Wir Chůn von gottes gnaden abbt des gotzhuß zů sant Gallen¹ sant Benedicten ordens, das a^vne alles mittel zů geho^erd dem hailigen stůl zů Rom, tu^end kunt vnd veriehent des offenlich mit disem brieff allen, die disen ansehent oder ho^erent lesen, das fúr vns kam ze Costentz in der statt in Conratz des Swartzen huß burger ze Costentz an dem tag, als dirre brieff geben ist, der from vest herr Hanß von Bodmen ritter des alten herr Hansen von Bodmen² ritters elicher sun vnd sprach, das er fúr sich vnd an stat des egenanten herr Hansen von Bodmen sines vatters vnd sines brůders Johansenconrat von Bodmen³ die veste Meckingen⁴ mit allem, das darzu^e geho^ert vnd darin ho^ert, die von vns vnd vnserm vorgeschribnen gotzhuß zů sant Gallen ir lehen wer, fu^egen vnd in gemecktz wise machen wolt sinen lieben vettern herr Hansen von Bodmen ritter sa^esshafft ze Bodmen vnd Hansen sinem elichen sun vnd ir elichen liberben, das knaben sind, mit der beschaidenhait, wer ald bescha^ech, das die vorgenanten herr Hanß von Bodmen ritter der eltest, herr Hanß sin sun vnd Hansconrat sin sun von todes wegen abgiengent vnd nit elich liberben liessend, das knaben werend, das dann die vorgeschriben veste mit aller zůgeho^erde, das von dem vorgeschriben gotzhuß lehen ist, lediclich genauen so^elte an den vorgenanten herr Hansen von Bodmen ritter seßhafft ze Bodmen iro vettern vnd Hanß sinen sun vnd an der selben elich liberben, die knaben werent, vnd batt vns, das wir in die gnad ta^ettend vnd vnsern willen vnd gunst dartzů gebend, der selben ba^ett wir von sunder gnaden sy geeret habend, vnd dazemal fu^eg vnd machet der vorgenant her Hanns von Bodmen des alten herr Hansen von Bodmen ritters elicher sun in namen vnd an stat desselben herr Hansen sines vatters vnd fu^er sich vnd Hansenconrat sinen brůder mit vnser hand getatt gůten willen vnd gunst vnd verhengend die vorgeschriben veste Meckingen mit aller zugehorde, als vor beschaiden ist, dem egenanten her Hansen von Bodmen ritter sa^esßhafft ze Bödmen vnd Hansen sinem elichen sun ir lieben vettern vnd elichen liberben, das knaben sind, ze ainem rechten redlich gemacht vnd in rechtz gemechtz wise mit disem brieff mit der beschaidenhait, als dauor an disem brieff aigentlich mit worten vßgeschaiden vnd verschriben ist, vnd ist dises alles beschehen vnd redlich vollefu^ert nach vnsers gotzhuß gewonhait vnd recht, als es crafft vnd macht haben sol vnd mag jetzo vnd hienach, vnd des alles zů warem vnd offem vrkúnd haben wir obgenanter abbt Chun vnser insigel offenlich gehenck an disen brieff. Darnach zů ainer merer sicherhait aller obgeschribner ding vnd vergich han ich herr Hanns von Bodmen ritter herr Hansen von Bodmen ritters des elsten elicher sun min aigen insigel ouch offenlich gehenck an disen brieff. Ich herr Hanns von Bodmen ritter der elstes vergich offenlich an disem brieff, das alles das, so der egenant herr Hanns von Bodmen ritter min elicher sun von minen wegen vnd an miner vnd Hansconratz mines elichen suns stat von des obgeschribnen gemechtz wegen getan mit des hochwirdigen fúrsten Chůnen von gottes gnaden abbt des vorgeschribnen gotzhuß zů sant Gallen mines gna^edigen herren handel^a) vollefu^ert hat, das das alles mit minem wissen vnd Hansconratz mines elichen suns vnd von vnsers haissen wegen beschehen ist, vnd noch zů merer sicherhait alles des, so an disem brieff geschriben sta^vt, han ich min aigen insigel fu^er mich vnd den yetzgenanten Hansenconrat minen elichen sun offenlich gehenck an disen brieff, des ich der selb Hansconrat von Bodmen hern Hansen von Bodmen des elsten ritter elichen sun vergich mit disem brieff, das diß vorgeschriben gemecht mit miner wissen gunst vnd willen beschehen ist, vnd wond ich nit aiges insigel han, so verbind ich mich vnder des selben herr Hansen mines vattern insigel ze ainer warheit diser vorgeschribner ding. Geban an dem nechsten dornstag nach dem hailgen tag zů wihna^echten in dem jar, do man zalt von Crists gebúrt tusent drúhundert vnd núntzig jare.

Source Fulltext: Chartularium Sangallense X, Nr. 6362, S. 611-612.