchen sol vnd mag, da es dann billich vnd muglich ist, âne geua^erde. Ich han o^vch gelopt vnd loben mit disem brief fúr mich vnd min erben, die obgenanten búrgen alle ze lo^esenn von allem dem schaden, in den si koment von diser búrgschaft wegen, vnd han in och erlo^vbt, min vnd miner erben gůt darvmb anzegriffenn vnd ze pfendenn in aller wîse als den obgedahten burgern vnd der stat ze sant Gallen, als vor ist beschaiden, vntz in ir schad gantzlich abgelait wirt. Vnd ze offemm waren vrkúnde vnd sta^eter sicherhait aller vorgeschribner dinge vnd gedinge so han ich der obgenant V^olrich Segensser min insigel offenlich gehenkt an disen brief, vnd wir die obgenanten búrgen Johans Segensser, Cůnrat Sa^erri, Cůnrat Helffenberg, Johans Ytun von Oberndorf, Herman vnd Johans die Gúl, Johans Râdholtzer, Růdolf Wulliweber, Johans Wulliweber der elter vnd Johans Wulliweber der iunger vnd Johans Vorster der satler veriehent alle offenlich ain gantz warhait aller der dinge vnd gedinge, so von v´ns da vorgeschriben stât an disem brief, vnd des ze merer sicherhait so habent wir die selben Cůnrat Sa^erri, Cůnrat Helfenberg, Johans Radholtzer, Růdolf Wulliweber vnd Johans Wulliweber der junger vnsrú insigel och gehenkt an disen brief, vnd won wir die andern búrgen aigner insigel nit hattent, so habent wir v´ns willeklich gebunden aller vorgeschribner dinge vnder der beschaidnen Jacob Růppreht, den man nemmt der Lo^ew, statammans² vnd vnder Johansen Entziswillers des vogtes ze sant Gallen³ insigeln, die irú insigel durch v´nser bett fúr v´ns gehenkt hant an disen brief inen vnd iren erben vnscha^edlich. Dirr brief ist geben ze sant Gallen an v´nser fro^vwen abent ze mittem o^vgsten in dem jâre, do man von Cristus gebúrt zalte drúzehenhundert jâr vnd darnach in dem nún vnd ahtzigosten jare.

Source Fulltext: Chartularium Sangallense X, Nr. 6344, S. 589-590.