Ich^a) Walther von der Hohen Clingen¹ ffrye, dez můter von Prandys² waz, tůn kunt vnd vergich offenlich mit disem brief allen || den, die in ansehent oder ho^erent lesen, daz fúr mich kament ze Stain³ in minem hof vff den tag, alz dirr brief geben ist, dis erber || vnd beschaiden man Cůnrat Amman burger ze Winterthur⁴ vnd V^olrich Nyffer burger ze Dyessenhouen⁵ ze dem ainen tail vnd || der erber herr her Hainrich Vischli von Stain tegan vnd kilchher ze Stamhain⁶ ze dem andern tail. Vnd do offnotent da vor mir die obgenanten Cůnrat Amman vnd V^olrich Nyffer, daz sy von mir ze rechtem lehen hettint den gro^vssen zehenden ze Nider Núfron⁷ by der Thur⁸, vnd offnotent o^vch fúro, daz sy mit dem vorgenanten her Hainrichen kilchherr ze Stamhain vnd er mit inen dez lieplich vnd mit gůter vorbetrachtung v´berain komen wa^erint, daz er inen reht vnd redlich fúr in vnd fúr alle sin na^vchkomen vnd mitt willen vnd gunst aller der, die darzů no^vtdúrftig sint, gelihen hett eweclich ze habent den klainern zehenden o^vch ze Nider Núfron, der von alter an die kilchen ze Stamhain geho^eret hett, mit sa^emlicher beschaidenhait vnd gedingd, daz die egenanten Cůnrat Amman vnd V^olrich Nyffer oder ir erben ald wer denn die zehenden inne ha^vt ald in nimet oder enphangen ha^vt, von den selben baiden zehenden mit allen nútzen rechten vnd gewonhaiten vnd mit allen zůgeho^erden nu hinnahin a^ellú ja^vr eweclich sont geben dem obgenanten kilchherren ze Stamhain vnd sinen na^vchkomen, weli denn ie da kilchherren sint, vnd an die selben kilchen zway malter gůter vesan Dyessenhouer mess vnd vier herbst hu^enr vnd ain phunt gůter vnd gena^emer haller ald aber andrer múnss, dú denn ze Dyessenhouen geng vnd gena^em ist, dafúr so vil, daz sy der haller volleclich gewert sigint, vnd sont daz ja^erlich gelt korn phenning vnd hu^enr also a^ellú ja^vr geben ainem kilchherren ze Stamhain vnd antwurten a^vn sinen schaden gen Stain in die statt in den kasten daz korn, wâ denn ander korn geschút ist, das ainem kilchherren ze Stamhain ie denn zůgeho^ert. Wa^er o^vch, daz sy dehains ja^vrs daran summig wa^erint vnd daz vorgeschriben ia^erlich gelt korn pfenning vnd hu^enr ie vff sant Martins tag nit wertint oder gewert hettint, wenn denn der selb tag fúrloffen ist, alz dik ez ze schulden kunt, so hett der obgenant kilchherr oder sin na^vchkomen vff der selben kilchen vollen gewalt vnd fryes vrlob, daz sy die vorgenanten Cůnraten Amman vnd V^olrichen Nyffer ald ir erben oder na^vchkomen ald den, wer der ist, der dez ia^vres die zehenden enphangen hett, alle sament oder vnder inen, weli oder welen sy wend, wol mugent angriffen mit gaistlichem oder mit weltlichem gericht ald^b) vil vnd alz dik, vntz daz sy dez vorgeschriben ja^erlichens geltz gar vnd ga^entzlich gewert vnd bezalt sind a^vn gebresten. Wa^er och, daz die egenanten zehenden dehains ia^vrs geswecht vnd gebresthaft wurdint von lantgebresten wegen, ez wa^er hagel oder wind ald von andern redlichen gebresten wegen, so sol der egenant kilchherr oder sin na^vchkomen an dem vorgenanten ia^erlichen gelt dez selben ia^vres o^vch abla^vzzen, alz denn erber vnd beschaiden lút zîtlich vnd muglich dunkt vnd alz von zehenden wegen denn sitt vnd gewonlich ist. Wa^er och, daz die vorgenanten Cůnrat Amman, V^olrich Nyffer oder ir erben die vorgeschriben zehenden weltint angriffen mit versetzent ald mit verko^vffent, daz mugent sy wol tůn vnd o^vch also vollfu^eren, doch mit der beschaidenhait, daz ez ainem kilchherren vnd der kilchen ze Stamhain an dem vorgeschriben ja^erlichen gelt korn phenning vnd hu^enr dehainen schaden bring. Na^vch der offnung ba^vtent mich die obgenanten Cůnrat Amman vnd V^olrich Nyffer, daz ich inen gunnen vnd verhengen weit, daz vorgeschriben ia^erlich gelt korn pfenning vnd hu^enr a^ellú ia^vr ze gebent von den egenanten zehenden mit aller zůgeho^ert dem vorgeschriben kilchherren ze Stamhain vnd sinen na^vchkomen vff der selben kilchen mit aller beschaidenhait vnd gedingden, alz da vor geschriben sta^vt. Der selben bett han ich sy gewert, alz ich offenlich vergich, wan sy mich zîtlich dunkt. Vnd do ze ma^vl verhiessent vnd gelobtent die egenanten Cůnrat Amman vnd V^olrich Nyffer mit iren trúwen geben fúr sy vnd fúr ir erben vnd mit minem willen vnd gunst dem vorgenanten kilchherren ze Stamhain vnd sinen na^vchkomen a^ellú ja^vr ze gebent dú vorgeschribnú zwai malter vesan ain phunt haller vnd vier herbst hu^enr von den egenanten zehenden a^vn alle summung vnd widerred. Vnd ist diss alles also beschehen vnd offenlich vor mir vollefu^ert in aller der ma^vss vnd mit beschaidenhait, alz da vor geschriben sta^vt, vnd darzů mit offnung gewarsami mit ehafti vnd mit no^vtdurft vnd mit allen den dingen worten vnd werchen ra^eten vnd geta^eten, dú darzů gehortent ald ho^eren soltent oder no^vtdurftig wa^vrent von gewonhait ald von reht, alz ez alles kraft vnd macht hett vnd sta^et sol beliben vnd alz der obgenant kilchherr vnd sin na^vchkomen ze Stamhain vnd die kilche daran haben sint nu vnd hiena^vch gar vnd ga^entzlich a^vn alle geuerd. Vnd ze wa^vrem vnd offem vrkúnd aller dirr vorgeschribner ding so han ich der obgenant Walther von Clingen min insigel offenlich gehenkt an disen brief. O^vch vergehint wir die obgenanten Cůnrat Amman vnd V^olrich Nyffer, daz allez daz wa^vr ist, daz von v´ns an disem brief geschriben sta^vtt. Vnd dez o^vch ze vestem vrkúnd vnd sta^eter sicherhait so haben wir v´nsrú insigel fúr v´ns vnd fúr alle v´nser erben vnd na^vchkomen o^vch offenlich gehenkt an disen brief. Der geben ist ze Dyessenhouen in der statt, do man zalt von gottes gebúrt drúzehenhundert vnd achtzig ja^vr, dar nach in dem núnden ja^vr, an dem na^echsten dunstag vor santt Jacobs tag dez hailigen zwelfbotten.

Source Fulltext: Chartularium Sangallense X, Nr. 6336, S. 577-579.